នារីម្នាក់អង្គុយទ្រហ៊ោយំ ព្រោះតែត្រូវចោរឆក់កាបូបលុយនៅផ្លូវចំការដូង អស់ទ្រព្យសម្បត្តិមួយចំនួន

ភ្នំពេញ៖ នារីម្នាក់ ខណៈកំពុងជិះម៉ូតូកង់បីឥណ្ឌាតាមដងផ្លូវ ស្រាប់តែត្រូវជនសង្ស័យ២នាក់ធ្វើសកម្មភាពជិះម៉ូតូPCXឆក់កាបូបលុយបានសម្រេច កាលពីវេលាម៉ោង១០ និង២០នាទីយប់ ថ្ងៃទី១២ ខែមិថុនា ឆ្នាំ២០១៩ នៅតាមបណ្ដោយផ្លូវ២១៧ ស្ថិតក្នុងសង្កាត់ដង្កោ ខណ្ឌដង្កោ រាជធានីភ្នំពេញ ហើយជិះកង់បីឥណ្ឌាដេញតាមមកដល់ស្ពានអាកាសស្ទឹងមានជ័យ ក៏បាត់ស្រមោលសូន្យឈឹង​ ។​

បើតាមសម្ដីនារីរងរគ្រោះបានរៀបរាប់ទឹកភ្នែកថា រូបនាងបានជិះម៉ូតូកង់បីឥណ្ឌា ចេញពីភោជនីយដ្ឋាន សុជាតា ម្ដុំស្ទុបចំការដូង ខណៈជិះមកដល់ចំណុចកើតហេតុខាងលើ ស្រាប់តែមានជនសង្ស័យ២នាក់ ជិះម៉ូតូមួយគ្រឿងម៉ាកPCX ពណ៌ស មិនចាំស្លាកលេខ បានមកធ្វើសកម្មភាពឆក់កាបូបលុយរបស់គាត់ដែលលុយដុល្លារចំនួន៤០០$ លុយខ្មែរ៥០មុឺនរៀល និងទូរសព្ទដៃ​ម៉ាកIphone មួយគ្រឿងនៅក្នុងកាបូប បានសម្រេច ហើយភ្លាមៗនាងក៏បានឲ្យម្ចាស់ម៉ូតូកង់បីឥណ្ឌាដេញតាម និងស្រែកថាចោរៗដែរ តែគ្មានអ្នកជួយនោះទេ រហូតរូបនាងនិងម្ចាស់ម៉ូតូកង់បីឥណ្ឌាខំដេញមកដល់ស្ពានអាកាសស្ទឹងមានជ័យក៏បាត់ជនសង្ស័យទាំង២នាក់នោះសូន្យឈឹងតែម្ដង ធ្វើឲ្យរូបគាត់ទ្រហ៊ោយំ ទាំងសោកស្ដាយជាខ្លាំង ។​

ក្រោយមក រូបគាត់បានត្រឹមតែជិះម៉ូតូកង់បីឥណ្ឌាទៅដាក់ពាក្យបណ្ដឹងនៅមូលដ្ឋានខណ្ឌដង្កោ​ដែលជាម្ចាស់ទឹកដី ៕ ភារ៉ា ដង្កោ