សារព័ត៌មាន នគរវត្ត តែងតែនាំមុខគេជានិច្ច
ការដាក់ទណ្ឌកម្មរបស់អាមេរិក បានជះឥទ្ធិពលយ៉ាងខ្លាំងដល់សេដ្ឋកិច្ចរបស់អ៊ីរ៉ង់ ប៉ុន្តែរដ្ឋាភិបាលអ៊ីរ៉ង់ មិនដែលចុះញមអាមេរិកនោះឡើយ ។ អាមេរិកបានបង្ហាញពីគោលបំណងចង់ពិភាក្សាជាមួយអ៊ីរ៉ង់ ប៉ុន្តែអ៊ីរ៉ង់ មិនចង់ពិភាក្សាជាមួយអាមេរិក ដោយគ្មានលក្ខខណ្ឌនោះឡើយ ។
ពេលថ្មីនេះ ប្រធានាធិបតីអ៊ីរ៉ង់បានបញ្ជាក់ថា បើអាមេរិកលុបទណ្ឌកម្មនោះអ៊ីរ៉ង់និងពិភាក្សា ប៉ុន្តែបើអាមេរិក នៅតែបន្តរក្សាទណ្ឌកម្មអ៊ីរ៉ង់នឹងមិនពិភាក្សា ស្វែងរកដំណោះស្រាយណាមួយនោះឡើយ ។ នៅថ្ងៃទី២៨ខែស៊ីហា ប្រធានាធិបតី អ៊ីរ៉ង់ លោក Hassan Rouhani បានអំពាវនាវដល់ពលរដ្ឋសមគ្គីដើម្បីឆ្លងផុតវិបត្តិសេដ្ឋកិច្ច ដែលអាមេរិកជាអ្នកបង្កឡើង ។
មានប្រសាសន៍តាមកញ្ជក់ទូរទស្សន៍ លោក Rouhani បានប្រកាសថា«យើងចាំបាច់ត្រូវតែសគ្គីតស៊ូដើម្បី ទទួលបានជ័យជំនះនៅក្នុងសង្គ្រាមសេដ្ឋកិច្ច ដែលអាមេរិក ជាអ្នកផ្តើមដើម្បីប្រឆាំងអ៊ីរ៉ង់ ។ អ៊ីរ៉ង់នឹងប្រើប្រាស់ទំនាក់ទំនងការបរទេសដើម្បីដោះស្រាយវិវាទទាំងនោះ ។
កន្លងមក ប្រធានាធិបតីអ៊ីរ៉ង់បានបញ្ជាក់ថា ការដាក់ទណ្ឌកម្មរបស់អាមេរិកទៅលើអ៊ីរ៉ង់ គឺជាសង្គ្រាមសេដ្ឋកិច្ចដែលអាមេរិកបង្កឡើង ទៅលើប្រទេសអ៊ីរ៉ង់ ។ ភាពតានតឹងរវាងអាមេរិកនិងអ៊ីរ៉ង់ កើតឡើង ក្រោយពេលដែល លោកត្រាំ ដកអាមេរិកចេញពីកិច្ចព្រមព្រៀង បរមាណូនៅឆ្នាំ២០១៥ ហើយបង្កើនការដាក់ទណ្ឌកម្មជាថ្មីទៅលើប្រទេសអ៊ីរ៉ង់ ។
នៅពេលនេះដែរ អ៊ីរ៉ង់ នឹងបញ្ជូនប្រធានការិយាល័យប្រធានាធិបតីអ៊ីរ៉ង់ លោក Mahmoud Vaezi ទៅកាន់ប្រទេសបារាំង នៅសប្តាហ៍ខាងមុខដើម្បីពិភាក្សាលើបញ្ហាជាច្រើនដែលពាក់ព័ន្ធ ក្នុងនោះមានទាំងទណ្ឌកម្មទៅលើអ៊ីរ៉ង់ផងដែរ ។ បារាំងជាប្រទេសនាំមុខនៅក្នុងការ ស្វែងរកដំណោះស្រាយបញ្ចប់ភាពតានតឹង ជាមួយអ៊ីរ៉ង់ ៕
