សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ប្រជាពលរដ្ឋបានលើកគ្នាមកដាក់ពាក្យបណ្តឹង ក្រោយពេលពួកគាត់បានយកឯកសារប័ណ្ណក្រីក្រ និងលិខិតបញ្ជាក់ពីអាជ្ញាធរទៅប្រគល់ឲ្យលោក ជា កុយ ស្នើសុំដីតាមការប្រកាសរបស់លោក ជា កុយ ថាប្រគល់ដីជូនប្រជាពលរដ្ឋក្រីក្រចំនួន១០០ គ្រួសារ តាំងពីមុនបោះឆ្នោតជ្រើសតាំងសមាជិកសភា នីតិកាលទី៥ រហូតមកបច្ចុប្បន្នបាត់ដំណឹងសូន្យឈឹង សូម្បីតែដីធ្លីក៏មិនបាន ឯកសារក៏ត្រូវលោក ជា កុយ មិនទាន់បានប្រគល់ឲ្យពួកគាត់វិញ។
ប្រជាពលរដ្ឋបានឲ្យដឹងថា បន្ទាប់ពីលោក ជា កុយ បានប្រកាសជាសាធារណៈ តាមបណ្ដាញសារព័ត៌មាន ទូរទស្សន៍ និងគេហទំព័រជាដើម ថានឹងចែកដីជូនប្រជាជនក្រីក្រដែលមានភ្ជាប់លេខទូរស័ព្ទផង 011-016 (979298) ។ នៅពេលបានឃើញព័ត៌ មាននេះ គាត់ក៏បានចុចទូរស័ព្ទទាក់ទងទៅឈ្មួញដី ដោយគាត់បានឱ្យយើង ដាក់ពាក្យ (ភ្ជាប់នូវប័ណ្ណក្រីក្រ លិខិតបញ្ជាក់ពី ភូមិ-ឃុំ ថាពិតជាក្រីក្រ នៅការិយាល័យរបស់គាត់ នៅភូមិត្នោត ឃុំម្កាក់ ស្រុកអង្គស្នួល ខេត្តកណ្ដាល នៅអំឡុងមុនរដូវឃោសនាបោះឆ្នោតសកល។
ក្រោយពេលបោះឆ្នោតរួចមក បាន ទាក់ទងទៅលោក ជា កុយ ដោយគាត់ ឆ្លើយថា រង់ចាំបង្កើតរដ្ឋាភិបាលសិន ក្រោយពេលបង្កើតរាជរដ្ឋាភិបាលហើយ គាត់ថា ចាំមើលចៅហ្វាយខេត្ត ចៅហ្វាយ ស្រុកថ្មីសិន ។ ការចែកដីនេះចេះតែអូស បន្លាយពេលវេលាយូរទៅៗ នៅពេលប្រជា ពលរដ្ឋសួរនាំទៀត គាត់បង្វែរឲ្យទៅសួរ ម្ចាស់មូលនិធិ មានលេខទូរស័ព្ទ (លេខ 067327777)។ តែម្ចាស់លេខនេះមិនមានព័ត៌មានអ្វីនោះទេ ពោលគឺបង្វែរឲ្យមកសួរ លោក ជា កុយ វិញ។ រយៈពេលជិតមួយឆ្នាំមកនេះ ប្រជាពលរដ្ឋតែងទន្ទឹងរង់ចាំការសន្យាចែកដីរបស់គាត់ តែហាក់ដូចជាល្បែងបោកប្រាស់ប្រជាជនទាំងស្រុង។ ដូច្នេះសូមលោកអភិបាលស្រុក មេត្តាជួយរកភាពខុសត្រូវ ព្រោះប្រជាពលរដ្ឋបានប្រើប្រាស់ថវិកាឡើងចុះមករកការិយាល័យគាត់ ដោយមានការខ្ចីលុយបុលលុយកាក់ និងចងការគេផង។
ពាក់ព័ន្ធនឹងករណីនេះ អភិបាលនៃ គណៈអភិបាលស្រុកអង្គស្នួល លោក នីម នីរ៉ាដេត បានប្រាប់ កាលពីព្រឹកថ្ងៃទី ២៧ ខែឧសភា ឆ្នាំ២០១៩ថា ករណីផ្សព្វផ្សាយចែកដីជូនប្រជាពលរដ្ឋក្រីក្រ លោកមិនទាន់ទទួលបានឯកសារដែលបញ្ជាក់ ថា លោក ជា កុយ ពិតជាចែកដីជូនប្រជា ពលរដ្ឋនៅឡើយ។ ប៉ុន្តែលោកបានដឹង រឿងនេះតាមរយៈសារព័ត៌មានវិញទេ ដែលបានផ្សព្វផ្សាយកន្លងមក។ ចំណែក ការដាក់ពាក្យបណ្តឹង លោកនឹងពិនិត្យ ហើយដាក់លិខិតឲ្យពួកគាត់មកសាលាស្រុក ដើម្បីសួរនាំបន្តនីតិវិធី។
លោក ជា កុយ កាលពីថ្មីៗនេះ បានធ្វើ ពិធីចែកសាច់ជ្រូកជូនប្រជាពលរដ្ឋនៅភូមិ ត្នោត មួយគ្រួសារ១គីឡូក្រាម ឬ២គីឡូ ក្រាម ដើម្បីបិទបាំងទង្វើអាក្រក់ដែលលោកបានប្រព្រឹត្តក្នុងមូលដ្ឋានរបស់គាត់ ដោយ ការជីករណ្តៅដីខុសបច្ចេកទេស។ ដោយ សារតែរណ្តៅដីនោះហើយ ទើបធ្វើឲ្យប្រជា ពលរដ្ឋក្នុងសហគមន៍ ជាពិសេសក្រុម ញាតិមិត្តរបស់លោកជាអ្នកចេញមុខការ ពារទង្វើខុសច្បាប់ទាំងនោះ។
នេះជាទង្វើតែតាមការណ៍ពិតនាយកប្រជាពលរដ្ឋ ធ្វើជាខែលការពារផលប្រយោជន៍របស់ ខ្លួន។ លោក ជា កុយ គ្មានលទ្ធ ភាពចែកដីជូនពលរដ្ឋទាំងនោះឡើយ៕ ហេង សូរិយា
