សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្តរមានជ័យ ៖ កម្លាំងនគរបាល៩០៥ប៉ុស្តិ៍ជាំចំនួន០៣នាក់ ដឹកនាំដោយលោកអនុសេនីយ៍ទោ ស្រឿប ស្រឹត នាយប៉ុស្តិ៍ជាំ បានសហការជាមួយកម្លាំងប៉ុស្តិ៍រដ្ឋបាល ឃុំត្រពាំងប្រិយ ស្រុកអន្លង់វែង ចុះទៅឃាត់ខ្លួនយុវជនម្នាក់ជាបុគ្គលិកក្រុមហ៊ុនកាស៊ីណូ លឹមហេងគ្រុប កាលពីវេលាម៉ោង១៩និង៣០នាទីយប់ ថ្ងៃទី១៦ ខែកក្កដា ឆ្នាំ២០១៩ តាមពាក្យបណ្ដឹងរបស់ក្រុមហ៊ុនខាងលើ ដែលលួចបូមប្រេងពីរថយន្តលក់ ជាច្រើនលើកមកហើយ ។
សមត្ថកិច្ចបានឲ្យដឹងថា ជនសង្ស័យ ដែលលួចបូមប្រេងរបស់ក្រុមហ៊ុន ហើយត្រូវកម្លាំងឃាត់ខ្លួននោះមានឈ្មោះ យុទ្ធ ថៃ ភេទប្រុស អាយុ២៣ឆ្នាំ រស់នៅភូមិ/ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ផ្នែកបើកបររថយន្ត ។
សមត្ថកិច្ចបានឲ្យដឹងទៀតថា ក្នុងករណីលួចបូមប្រេងរថយន្តលក់នោះ មានចំនួន១៦លើក ដែលក្នុងមួយលើកៗចន្លោះពី១០ ទៅ១៥លីត្រ ។
បច្ចុប្បន្ន ជនសង្ស័យខាងលើ ត្រូវបានបញ្ជូនខ្លួនទៅកាន់អធិការដ្ឋាននគរបាលស្រុកអន្លង់វែង ចាត់ការតាមនីតិវិធី ៕ ប៉ែន នួន
