ព័ត៌មានទាន់ហេតុការណ៍៖

យន្តហោះបារាំងបាត់ពីប្រព័ន្ធរ៉ាដា ចំណែកយន្តហោះមីយ៉ានម៉ាបាក់ជា​៣កំណាត់

ចែករំលែក៖

បញ្ហាគ្រោះថ្នាក់យន្តហោះជាបន្តបន្ទាប’ បានធ្វើឲ្យអ្នកដំណើរ បង្ហាញពីក្តីបារម្ភយ៉ាងខ្លាំង ពេលធ្វើដំណើរតាមយន្តហោះម្តងៗ ។ នៅពេលនេះ អ្នកដំណើរនៅលើយន្តហោះបារាំង បារម្ភយ៉ាងខ្លាំងពេលយន្តហោះរបស់ខ្លួនបាត់ចេញពីប្រព័ន្ធទំនាក់ទំនង រ៉ាដា ។ ចំណែកយន្តហោះរបស់ក្រុមហ៊ុន​ Biman Bangladesh Airlines វិញបានបាក់ជា​៣កំណាត់ពេលចុះចត តែមិនបណ្តាលឲ្យឆាបឆេះនោះឡើយ ។

ពាក់ព័ន្ធនឹងយន្តហោះបារាំង យន្តហោះដឹកអ្នកដំណើរ Airbus A-240313 របស់ក្រុមហ៊ុន អាកាសចរណ៍បារាំង​ Air France ​បានបាត់ចេញពីប្រព័ន្ធរ៉ាដា​ ក្រោយពេលប្រកាសអាសន្ន ឲ្យជួយ ពេលកំពុងធ្វើដំណើរ ទៅកាន់ប្រទេសឥណ្ឌា ​។

មន្ត្រីអ៊ីរ៉ង់បានប្រកាសថា ​នៅពេលនេះយន្តហោះខាងលើ បានចុះចតដោយសុវត្ថិភាព​នៅក្នុងប្រទេសអ៊ីរ៉ង់ កាលពីថ្ងៃទី​៨ ខែឧសភា ក្រោយហោះហើរបានពាក់កណ្តាលផ្លូវ ពីទីក្រុង​ប៉ារីស ទៅកាន់ ទីក្រុង ម៉ុមបៃ ប្រទេសឥណ្ឌា ។

សារព័ត៌មាន​ IRNA ​បានដកស្រង់សម្តីលោក​ Mansoon Glass អគ្គនាយក​គ្រប់គ្រងដែនអាកាសអ៊ីរ៉ង់បានប្រកាសឲ្យដឹងថា​ អ្នកដំណើរនៅលើយន្តហោះទាំងអស់មានសុវត្ថិភាពធម្មតា ប៉ុន្តែកំពុងទទួលបានការ​ត្រួតពិនិត្យសុខភាពពីក្រុមគ្រូពេទ្យ ​។ សារព័ត៌មានអ៊ីរ៉ង់មិនបាន បញ្ជាក់ពីមូលហេតុ​ ដែលត្រូវចុះចតជាបន្ទាន់នោះឡើយ​។

ប្រភពព័ត៌មានបានឲ្យដឹងថា យន្តហោះ​ដឹកអ្នកដំណើរខាងលើ​ បានបាត់ទំនាក់ទំនងពីប្រព័ន្ធរ៉ាដា​ ក្រោយផ្តល់សញ្ញាជំនួយបន្ទាន់ ពេលហោះហើរនៅលើដែនអាកាស ភាគកណ្តាលប្រទសអ៊ីរ៉ង់ ​។

យន្តហោះដឹកអ្នកដំណើរ​របស់ក្រុមហ៊ុន​ Air France បានចាកចេញពីទីក្រុងប៉ារីស នៅវេលាម៉ោង​១១និង​២១នាទីឆ្ពោះទៅកាន់ទីក្រុងម៉ុបបៃ ប្រទេសឥណ្ឌា ។

ចំណែក មីយ៉ាន់ម៉ា កំពុងស៊ើបអង្កេត ករណីយន្តហោះដឹកអ្នកដំណើរ រអិលកង់ធ្លាក់ចេញពីផ្លូវ របួសជាច្រើននាក់ ។ ប្រភពព័ត៌មានរបស់មីយ៉ាន់ម៉ា បានផ្សាយ នៅថ្ងៃទី៩ ខែឧសភា ឆ្នាំ២០១៩ថា ការស៊ើបអង្កេតកំពុងតែដំណើរការ លើករណីយន្តហោះដឹកអ្នកដំណើរ រអិលកង់ធ្លាក់ចេញពីផ្លូវ បណ្តាលឲ្យអ្នកដំណើរជាច្រើននាក់ រងរបួស។

អ្នកនៅលើយន្ដហោះចំនួន១៨នាក់ ក្នុងនោះមានក្រុមអាកាសយានិក៥នាក់ បានរងរបួស ក្រោយពេលយន្តហោះដឹកអ្នកដំណើររបស់ក្រុមហ៊ុន Biman Bangladesh Airlines (ប៊ីមេន បង់ក្លាដែស អ៊ែរឡាញ) មួយគ្រឿង បានរអិលកង់ចេញពីផ្លូវ នៅឯអាកាសយានដ្ឋានអន្តរជាតិ ទីក្រុងយ៉ាំងហ្គូន មីយ៉ាន់ម៉ា កាលពីថ្ងៃទី៨ ខែឧសភា ឆ្នាំ២០១៩ ។

អាជ្ញាធរអាកាសចរណ៍ស៊ីវិលមីយ៉ាន់ម៉ា បានប្រកាសថា យន្តហោះដែលជួបនឹងគ្រោះថ្នាក់នោះ ពាក់ស្លាកលេខ Biman Flight No. BG-60 មកពីបង់ក្លាដែស ដោយដឹកអ្នកដំណើរចំនួន២៨នាក់ និងអាកាសយានិក៦នាក់ បានរអិលកង់ ចេញពីផ្លូវរត់ នៅវេលាម៉ោង៦ និង៥០នាទីព្រលប់ (ម៉ោងក្នុងស្រុក) ។

ក្រុមអ្នកជួយសង្គ្រោះរបស់ប្រទេសមីយ៉ាន់ម៉ា បានបញ្ជាក់ថា យ៉ាងតិចមនុស្ស១៦នាក់ បានរងរបួស ហើយត្រូវគេបញ្ជូនទៅសង្គ្រោះ នៅក្នុងមន្ទីរពេទ្យ។ ប៉ុន្តែទោះជាយ៉ាងណា គេនៅមិនទាន់បញ្ជាក់បាន ថាតើអាចគំរាមកំហែងដល់អាយុជីវិត ឬក៏យ៉ាងណានោះទេ ។

ប្រភពព័ត៌មាន បានឲ្យដឹងទៀតថា យន្តហោះនេះបានរេចង្កូតរត់ចេញពីផ្លូវ នៅក្នុងអំឡុងពេលព្យាយាមចុះចត ខណៈភ្លៀងកំពុងធ្លាក់ចុះយ៉ាងខ្លាំង និងអាកាសធាតុមិនអំណោយផ្លូវ។ រហូតមកទល់នឹងពេលនេះ ក្រុមអ្នកស៊ើបអង្កេត បានចាប់ផ្តើមដំណើរការស្រាវជ្រាវ រកមូលហេតុពិតប្រាកដ៕


ចែករំលែក៖