សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសជនជាតិចិន៣នាក់ ដែលជាជនដៃដល់ត្រូវបានកម្លាំងនគរបាលប៉ុស្តិ៍រដ្ឋបាលគោកឃ្លាង សហការជាមួយកម្លាំងនគរបាលព្រហ្មទណ្ឌខណ្ឌសែនសុខ ឃាត់ខ្លួនពីបទហិង្សាដោយចេតនា (ប្រើដៃជើងវាយទាត់ធាក់បណ្តាលឲ្យរបួស) កាលពីវេលាម៉ោង៨និង៣០នាទីយប់ ថ្ងៃចន្ទ ១កើត ខែពិសាខ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី៣ ខែមិថុនា ឆ្នាំ២០១៩ នៅចំណុចក្នុងឃ្លាំងសង់ថ្មី គ្មានលេខ ផ្លូវ១០១៩ ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ ។
យោងតាមមន្រ្តីនគរបាលខណ្ឌសែនសុខ បានឲ្យដឹងថា ជនដៃដល់ទាំង៣នាក់ដែលសមត្ថកិច្ចឃាត់ខ្លួននោះ ទី១-ឈ្មោះយីន ឈាន់លីន ភេទប្រុស អាយុ ៥៣ឆ្នាំ ជនជាតិចិន មុខរបរជាងបៀកថ្នាំ ស្នាក់នៅក្នុងឃ្លាំងសង់ថ្មី គ្មានលេខ ផ្លូវ១០១៩ ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ(គ្មានសារធាតុញៀន) ។ ទី២-ឈ្មោះ ដៃ អាយគ័រ ភេទប្រុស អាយុ ៥០ឆ្នាំជនជាតិចិន មុខរបរជាងបៀកថ្នាំ ស្នាក់នៅក្នុងឃ្លាំងសង់ថ្មីគ្មានលេខ ផ្លូវ១០១៩ ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ (គ្មានសារធាតុញៀន) និងទី៣-ឈ្មោះ ឈីឈាន់លីន ភេទប្រុស អាយុ ៥៣ឆ្នាំ ជនជាតិចិន មុខរបរជាងបៀកថ្នាំ ស្នាក់នៅក្នុងឃ្លាំងសង់ថ្មី គ្មានលេខ ផ្លូវ១០១៩ ភូមិត្រពាំងស្វាយ សង្កាត់គោកឃ្លាង ខណ្ឌសែនសុខ(គ្មានសារធាតុញៀន) ។ ចំណែកជនរងគ្រោះ ឈ្មោះ អាន សីហុំ ភេទប្រុស អាយុ ៣៣ឆ្នាំ ជនជាតិខ្មែរ មុខរបរបើកបរ ស្នាក់នៅបន្ទប់ជួល ផ្លូវបេតុង ភូមិព្រៃព្រីងខាងជើង សង្កាត់ចោមចៅ១ ខណ្ឌពោធិ៍សែនជ័យ (របួសដាច់រលាត់ស្បែកកែងដៃខាងស្តាំមួយកន្លែង និងឈឺចុកចាប់ពេញរាងកាយ) ។
សម្ភារបន្សល់ទុក ៖ខ្សែលួសកាប១ខ្សែ ជារបស់ជនរងគ្រោះ ។
មន្រ្តីដដែលបន្តថា មុនពេលកើតហេតុ ជនរងគ្រោះបានឲ្យឈ្មោះអ៊ឹម សុខនីន ដឹកខ្លួនចេញពីខាងក្រោយវត្តឃ្មួញ ដើម្បីយកខ្សែលួស(កាប) មកឲ្យគេនៅចំណុចកើតហេតុខាងលើពេលជនរងគ្រោះមកដល់ចំណុចកើតហេតុ រកមើលសន្តិសុខដើម្បីសួរនាំ តែមិនឃើញ ហើយជនរងគ្រោះបានដាក់ខ្សែលួសចុះរួចឈរនៅមុខឃ្លាំងកើតហេតុ ស្រាប់តែមានជនសង្ស័យ ៣នាក់ខាងលើ ដើរចេញពីក្នុងឃ្លាំង មកខាងក្រៅ រួចយកខ្សែលួសនោះចូលក្នុងឃ្លាំង ។ ភ្លាមនោះជនរងគ្រោះ ក៏បានដើរចូលទៅក្នុងឃ្លាំងតាម ហើយក្រុមជនសង្ស័យបាននាំគ្នាព្រួតវាយទាត់ទាក់ទៅលើជនរងគ្រោះបណ្តាលឲ្យរបួស រួចជនសង្ស័យរុញជនរងគ្រោះចេញពីក្នុងឃ្លាំង ហើយបិទទ្វារឃ្លាំងបាត់ទៅ ។ ពេលនោះជនរងគ្រោះក៏បានស្រែកឆោឡោឲ្យគេជួយ ស្របពេលកម្លាំងល្បាតប៉ុស្តិ៍គោកឃ្លាំងបានល្បាតដល់ចំណុចខាងលើឃើញហេតុការណ៍ក៍ជួយធ្វើអន្តរាគមន៍ឃាត់ខ្លួនជនសង្ស័យទាំង៣នាក់នេះ យកមកសាកសួរនៅប៉ុស្តិ៍នគរបាលគោកឃ្លាងតែម្តង ។
បច្ចុប្បន្នជន សង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមច្បាប់ ៕ តុង សីហា
