សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រឿងកម្សត់របស់បេក្ខនារីរបស់បេក្ខនារីកម្មវិធីប្រឡងចម្រៀងលំដាប់ពិភពលោក X Factor Cambodia កញ្ញា លៀង ចាន់ឡា បានក្លាយជាប្រធានបទជជែកគ្នាជាច្រើនពេញបណ្តាញសង្គម ។ ទោះជាយ៉ាងណា តារាចម្រៀងអាន់ ដា បានបង្ហាញរូបភាពជម្រករបស់បេក្ខនារីកម្សត់រូបនេះអមដោយសារលើកទឹកចិត្តម្ចាស់ជំនួយមួយចំនួននោះ ។
ជាបេក្ខនារី មកពីខេត្តកំពង់ឆ្នាំង នាងបានឆក់យកដួងចិត្តទស្សនិកជន ជាមួយរូបរាងមានសម្បុរខ្មៅ និងមានស្ថានភាពជីវិតមិនប្រសើរដូចបេក្ខជនដទៃ ។ រូបភាពនៃការទទួលបានបអំណោយ និងរូបថតបេក្ខនារី លៀង ចាន់ឡា កែសម្ផស្សរួច បានធ្វើឲ្យគេចាប់អារម្មណ៍កាន់តែខ្លាំងចំពោះជិវិតរបស់នាងដែលប្រឹងប្រែងធ្វើការដើម្បីជួយដល់ក្រុមគ្រួសារទីទលក្រ ហើយពេលនេះស្ថានភាពជីវិតពិតរបស់នាង ត្រូវបានបង្ហាញ ដែលឃើញហើយ ពិតជាគួរឲ្យស្រណោះមែន ។ តារាចម្រៀងអាន់ ដា បានបង្ហាញជម្រករបស់បេក្ខនារីរូបនេះគឺ កុំថាឡើយផ្ទះធំទ្រនំខ្ពស់ សូម្បីជម្រកឲ្យសមស្របនាងស្ទើរគ្មានផង នៅក្នុងរូបនេះ គឺនាងមានត្រឹមជាខ្ទមប្រក់ស័ង្កសីពណ៌បៃតង ខណៈដែលខាងក្នុងផ្ទះទៀតសោត ក៏មានសម្បត្តិទ្រព្យអ្វីជាដុំកំភួន ក្រៅពីគ្រែឈើចាស់ និងសុទ្ធជារបស់កំប៉ិកកំប៉ុក ។ សង្វេកលើសពីអ្វីដែលនាងធ្លាប់បញ្ជាក់ថាមានតែសម្បកផ្ទះ គ្រួសារមានម្តាយជាស្ត្រីមេម៉ាយគ្មានស្រែចម្ការធ្វើ និងប្រកបរបរស៊ីឈ្នួលធ្វើការលក់កម្លាំងសប់បែបយ៉ាង ។ ក្តីអាណិត ធ្វើចាន់ឡា ទទួលបានការជួយជ្រោមជ្រែងពីសប្បុរសជនជាច្រើន រួមទាំងអ្នកក្នុង និងក្រៅរង្វង់សិល្បៈផង ខ្លះជួយជាថវិកា ខ្លះជួយជាការតុបតែងខ្លួនសម្រាប់ឡើងប្រឡង ខ្លះទៀតជួយដោយការធានាកែកុនសម្ផស្សនាងឲ្យមានភាពទាក់ទាញជាងនេះ ។ ទោះជារងការរិះគន់មួយចំនួន ប៉ុន្តែ តារាចម្រៀងលោក អាន់ដា បានបង្ហាញការមិនពេញចិត្តចំពោះការរិះគន់នេះដែលលោកចាត់ទុកថាជារឿងល្អសម្រាប់នាងបើទោះជាម្ចាស់ជំនួយជួយក្នុងរូបភាពអ្វី គោលបំណងអ្វីក៏ដោយ ក៏ជំនួយទាំងនោះបានជួយសម្រាលការលំបាករបស់បេក្ខនារីកម្សត់ដែរ ។
លោកស្នើឲ្យពិនិត្យស្ថានភាពជម្រករបស់បេក្ខនារីរូបនេះ ហើយគួរតែជួយឲ្យជិវិតនាងបានកាន់តែប្រសើរជាងនេះជាជាងការរិះគន់ ។ លោកថាជនសប្បុរសដែលជួយឧបត្ថម្ភប្អូនស្រីម្នាក់នេះ ជាជនឆ្លៀតឱកាសយកភាពល្បីល្បាញ ឬយ៉ាងណានោះទេ តែយ៉ាងហោចណាស់ ក៏គេបានជួយដល់មនុស្សក្រខ្សត់ និងមើលទៅគួរអោយអាណិតអាសូរ ហើយមាននិស្ស័យគួរអោយគេចង់ជួយផងដែរ” ។
គួរបញ្ជាក់ដែរថាបេក្ខនារីមកពីខេត្តកំពង់ឆ្នាំង លៀង ចាន់ឡា បានបង្ហាញខ្លួនចុងក្រោយក្នុងកម្មវិធីខាងលើកាលពីសប្ដាហ៍មុន ដោយបានច្រៀងរួមគ្នាជាមួយបេក្ខនារី៣នាក់ផ្សេងទៀត ច្រៀងបទ “ឈប់” របស់ រ៉េត ស៊ូហ្សាណា ។ វេលានោះ បេក្ខនារី ពិតជាត្រមង់ត្រមោច ក្រោយបេក្ខនារី៣នាក់ផ្សេង ត្រូវប្រកាសថាបានឡើងទៅជុំបន្ត ឯនាង ហាក់ស្ថិតក្នុងស្ថានភាពគួរឲ្យអស់សង្ឃឹម ។ ប៉ុន្តែស្នាមញញឹមក៏លេចលើផ្ទៃមុខនារីកម្សត់វិញ ដោយសារនាងក៏ជាបេក្ខនារីត្រូវបន្តដំណើរទៅវគ្គបន្ទាប់ដូចបេក្ខជនក្នុងក្រុមដែរ៕ វឌ្ឍនា
