សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនសង្ស័យម្នាក់ ត្រូវបានសមត្ថកិច្ចមូលដ្ឋានឃាត់ខ្លួន និងបញ្ជូនមកមន្ទីរពេទ្យបង្អែកខេត្តស្វាយរៀង បន្ទាប់ពីលួចកាច់កម៉ូតូគេជិះគេចខ្លួន តែសំណាងមិនល្អ ក៏ជួបគ្រោះថ្នាក់ចរាចរណ៍ដួលម៉ូតូកណ្តាលផ្លូវរបួសធ្ងន់ ។
ករណីនេះ បានកើតឡើងកាលពីវេលាម៉ោង៣និង១៥នាទីរសៀល ថ្ងៃទី២៨ ខែមីនា ឆ្នាំ២០១៩ នៅត្រង់ចំណុចភូមិ សង្កែ ឃុំឈើទាល ស្រុកស្វាយជ្រុំ ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឲ្យដឹងថា ជនសង្ស័យដែលជួបគ្រោះថ្នាក់ចរាចរណ៍ មិនត្រូវបានស្គាល់ឈ្មោះនៅឡើយ ខណៈកំពុងសម្រាកព្យាបាលនៅមន្ទីរពេទ្យខេត្តស្វាយរៀង ។
ប្រភពបន្តថា នៅមុនពេលកើតហេតុមានឈ្មោះ ទូច ភុន ភេទប្រុស អាយុ៤៥ឆ្នាំ មុខរបរជាងធ្វើផ្ទះ មានទីលំនៅភូមិអង្គសាលា ឃុំចំបក់ ស្រុកស្វាយជ្រំ បានជិះម៉ូតូមកផ្ញើនៅក្រោមផ្ទះឈ្មោះ សៅ ណាសាំង ភេទប្រុស អាយុ ២៧ឆ្នាំ នៅភូមិ ឃុំកើតហេតុខាងលើរួចដើរទៅធ្វើផ្ទះអ្នកភូមិក្បែរគ្នា ។
ប្រភពបន្តថា ខណៈកំពុងតែធ្វើផ្ទះ ស្រាប់តែឃើញមានជនសង្ស័យចំនួន២នាក់ មិនស្គាល់អត្តសញ្ញាបានជិះម៉ូតូមួយគ្រឿងមិនស្គាល់ម៉ាកឌុបគ្នាមកដល់មុខផ្ទះដែលផ្ញើម៉ូតូ រួចក៏ទម្លាក់គ្នាគេម្នាក់ចុះធ្វើសកម្មភាពលួចកាច់ករម៉ូតូរួចជិះគេចចេញទៅទិសខាងលិច តែចៃដន្យម្ចាស់ម៉ូតូឃើញទាន់ស្រែកឆោឡោ និងបាននាំគ្នាជិះម៉ូតូដេញតាមពីក្រោយរហូតដល់ចំណុច ភូមិស្វាយចេក ឃុំស្វាយធំ ស្រុកស្វាយជ្រំ ខេត្តស្វាយរៀង ជនសង្ស័យជិះម៉ូតូលឿនពេកក៏បណ្តាលឲ្យដួលខ្លួនឯងរងរបួសធ្ងន់តែម្ដង ។
ក្រោយមក សមត្ថកិច្ចក៏បានឃាត់ខ្លួនជនសង្ស័យ ប៉ុន្តែដោយមានរបួស ក៏បានបញ្ជូនបន្តទៅព្យាបាលនៅមន្ទីរពេទ្យបង្អែកខេត្តស្វាយរៀង។
បច្ចុប្បន្នកម្លាំងសមត្ថកិច្ចជំនាញស្រុកស្វាយជ្រំ និងកម្លាំងប៉ុស្តិ៍នគរបាលរដ្ឋបាលឈើទាល កំពុងកសាងសំណុំរឿង និងស្រាវជ្រាវដើម្បីបន្តចាប់ខ្លួនជនសង្ស័យម្នាក់ទៀត មកផ្ដន្ទាទោសខាងតែបាន ៕ យឹម សុថាន
