សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ប្រុសស្រី១គូបានធ្វើដំណើរដោយរថយន្តមួយគ្រឿង ម៉ាកកាមរីហាយប្រឺត ជ្រុលទៅបុករបាំងថ្មពុះចែកទ្រូងផ្លូវយ៉ាងពេញទំហឹង បណ្ដាលឲ្យបាក់អស់១កង់ ឯរថយន្តបង្កខ្ទេចមួយកំណាត់មុខ ព្រមទាំងបណ្ដាលឲ្យមនុស្សរបួសធ្ងន់ស្រាល២នាក់ផងដែរ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង២ និង៥០នាទីរំលងអធ្រាត្រ ឈានចូលថ្ងៃសៅរ៍ ទី២៥ ខែឧសភា ឆ្នាំ២០១៩ នៅចំណុចស្ទុបផ្សារអូឡាំពិក តាមបណ្ដោយផ្លូវព្រះសីហនុ ស្ថិតក្នុងសង្កាត់វាលវង់ ខណ្ឌ7មករា រាជធានីភ្នំពេញ ។
យោងតាមសម្ដីប្រជាពលរដ្ឋដែលឃើញហេតុការណ៍ខាងលើនេះ បានឲ្យដឹងថា នៅពេលកើតហេតុគេឃើញរថយន្តបង្កម៉ាកកាមរីហាយប្រឺត ពណ៌ស ពាក់ស្លាកលេខ ភ្នំពេញ 2AE-6117 បានធ្វើដំណើរតាមបណ្ដោយផ្លូវព្រះសីហនុ ទិសដៅពីកើតមកលិចក្នុងល្បឿនយ៉ាងលឿន លុះមកដល់ចំណុចកើតហេតុដែលជាកន្លែងផ្លូវកោង រថយន្តខាងលើមិនបង្អង់ល្បឿនទេ ក៏ជ្រុលចង្កូតទៅបុកក្បាលនាគពុះចែកទ្រូងផ្លូវយ៉ាងពេញទំហឹង បណ្ដាលឲ្យរបាំថ្មបាក់អស់១កង់ ឯរថយន្តបង្កបានខ្ទេចមួយកំណាត់យ៉ាងដំណំ គ្រានោះប្រជាពលរដ្ឋ ក៏ឃើញមានប្រុសស្រី២នាក់នៅក្នុងរថយន្តបង្ក ដោយមនុស្សស្រីរងរបួសធ្ងន់ រីឯមនុស្សប្រុសរងរបួសស្រាល។
ក្រោយកើតហេតុភ្លាមៗ ជនរងគ្រោះទាំង២នាក់ខាងលើបានហៅម៉ូតូឥណ្ឌាឲ្យជួយជូនទៅកាន់មន្ទីពេទ្យដើម្បីព្យាបាលរបួស ។ ដោយឡែករថយន្តបង្កត្រូវបានសមត្ថកិច្ចមូលដ្ឋានទាក់ទងទៅសមត្ថកិច្ចជំនាញមកវាស់វែងយករថយន្តបង្កទៅរក្សាទុកនៅឯការិយាល័យចរាចរណ៍ជើងគោក រាជធានីភ្នំពេញ ដើម្បីរង់ចាំដោះស្រាយនៅពេលក្រោយ ៕ ភារ៉ា ដង្កោ
