សារព័ត៌មាន នគរវត្ត តែងតែនាំមុខគេជានិច្ច
អាមេរិក និងបណ្តាប្រទេសជុំវិញពិភពលោកបង្ហាញក្តីបារម្ភយ៉ាងខ្លាំង ដោយខ្លាចប្រទេសបរមាណូ ឥណ្ឌា និងប៉ាគីស្ថានផ្ទុះអាវុធដាក់គ្នាក្លាយទៅជាសង្គ្រាមទ្រង់ទ្រាយធំ ។ ពេលថ្មីៗនេះប៉ាគីស្ថាន បានប្រកាសថា ទាហានរបស់ខ្លួនបានបាញ់សម្លាប់ទាហានឥណ្ឌា ៦នាក់ ។
នៅពេលនេះ រដ្ឋមន្ត្រីក្រសួងការពារជាតិអាមេរិក លោក Mark Esper បានបញ្ជាក់ថា តំបន់កាស្មៀរ គឺជាបញ្ហាផ្ទៃក្នុងរបស់ឥណ្ឌា ហើយរាល់បញ្ហាពាក់ព័ន្ធ រវាងឥណ្ឌា និង ប៉ាគីស្ថាន គឺត្រូវតែដោះស្រាយ ដោយសន្តិភាព តាមរយៈកិច្ចពិភាក្សាទ្វេភាគីរបស់ប្រទេសទាំងពីរ ។
នៅថ្ងៃទី២១ ខែសីហា រដ្ឋមន្ត្រីក្រសួងការពារជាតិអាមេរិក លោក Mark Esper មានជំនួបពិភាក្សាជាមួយសមភាគីឥណ្ឌា លោក Rajnath Singh ដោយភាគីទាំងពីរបានសន្យាថា នឹងបង្កើនកិច្ចសហប្រតិបត្តិការការពារជាតិទ្វេភាគី ។
នៅក្នុងជំនួបពិភាក្សាតាមទូរស័ព្ទនោះ រដ្ឋមន្ត្រីក្រសួងការពារជាតិទាំងពីរ បានពិភាក្សាផ្ដោតយ៉ាងសំខាន់ទៅលើកិច្ចសហប្រតិបត្តិការ ស្រាវជ្រាវ និងអភិវឌ្ឍ ក្នុងវិស័យយោធាអាមេរិក និង ឥណ្ឌា ។ ពាក់ព័ន្ធនឹងបញ្ហាកាស្មៀរ លោក Esper បញ្ជាក់ថា នេះគឺជាបញ្ហាផ្ទៃក្នុងរបស់ឥណ្ឌា និងប៉ាគីស្ថាន ហើយភាគីទាំងពីរ ចាំបាច់ត្រូវតែដោះស្រាយ ដោយកិច្ចការបរទេស ។
មន្ត្រីការពារជាតិ នៃប្រទេសទាំងពីរ បានបង្ហាញពីការពេញចិត្តយ៉ាងខ្លាំង ចំពោះអ្វីដែលអាមេរិក និងឥណ្ឌា បានរួមគ្នាធ្វើ ។ ក្រៅពីនេះ ប្រទេសទាំងពីរ មានគម្រោងធ្វើសមយុទ្ធរួមគ្នា នៅចុងឆ្នាំ២០១៩នេះ ក៏ដូចជា រៀបចំកិច្ចពិភាក្សា ២+២ រវាងរដ្ឋមន្ត្រីការបរទេស និងការពារជាតិ ឥណ្ឌា អាមេរិក ។
ស្ថានការណ៍តានតឹងកំពុងកើនកម្លៅឡើងយ៉ាងខ្លាំង រវាងប្រទេសទាំងពីរ កាលពីអំឡុងពេលថ្មីៗនេះ រហូតមានការបាញ់ប្រហារគ្នាទៅវិញទៅមកជាច្រើនដង នៅតំបន់ព្រំដែនស ស្ថិតក្នុងទឹកដីកាស្មៀរ ។ បន្ទាប់ពីមានការបាញ់ប្រហារគ្នានោះមក រដ្ឋាភិបាលប៉ាគីស្ថាន និង ឥណ្ឌាបន្ទោសគ្នាទៅវិញទៅមក លើការរំលោភបទឈប់បាញ់ ដែលបានព្រមព្រៀង ក្រោយស្ថានការណ៍តានតឹង កាលពីអំឡុងខែកុម្ភៈ និងខែមីនា ។
អ្នកនាំពាក្យ នៃកងកម្លាំងប្រដាប់អាវុធប៉ាគីស្ថាន លោកឧត្តមសេនីយ៍ទោ Asif Ghafoor បានថ្លែងថា កម្លាំងយោធាបានឆ្លើយតបតាមរបៀប ដែលសមនឹងការរំលោភបទឈប់បាញ់ ស្ថិតនៅ Tatta Pani ជិតតំបន់ស (Line of Control) ដែលពួកទាហានឥណ្ឌាបានរំលោភបំពាន ។ យោងតាមលោក Ghafoor បានបញ្ជាក់ថា ការផ្ទុះអាវុធនោះ បានធ្វើឲ្យទាហានឥណ្ឌា៦នាក់ ក្នុងនោះមានមន្ត្រីម្នាក់ផងដែរ ត្រូវបានសម្លាប់ និងលេណដ្ឋានចំនួន២កន្លែង ត្រូវបានបំផ្លាញ ដោយការឆ្លើយតបពីភាគីប៉ាគីស្ថាន ។
ជាមួយគ្នានេះដែរ អ្នកនាំពាក្យយោធាប៉ាគីស្ថាន បានចោទប្រកាន់ថា កងកម្លាំងយោធាឥណ្ឌា បានរំលោភបំពានលើបទឈប់បាញ់ ទើបបណ្តាលឲ្យស្លាប់ជនស៊ីវិល៣នាក់ ក្នុងនោះមានម្នាក់ជាក្មេងប្រុសអាយុ៧ឆ្នាំ ។
ទោះជាយ៉ាងណា ភាគីឥណ្ឌា នៅមិនទាន់ឆ្លើយតបចំពោះការលើកឡើងរបស់ប៉ាគីស្ថាន ជុំវិញការបាញ់ប្រហារគ្នា នោះឡើយ ។ ពាក់ព័ន្ធការរំលោភបំពានបទឈប់បាញ់នោះដែរ ទីក្រុងអិស្លាម៉ាបាដ បានកោះហៅមន្ត្រីទូតជាន់ខ្ពស់ឥណ្ឌា ប្រចាំនៅប៉ាគីស្ថាន គឺឧត្តមស្នងការរង Gaurav Ahluwalia ថ្កោលទោសចំពោះសកម្មភាពរបស់ទីក្រុងញូវដេលី ។
ដោយឡែកមន្ត្រីយោធាឥណ្ឌា បានថ្លែងថា ប៉ាគីស្ថានបានរំលោភបំពាលលើបទឈប់បាញ់ នៅតំបន់ Krishna Ghati ស្ថិតនៅក្នុងស្រុក Poonch ខេត្ត Jammu និង Kashmir កាលពីថ្ងៃទី២០ ខែសីហា ដោយប្រើប្រាស់អាវុធធុនតូច និងគ្រាប់កាំភ្លើងត្បាល់បាញ់ប្រហារ ។ យោងតាមមន្ត្រីនោះ ការវាយប្រហារ បានសម្លាប់ទាហានម្នាក់ និងរបួស៤នាក់ ៕
