សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នារីម្នាក់ទំនងជាស្រវឹងស្រា បើករថយន្ត លឿនជ្រុលទៅបុករះរបងស័ង្កសី និងបង្គោលភ្លើងស្តុប បណ្ដាលឲ្យរថយន្តផ្ងារជើងម្ខាង តែអ្នកបើកបរមិនមានរងគ្រោះថ្នាក់អ្វីនោះទេ ។ ហេតុការណ៍នេះ បានកើតឡើងនៅម៉ោងជាង២រំលងអធ្រាត្រ ឈានចូលថ្ងៃ ទី២៧ ខែឧសភា ឆ្នាំ២០១៩ នៅតាមបណ្ដោយផ្លូវលេខ១៦៩ នៅជិតរង្វង់មូលនាងគង្ហីង ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញនារីម្នាក់ ទំនងជាស្រវឹងស្រា បើករថយន្តមួយគ្រឿងម៉ាក TOYOTA PRIUS ពណ៌ឈាមជ្រូក ពាក់ស្លាក ភ្នំពេញ 2AX-2541ដោយធ្វើដំណើរតាមបណ្ដោយផ្លូវលេខ១៦៩ក្នុងទិសដៅពីជើងទៅត្បូង ខណៈមកដល់ចំណុចកើតហេតុដោយរថយន្តបើកលឿនបួងចង្កូតមិនទាន់ ក៏ជ្រុលបុករះរបងស័ង្កសី និងបង្គោលភ្លើងស្តុបបណ្ដាលឲ្យរថយន្តផ្ងារជើងម្ខាងទៅមុខលែងរួច ។ ភ្លាមៗនោះ នារីអ្នកបើករថយន្តត្រូវបានអ្នកបើកកង់បីបានជួយទាញយកចេញមកក្រៅរួចរត់គេចខ្លួនចេញពីកន្លែងកើតហេតុបាត់ស្រមោល ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ទាក់ទងទៅសមត្ថកិច្ចជំនាញចរាចរចុះមកស្ទូចយករថយន្តយកទៅរក្សាទុកនៅការិយាល័យចរាចរផ្លូវគោករាជធានីភ្នំពេញរង់ចាំដោះស្រាយគ្នានៅពេលក្រោយ ៕ ជ្រោយពេជ្រ
