សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យុវជន២នាក់ ម៉ូតូទៅបុកនឹងម៉ូតូរបស់សមត្ថកិច្ច ត្រង់ចំណុចគោលដៅប្រចាំការ ស្តុប២៤ម៉ោង បណ្តាលឲ្យរងរបួសធ្ងន់ទាំង២នាក់។ហេតុការណ៍នេះបានកើតឡើង នៅម៉ោង១ និង១០នាទីយប់ រំលងអធ្រាត្រឈានចូលថ្ងៃទី៥ ខែកញ្ញា ឆ្នាំ២០១៩ លើផ្លូវហាណូយ កែងផ្លូវសម្ដេចជាស៊ីម ស្ថិតក្នុងសង្កាត់ឃ្មួញ ខណ្ឌសែនសុខ ។
សមត្ថកិច្ចបានឲ្យដឹងថាម៉ូតូជនបង្កម៉ាក Duck-KTM 200 ពណ៌ខ្មៅ លាយក្រហម ពាក់ស្លាកលេខភ្នំពេញ 1FF-1792 បើកតាមផ្លូវសម្ដេចជាស៊ីមក្នុង ទិសដៅពីកើតមកលិច បានមកបុកម៉ូតូម៉ាក FTR ពណ៌ខៀវ ពាក់ស្លាកលេខ នគរបាល 1.7595 របស់សមត្ថកិច្ចពីក្រោយពេញទំហឹង ប៉ើងខ្ទាតទាំងម៉ូតូទាំងមនុស្សបោកនឹងថ្នល់ទាំងបីនាក់ និងប៉ះម៉ូតូធំមួយគ្រឿងទៀត ម៉ាក XR ពណ៌ខ្មៅ ពាក់ស្លាកលេខនគរបាល 1-9116 របស់សមត្ថកិច្ច ដែលចតទុកចោលលើចិញ្ចើមផ្លូវ បណ្តាលឲ្យយុវជនទាំង២នាក់នោះរងរបួសធ្ងន់ត្រូវបានរថយន្ត សង្គ្រោះដឹកទៅព្យាបាលនៅមន្ទីរពេទ្យភ្លាមៗ ។
បន្ទាប់ពីកើតហេតុកម្លាំងសមត្ថកិច្ចនគរបាលខណ្ឌសែនសុខ បានចុះមកវាស់វែង និងយកម៉ូតូទាំង៣គ្រឿង ទៅរក្សាទុកបណ្ដោះអាសន្ន រង់ចាំដោះស្រាយគ្នានៅពេលក្រោយ ៕ ជ្រោយពេជ្រ
