អ្នកដំណើរជាប់គាំងរាប់ម៉ោង ដោយសារយន្តហោះ ពីរគ្រឿងប៉ះគ្នា នៅអាកាសយានដ្ឋាន អន្តរជាតិ ប្រទេសហុល្លង់

អ្នកដំណើររាប់រយនាក់ នៅលើយន្តហោះពីរគ្រឿង របស់ក្រុមហ៊ុនពីរ ផ្សេងគ្នា គឺក្រុមហ៊ុន Easyjet និង KLM ​ ហើយយន្តហោះទាំងពីរគ្រឿងនោះ ផលិតដោយក្រុមហ៊ុនផ្សេងគ្នាទៀត គឺក្រុមហ៊ុន ប៊ូអ៊ីន និង អ៊ែរប៊ឺស​ ។ ​បច្ចុប្បន្នក្រុមហ៊ុនទាំងពីរកំពុងតែប្រកួតប្រជែងនៅលើទីផ្សារយ៉ាងខ្លាំង ក្រោយក្រុមហ៊ុន ប៊ូអ៊ីនជួបបញ្ហាបច្ចេកទេស បណ្តាលឲ្យគ្រោះថ្នាក់សម្លាប់មនុស្សជាច្រើន​ ។ អតិថជនជាច្រើនបានងាកចេញពីប៊ូអ៊ីន ដោយមកទិញយន្តហោះអ៊ែរបឺសវិញម្តង​ ។

យន្តហោះមួយគ្រឿងផលិតដោយក្រុមហ៊ុន​Airbus និងមួយគ្រឿងទៀត របស់Boeing ​បានប៉ះគ្នាកាលពីថ្ងៃទី​៩ ខែកក្កដា​ នៅអាកាសយានដ្ឋាន អន្តរជាតិ​ Schiphol ​ក្នុងរដ្ឋធានី ​Amsterdam ​ប្រទេសហុល្លង់ ធ្វើឲ្យអ្នកដំណើរជាច្រើន ត្រូវយឺតយ៉ាងពេលវេលា​ហោះហើរ ។ រូបភាពដែលអ្នកដំណើរថតបាន​បង្ហាញឲ្យឃើញថា យន្តហោះ របស់ក្រុមហ៊ុន​ EasyJet ​បានប៉ះជាមួយយន្តហោះរបស់ក្រុមហ៊ុន​ KLM ​នៅត្រង់ចំណុចកន្ទុយ​ ។

តាមប្រភពព័ត៌មានបានឲ្យដឹងថា យន្តហោះ Airbus A320 របស់ក្រុមហ៊ុន​អាកាសចរណ៍​ EasyJet ​ត្រៀមធ្វើដំណើរទៅកាន់ទីក្រុងឡុងដុង ប្រទេសអង់គ្លេស ដោយប៉ះជាមួយយន្តហោះ Boeing 737-800 របស់ក្រុមហ៊ុនអាកាសចរណ៍​ KLM ​នៅលើផ្លូវត្រៀមហោះហើរ ទៅកាន់ទីក្រុង រៀលម៉ាដ្រីត ប្រទេសអេស្បាញ ។

អ្នកដំណើរនៅលើយន្តហោះរបស់ក្រុមហ៊ុន​ EasyJet បាននិយាយថា គត់មានអារម្មណ៍​ដូចជាយន្តហោះប៉ះអ្វីមួយ​ ។ អ្នកដំណើរទាំងអស់ នៅលើយន្តហោះត្រូវរង់ចាំរយៈពេលជាងមួយម៉ោង ដើម្បីឲ្យក្រុមជំនាញត្រួតពិនិត្យ​ ។ ក្រោយការត្រួតពិនិត្យ ក្រុមជំនាញឲ្យផ្អាក់ហោះហើរបន្ថែម​៤ទៀត ដើម្បីជួសជុល​ ។

ចំណែកយន្តហោះរបស់ក្រុមហ៊ុន​ KLM ​ក៏បានប្តូរយន្តហោះ ដើម្បីដឹកអ្នកដំណើរទៅកាន់​គោលដៅ ក្រោយព្យាពេលជាង​២ម៉ោង ។ យន្តហោះទាំងពីរខាងលើ គឺត្រូវឲ្យផ្អាក់ហោះហើរ ដើម្បីសុវត្ថិភាពអ្នកដំណើរ ។ នៅពេលនេះគេមិនទាន់ដឹងពីមូលហេតុបណ្តាលឲ្យប៉ះគ្នា​ ពេលត្រៀមហោះហើរនោះឡើយ​ ៕