សារព័ត៌មាន នគរវត្ត តែងតែនាំមុខគេជានិច្ច
សង្គ្រាមពាណិជ្ជកម្មរវាង អាមេរិក និងចិន បានបង្កក្តីបារម្ភយ៉ាងខ្លាំងដល់បណ្តាប្រទេសជុំវិញពិភពលោក ដោយអាចបង្កឲ្យមានវិបត្តិសេដ្ឋកិច្ចសកល ។ នៅពេលនេះ ដំណើរពិភាក្សាស្តីពីពាណិជ្ជកម្ម រវាងអាមេរិកមានការរីកចម្រើនឆ្ពោះទៅមុខ យ៉ាងល្អប្រសើរ ។
កិច្ចពិភាក្សាលើវិស័យពាណិជ្ជកម្ម រវាងអាមេរិក និងចិន កាន់តែប្រសើរឡើង ដោយប្រទេសទាំងពីរ អាចនឹងចុះកិច្ចព្រមព្រៀងពាណិជ្ជកម្ម ក្នុងពេលឆាប់ៗ ដើម្បីបញ្ចប់សង្គ្រាម ពាណិជ្ជកម្ម រវាងមហាអំណាចសេដ្ឋកិច្ចទាំងពីរ ។
នៅពេលនេះដែរ ប្រធានាធិបតីអាមេរិក ដូណាល់ ត្រាំបានប្រកាសថា នឹងទទួលបានកិច្ចព្រមព្រៀង នៅក្នុងជំនួបជាមួយប្រធានាធិបតីចិន ស៊ី ជីងពីន ពេលបំពេញទស្សនកិច្ចទៅកាន់អាមេរិក ។
កាលពីថ្ងៃទី២៥ ខែមេសា ប្រធានាធិបតីអាមេរិក ដូណាល់ ត្រាំបានប្រកាសថា លោកនឹងមានជំនួបក្នុងពេលឆាប់ៗនេះ នៅសេតវិមានជាមួយប្រធានាធិបតីចិន ស៊ី ជីងពីន ។ ការប្រកាសខាងលើរបស់លោកត្រាំ មានន័យថា ប្រទេសមហាអំណាចសេដ្ឋកិច្ចទាំងពីរ នៅលើពិភពលោក នឹងឈានដល់កិច្ចព្រមព្រៀងពាណិជ្ជកម្ម ក្រោយពិភាក្សាអស់ជាច្រើនខែកន្លងមក ។
កន្លងមក សេតវិមានបានប្រកាសថា តំណាងពាណិជ្ជកម្មអាមេរិក លោក Robert Lighthizer និងរដ្ឋមន្ត្រីក្រសួងហិរញ្ញវត្ថុលោក Steven Mnuchin នឹងទៅកាន់ទីក្រុងប៉េកាំងចូលរួមពិភាក្សា ស្តីពីពាណិជ្ជកម្ម នៅថ្ងៃទី៣០ ខែមេសានេះ ។ នេះជាកិច្ចពិភាក្សាដោយផ្ទាល់ រវាងរដ្ឋមន្ត្រីអាមេរិក នឹងចិន ដើម្បីឈានដល់កិច្ចព្រមព្រៀង បញ្ចប់ការប្រឈមមុខដាក់គ្នាក្នុងវិស័យពាណិជ្ជកម្ម ។
ឧបនាយករដ្ឋមន្ត្រីចិន នឹងដឹកនាំគណៈប្រតិភូរបស់ចិន ទៅកាន់អាមេរិក ដើម្បីពិភាក្សាបន្ថែមនៅថ្ងៃទី៨ ខែឧសភា ។ តាមការលើកឡើងរបស់ប្រធានាធិបតីដូណាល់ ត្រាំ លោកនឹងចុះកិច្ចព្រមព្រៀង ជាមួយប្រធានាធិបតីស៊ី ជីងពីន ក្នុងពេលដ៏ខ្លីខាងមុខ ៕
