សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់ បានធ្វើសកម្មភាពឆក់ទូរស័ព្ទពីបុរសម្នាក់ បានសម្រេចនៅមូលដ្ឋានខណ្ឌចំការមន ហើយជិះម៉ូតូយកទៅលក់នៅម្តុំផ្សារកណ្ដាល ខណ្ឌដូនពេញ ត្រូវជនរងគ្រោះឆែកតាមប្រព័ន្ធGPS ឃើញក៏ប្តឹងសមត្ថកិច្ចតាមចាប់បាន និងដកហូតវត្ថុតាងជាក់ស្តែង ។
ករណីឃាត់ខ្លួនជនសង្ស័យខាងលើនេះ បានធ្វើឡើងកាលពីវេលាម៉ោង១១ និង៣០នាទីព្រឹក ថ្ងៃព្រហស្បតិ៍ ៨កើត ខែស្រាពណ៍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៨ខែសីហា ឆ្នាំ២០១៩ ស្ថិតនៅចំណុចផ្សារកណ្ដាល សង្កាត់ផ្សារកណ្តាលទី១ ខណ្ឌដូនពេញ ។
ជនសង្ស័យឈ្មោះ ឈិន សុីឡៃ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅបុរីលឹមឈាងហោ សង្កាត់ដង្កោ ខណ្ឌដង្កោ ។ ចំណែកជនរងគ្រោះមានឈ្មោះ ពុំ សុផល ភេទប្រុស អាយុ២៩ឆ្នាំ មុខរបរ លក់ដូរ ស្នាក់នៅសង្កាត់បឹងត្របែក ខណ្ឌចំការមន ។
តាមប្រភពព័ត៍មានពីមន្រ្តីនគរបាលខណ្ឌចំការមន បាឲ្យដឹងថា កាលពីវេលាម៉ោង១០ និង៣០នាទីព្រឹកថ្ងៃទី៨ ខែសីហា ឆ្នាំ២០១៩ ជនរងគ្រោះបានមកអង្គុយចុចទូរស័ព្ទលេងនៅលើម៉ូតូ នៅតាមផ្លូវលេខ១៤៣កែង និងផ្លូវលេខ១០៥ សង្កាត់បឹងត្របែក ខណ្ឌចំការមន ពេលនោះស្រាប់តែជនសង្ស័យម្នាក់ជិះម៉ូតូម៉ាកស៊ុយហ្ស៊ីយគី ឡែត ពណ៌ស ពាក់ស្លាកលេខ ភ្នំពេញ1CS-7023 ជិះក្នុងទិសដៅពីត្បូងទៅជើង លុះមកដល់ចំណុចកើតហេតុ ក៏បានធ្វើសកម្មភាពឆក់ទូរស័ព្ទដៃពីជនរងគ្រោះបានសម្រេច រួចជិះគេចខ្លួនបាត់ ។
មន្រ្តីដដែលបន្តថា បន្ទាប់ពីជនសង្ស័យឆក់ទូរស័ព្ទយកទៅបាត់ ជនរងគ្រោះបានមកដាក់ពាក្យបណ្ដឹងនៅប៉ុស្តិ៍បឹងត្របែក ដើម្បីឲ្យសមត្ថកិច្ចជួយធ្វើអន្តរាគមន៍ ក្រោយពីរទទួលបានពាក្យបណ្តឹងសមត្ថកិច្ចស្រាវជ្រាវដោយទូរស័ព្ទជនរងគ្រោះភ្ជាប់ប្រព័ន្ធGPS ក៏តាមរកឃើញជនសង្ស័យយកទូរស័ព្ទទៅលក់នៅម្តុំផ្សារកណ្ដាល ខណ្ឌដូនពេញ ភ្លាមនោះសមត្ថកិច្ចខណ្ឌខណ្ឌចំការមន សហការជាមួយសមត្ថកិច្ចខណ្ឌដូនពេញ ឃាត់ខ្លួនជនសង្ស័យតែម្ដង ។
បច្ចុប្បន្នជនសង្ស័យកំពុងឃាត់ខ្លួនបណ្ដោះអាសន្ន នៅអធិការដ្ឋាននគរបាលខណ្ឌចំការមន ដើម្បីកសាងសំណុំរឿងចាត់តាមនីតិវិធី ៕ ស រស្មី
