សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ រថយន្តស្តារិចមួយគ្រឿង បានបុកគោយន្តសណ្ដោងរ៉ឺម៉កដឹកគ្រែពីក្រោយយ៉ាងពេញទំហឹង លឹសូរដូចរន្ទះ បង្កការភ្ញាក់ផ្អើលដល់អ្នកភូមិ ក៏ដូចជាអ្នកធ្វើដំណើរចោមរោមមើល សំណាងមនុស្សមិនរងរបួស ខណៈសង្ស័យរថយន្តប្រើប្រាស់ល្បឿនលឿន ។
ហេតុការណ៏នេះបានកើតឡើងកាលពីវេលាម៉ោង១០ និង៣០នាទីព្រឹកថ្ងៃទី ២ ខែសីហា ឆ្នាំ២០១៩ លើផ្លូវជាតិលេខ១ ចន្លោះបង្គោលគីឡូម៉ែត្រលេខ១៣៣ និង១៣៤ ត្រង់ចំណុចភូមិព្រៃសម្ភរ័ ឃុំសំបួរ ស្រុកស្វាយទាប ខេត្តស្វាយរៀង ។
យោងតាមសមត្ថកិច្ចនគរបាលស្រុកបានឲ្យដឹងថា អ្នកបើកគោយន្តសណ្ដោងរ៉ឺម៉កដឹកគ្រែមានឈ្មោះជុច ភៀន ភេទប្រុស អាយុ៣២ឆ្នាំ មុខរបរលក់ដូរ រស់នៅភូមិចុងដូងឃុំចុងដូងស្រុកបារាយណ៍ខេត្តកំពង់ធំ ខណៈសម្ភារគ្រែខូចខាតទាំងស្រុង ។
ចំណែកអ្នកបើករថយន្តត្រូវបានស្គាល់ឈ្មោះ ភោគនី ភេទប្រុស អាយុ៤៤ឆ្នាំ មុខរបរកម្មកររោងចក្រ រស់នៅភូមិលៀបឃុំកណ្តៀងរាយ ស្រុកស្វាយទាប ខេត្តស្វាយរៀង ចំពោះរថយន្តខូចខាតផ្នែកខាងមុខទាំងស្រុង ។
បើតាមសាក្សីបានឲ្យដឹងថា មុនកើតហេតុមានបុរសម្នាក់បានបើកគោយន្តសណ្ដោងរ៉ឺម៉កដឹកគ្រែមួយគ្រឿងក្នុងទិសដៅពីកើតទៅលិចលើកំណាត់ផ្លូវជាតិលេខ១ លុះមកដល់ចំណុចកើតហេតុស្រាប់តែមាន
រថយន្តមួយគ្រឿងម៉ាកហ៊ីយ៉ាន់ដាយ ស្តារ៉ិច ពណ៌ផ្ទៃមេឃ ចាស់ គ្មានស្លាកលេខ ធ្វើដំណើរស្របទិសគ្នាសង្ស័យប្រើប្រាស់ល្បឿនលឿនបុកពីក្រោយយ៉ាងពេញ ទំហឹងបង្កការភ្ញាក់ផ្អើលតែម្ដង ។
ក្រោយមក សមត្ថកិច្ច ក៏បានមកដល់អន្តរាគមន៍វាស់វែង និងអូសយកមធ្យោបាយធ្វើដំណើរទាំង២គ្រឿងមករក្សាទុក នៅអធិការដ្ឋាននគរបាលស្រុកស្វាយទាបដោះស្រាយពេលក្រោយ ៕ យឹម សុថាន
