សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្តដឹកខ្សាច់បត់ឆ្វេងចូលការដ្ឋានដោយខ្វះការប្រុងប្រយ័ត្នជ្រុលទៅបុកម៉ូតូពេញទំហឹង បណ្ដាលឲ្យយុវជនជានិស្សិតម្នាក់ស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង ៣និង២០នាទី ទៀបភ្លឺ ឈានចូលថ្ងៃអង្គារ ទី០៣ ខែកញ្ញា ឆ្នាំ២០១៩ នៅតាមបណ្ដោយផ្លូវ ៣៧១ ស្ថិតក្នុងសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។
សពជនរងគ្រោះមានឈ្មោះ ជា វិសាល អាយុ ២១ឆ្នាំ ជានិស្សិតឆ្នាំទី២ នៃវិទ្យាស្ថានជាតិបណ្ដុះបណ្ដាលបច្ចេកទេស ជំនាញសំណង់សុីវិល ស្នាក់នៅសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ មានស្រុកកំណើតនៅ ភូមិរំចេក៣ ឃុំរតនះ ស្រុកស្វាយប៉ោ ខេត្តបាត់ដំបង ។
តាមប្រភពព័ត៌មានពីអ្នកឃើញហេតុការណ៍បានឲ្យដឹងថាមុនពេលកើតហេតុគេបានឃើញយុវជនខាងលើ ជិះម៉ូតូមួយគ្រឿងម៉ាកសង់C125 ស៊េរីឆ្នាំ2019 ពណ៌ខ្មៅ ពាក់ស្លាក បាត់ដំបង 1L-5856 ជិះតែម្នាក់ឯងធ្វើដំណើតាមបណ្តោយផ្លូវ៣៧១ ទិសដៅពីកើតទៅលិច ក្នុងល្បឿនធម្មតា ខណៈមកដល់ចំណុចកើតហេតុក៏មានរថយន្តបែនដឹកខ្សាច់ធន់ធំមួយគ្រឿង មិនចាំស្លាកលេខធ្វើដំណើរស្របទិសគ្នាជាមួយម៉ូតូរងគ្រោះ ក្នុងល្បឿនលឿនក៏ជ្រុលទៅបុកម៉ូតូរងគ្រោះពីក្រោយពេញទំហឹងបណ្តាលឲ្យដួលបោកក្បាលស្លាប់ភ្លាមៗ ជាប់សពជនរងគ្រោះនឹងម៉ូតូ នៅនឹងកន្លែងកើតហេតុ ភ្លាមៗនោះដែររថយន្តបង្កខាងលើបានបត់ឆ្វេងចូលទៅក្នុងការដ្ឋានសំណង់មួយកន្លែងនៅក្បែរកន្លែងកើតហេតុនោះ មួយសន្ទុះក្រោយក៏បើកចេញមកវិញគេចខ្លួនបាត់ស្រមោលទៅដោយសុវត្ថិភាព ។
ក្រោយកើតហេតុ សមត្ថកិច្ចមូលដ្ឋានក៏ដូចជាសមត្ថកិច្ចជំនាញចរាចរណ៍បានចុះដល់កន្លែងកើតហេតុ រួចធ្វើការវាស់វែងយកម៉ូតូជនរងគ្រោះទៅរក្សាទុកនៅអធិការដ្ឋាន នគរបាល ខណ្ឌមានជ័យ និងធ្វើកំណត់ហេតុប្រគល់សពឲ្យទៅសាច់ញាតិដឹកយកទៅធ្វើបុណ្យតាមប្រពៃណីនៅសំបួរមាស៕ ភារ៉ា ដង្កោ
