សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ករណីគ្រោះថ្នាក់ចរាចរណ៍មួយបានកើតឡើង ដោយសារតែបុរសម្នាក់បានបើក រថយន្តសាំងយ៉ុង ដាច់ហ្វ្រាំងរេចង្កូតទៅបុកបង្កោលភ្លើងបំភ្លឺផ្លូវបាក់អស់មួយដើម ហើយរងការខូចខាតផ្នែកខាងមុខយ៉ាងដំណំ តែមិនបណ្ដាលឲ្យមានអ្នករបួសនោះទេ ។
ហេតុការណ៍នេះ បានកើតឡើងកាលវេលាម៉ោង១០និង០០នាទីថ្ងៃទី២៩ ខែសីហា ឆ្នាំ២០១៩ ស្ថិតនៅតាមបណ្ដោយផ្លូវ២៩៦ កែងនឹងផ្លូវមុនីរ៉េត សង្កាត់ទូលស្វាយព្រៃ២ ខណ្ឌបឹងកេងកង រាជធានីភ្នំពេញ ។
សមត្ថកិច្ចបានឲ្យដឹងថា អ្នកបើកបរមានឈ្មោះ កែវ នាង អាយុ៣៨ឆ្នាំ មុខរបរ បើកបរ ស្នាក់នៅ ភូមិថ្នល់កែង ឃុំកណ្ដៀងរាយ ស្រុកស្វាយទាប ខេត្តស្វាយរៀង ។
តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តមួយគ្រឿងម៉ាក សាំងយ៉ុង ពណ៌ស ពាក់ស្លាកលេខ កណ្ដាល 2A-0984 បើកបរដោយបុរសម្នាក់ ធ្វើដំណើរតាមបណ្ដោយផ្លូវ២៩៦ ក្នុងទិសដៅពីកើតទៅលិច ខណ:មកដល់កន្លែងកើតហេតុ ឡានដាច់ហ្រ្វាំង បានរេចង្កូតទៅបុកបង្គោលភ្លើងដែកបំភ្លឺផ្លូវ បាក់អស់មួយដើម ចំណែករថយន្តរងការខូចខាតយ៉ាងដំណំ សំណាងមិនបណ្ដាលឲ្យមានអ្នករបួស ។
ក្រោយកើតហេតុ សមត្ថកិច្ចមូលដ្ឋានបានមកដល់កន្លែងកើតហេតុ និងទំនាក់ទំនងនងទៅសមត្ថកិច្ចជំនាញចរាចរណ៍ចុះមកវាស់វែងយករថយន្តបង្កទៅរក្សាទុកនៅការិយាល័យចរាចរណ៍ជើងគោក នៃស្នងការដ្ឋាន នគរបាលរាជធានីភ្នំពេញរង់ចាំដោះស្រាយនៅពេលក្រោយ ៕ សរស្មី
