សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសមិនស្គាល់អត្តសញ្ញាណម្នាក់បានយកទារកអាយុប្រហែល៨ខែ មកផ្ញើអ្នកលក់ប្រដាប់ប្រដាក្មេងលេង ខណៈមេឃកំពុងភ្លៀងធ្លាក់ខ្លាំង រួចប្រាប់ថាទៅនោះមួយភ្លេត បន្តិចទៀតមកយកកូនវិញស្រាប់តែទៅបាត់មិនឃើញត្រលប់មកវិញ ដោយព្រួយបារម្ភអំពីសុវត្ថិភាពទារកតូចនោះ អ្នកលក់ប្រដាប់ក្មេងលេងបានផ្ដល់ដំណឹងទៅវិទ្យុABC ចុះមកទទួលយកទៅស្នាក់នៅបណ្ដោះអាសន្នសិន និងដើម្បីជួយផ្សាយប្រកាសរកឪពុកម្ដាយ ឬអ្នកណាដែលស្គាល់ទារកនេះ អាចមកយកទទួលយកទៅផ្ទះវិញបាន ។
ហេតុការណ៍នេះបានកើតឡើងនៅម៉ោង១០:៣០នាទីយប់ ថ្ងៃសុក្រ ទី២១ ខែមិថុនា ឆ្នាំ២០១៩ នៅចំណុចមុខមន្ទីរពេទ្យគន្ធបុប្ផា សាខាវត្តភ្នំ ខណ្ឌដូនពេញ រាជធានីភ្នំពេញ ។
ប្រភពពីបុរសម្នាក់ដែលជាអ្នកលក់ប្រដាប់ប្រដាក្មេងលេងបានអោយដឹងថា នៅមុនពេលកើតហេតុ ខណៈមេឃកំពុងភ្លៀងធ្លាក់ខ្លាំង គាត់បានជ្រកភ្លៀង នៅចំណុចមុខមន្ទីរពេទ្យគន្ធបុប្ផា លុះក្រោយមកម៉ោងជាង៥ល្ងាចថ្ងៃកើតហេតុ ស្រាប់តែមានបុរសម្នាក់បីទារកអាយុប្រហែល៨ ខែនោះ មកផ្ញើនៅគាត់ រួចប្រាប់គាត់ថាទៅនោះមួយភ្លេត ហើយឲ្យគាត់ជួយមើលថែរបន្តិចទៀតបានត្រលប់មកយកកូនវិញស្រាប់ តែទៅបាត់រហូតមកដល់ម៉ោងជាង១០យប់ហើយ មិនទាន់ឃើញត្រលប់មកវិញ ដោយសារតែព្រួយបារម្ភអំពីសុវត្ថិភាពទារកតូចនោះ ទើបគាត់ទូរស័ព្ទផ្ដល់ដំណឹងទៅវិទ្យុABC ផ្សាយសំលេងផ្ទាល់ បង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋចោមរោមពេញម្ដុំមន្ទីរពេទ្យគន្ធបុប្ផា ។
ក្រោយមកក្រុមការងារវិទ្យុABC បានយករថយន្តអន្តរាគមន៍វិទ្យុABC ដែលជាអំណោយរបស់សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ផ្ដល់ឲ្យវិទ្យុABC សម្រាប់ជួយធ្វើការងារមនុស្សធម៍ក្នុងសង្គម ចុះមកទទួលយកក្មេងពីបុរសដែលជាអ្នកលក់ប្រដាប់ប្រដាក្មេងលេង រួចនាំយកទៅស្នាក់នៅបណ្ដោះអាសន្ននៅស្ថានីយ៍វិទ្យុABC ដើម្បីជួយថែទាំ និងជួយផ្សាយប្រកាសរកឪពុកម្ដាយ ឬអ្នកណាដែលស្គាល់ទារកដែលមានភិនភាគដូចក្នុងរូបនេះ អាចមកយកទទួលយកទៅផ្ទះវិញបាន ៕ ជ្រោយពេជ្រ
