សារព័ត៌មាន នគរវត្ត តែងតែនាំមុខគេជានិច្ច
មកទល់ពេលនេះ មានការផ្ទុះអាវុធ ជាលើកដំបូង ដោយកម្លាំងទាហានឥណ្ឌា បានវាយប្រហារទៅលើ ជនសង្ស័យថាជាក្រុមឧទាមលាក់ខ្លួននៅក្នុង តំបន់នេះដើម្បីបង្កអសន្តិសុខ ។
កម្លាំងប៉ូលិសឥណ្ឌា បានថ្លែងថា កងកម្លាំងសន្តិសុខ បានបាញ់សម្លាប់ក្រុមសង្ស័យជាពួកឧទ្ទាមចំនួន២នាក់ នៅក្នុងការប្រយុទ្ធគ្នាមួយ ស្ថិតនៅតំបន់កាស្មៀរ នៅថ្ងៃទី២១ ខែសីហា ឆ្នាំ២០១៩ នេះ ។ ការប៉ះទង្គិចគ្នាជាលើកដំបូងនេះ បានកើតឡើង ក្រោយពេលរដ្ឋាភិបាលសហព័ន្ធបានប្រកាសដកសិទ្ធិស្វ័យភាព ពីតំបន់កាស្មៀរ កាលពីដើមខែសីហា ឆ្នាំ២០១៩ ហើយបញ្ហានេះ នាំឲ្យបញ្ឆេះនូវការខឹងសម្បាយ៉ាងខ្លាំង ពីប្រជាពលរដ្ឋ រស់នៅក្នុងតំបន់នេះ ។
ប្រភពពព័ត៌មានដដែល បានបន្តថា ប៉ូលិស២នាក់បានរងរបួស នៅក្នុងការប្រយុទ្ធគ្នា ដែលបានកើតឡើង នៅតំបន់ Baramulla នាភាគខាងជើងកាស្មៀរ ហើយក្នុងនោះមានម្នាក់ ក្នុងចំណោមពួកគេបានបាត់បង់ជីវិត បន្ទាប់ពីបញ្ជូនដល់មន្ទីរពេទ្យ ។
ក្រុមឧទ្ទាមដែលប្រយុទ្ធប្រឆាំងនឹងការគ្រប់គ្រងរបស់ឥណ្ឌា នៅតំបន់ដែលជនមូស្លីមរស់នៅភាគច្រើន កាស្មៀរនោះ បានប្តេជ្ញាតស៊ូ ដោយកម្លាំងប្រដាប់អាវុធបន្ដទៀត ។ ការប្តេជ្ញានេះ បានកើតឡើង ក្រោយពេលរដ្ឋាភិបាលរបស់លោកនាយករដ្ឋមន្ត្រី Narendra Modi បានសម្រេចលុបចោលសិទ្ធិស្វ័យភាព និងការរឹតបន្តឹងលើការទិញអចលនទ្រព្យ ។ ក្រៅពីនេះ រដ្ឋាភិបាលអនុញ្ញាតឲ្យប្រជាជនរស់នៅរដ្ឋខាងក្រៅ អាចចូលមកទិញអចលនទ្រព្យ ឬមកបម្រើការជាបុគ្គលិករដ្ឋាភិបាលក្នុងតំបន់នោះបាន ដោយពុំមានខុសទាស់អ្វីឡើយ ។
បាតុកម្មតវ៉ាបានផ្ទុះឡើង នៅទីក្រុងដ៏សំខាន់ Srinagar របស់កាស្មៀរ ហើយក៏មានការប្រឆាំងជំទាស់យ៉ាងស្រួចស្រាវ ពីប្រទេសប៉ាគីស្ថាន ចំពោះសកម្មភាពរបស់រដ្ឋាភិបាលឥណ្ឌា នៅតំបន់កាស្មៀរនេះ ។ ប៉ាគីស្ថានដែលទាមទារគ្រប់គ្រងផ្នែកខ្លះ នៃដែនដីកាស្មៀរ និងជាសត្រូវរបស់ឥណ្ឌានោះ បាននិយាយថា ខ្លួនអាចនឹងលើកជម្លោះដ៏រ៉ាំរ៉ៃ រាប់ទសវត្សរ៍នេះ ឡើងទៅកាន់តុលាការយុត្តិធម៌អន្តរជាតិ ។
ឥណ្ឌា បានបន្ថែមកងកម្លាំងយោធារបស់ខ្លួន រាប់ពាន់នាក់ បទៅដាក់ពង្រាយ នៅលើដែនដីកាស្មៀរ ដើម្បីគ្រប់គ្រងក្រុមបះបោរ ហើយកាលពីយប់ ថ្ងៃទី២០ ខែសីហា ក្រុមឧទ្ទាមបានលួចវាយឆ្មក់ «នៅផ្នែកអតីតតំបន់ Baramulla ។ នេះបើតាមមន្ត្រីប៉ូលិសមួយរូប បានបញ្ជាក់ប្រាប់សារព័ត៌មាន រ៉យទ័រ ។ ក្រុមឧទ្ទាមបានបោកគ្រាប់បែកដៃមួយគ្រាប់ បណ្តាលឲ្យប៉ូលិស២នាក់រងរបួស៕
