សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតី ដូណាល់ ត្រាំ ចង់ជួបលោក គីមជុង អ៊ុន ក្នុងឆ្នាំនេះ ដើម្បីឈានដល់កិច្ចព្រមព្រៀង រំសាយអាវុធ បរមណូ។ កន្លងមក ប្រធានាធិបតីដូណាល់ ត្រាំ បានលើកឡើងថា ទីប្រឹក្សាសន្តិសុខជាតិ John Bolton បានប៉ះពាល់ដល់ មេដឹកនាំ គីម ជុងអ៊ុន ។
ការដកលោក John Bolton របស់ប្រធានាធិបតី អាមេរិក ក្នុងគោលដៅ ធ្វើឲ្យប្រសើរឡើងវិញ នៅក្នុងទំនាក់ទំនង ជាមួយកូរ៉េខាងជើង ក៏ដូចជាអ៊ីរ៉ង់ ។ លោក Bolton ប៉ះពាល់ដល់មេដឹកនាំ កូរ៉េខាងជើង គឺ ដោយលោកចង់ឲ្យលោកគីមជុង អ៊ុន ដើរតាមកន្លង របស់ប្រទេស លីបី ដឹកនាំដោយ លោកហ្គាដាហ្វី ។ សកម្មភាពរបស់លោក Bolton បានធ្វើឲ្យមេដឹកនាំកូរ៉េខាងជើង ខឹងសម្បាយ៉ាងខ្លាំង ។
ក្រុមអ្នកឯកទេសវិភាគបានលើកឡើងថា ប្រធានាធិបតីអាមេរិក ដូណាលត្រាំ ចង់ ជំរុញ កិច្ចពិភាក្សា បញ្ចាប់វិវាទ ទាំងជាមួយ កូរ៉េខាងជើងពាក់ព័ន្ធកម្មវិធីបរមាណូ ក៏ដូចជាសង្គ្រាមពាណិជ្ជកម្មជាមួយចិន ដើម្បីពង្រឹងការគាំទ្រសម្រាប់បោះឆ្នោត ប្រធានាធិបតីអណត្តិទីពីរ របស់លោកនៅឆ្នាំ២០២០។
នៅពេលនេះប្រធានាធិបតីអាមេរិក ដូណាល់ ត្រាំង បានប្រកាសថា លោក បានត្រៀមលក្ខណជួបពិភាក្សាជាមួយ មេដឹកនាំ កូរ៉េខាងជើង គីម ជុងអ៊ុន ក្នុងពេលវេលាសមស្រប នៅក្នុងឆ្នាំ២០១៩នេះ។
ពេលថ្មីៗនេះ រដ្ឋលេខាធិកាក្រសួងការបរទេសកូរ៉េខាងជើង លោកស្រី Choe Son Hui បានបញ្ជាក់ថា ទីក្រុងព្យុងយ៉ាងត្រៀមលក្ខណតភ្ជាប់កិច្ចពិភាក្សា ជាមួយអាមេរិក ស្តីពីការរំសាយអាវុធបរមាណូ នៅចុងខែកញ្ញានេះ ។
ការប្រកាសខាងលើរបស់ អាមេរិក និងកូរ៉េខាងជើង ស្តីពី គោលបំណងពិភាក្សាស្តីពីការរំសាយអាវុធបរមាណូ អាចនឹងធ្វើឡើងក្នុងពេលឆាប់ ក្នុងនោះមានជំនួបជាន់ខ្ពស់ រវាង ប្រធានាធិបតី ត្រាំ និងគីម ជុង អ៊ុនផងដែរ ក្រោយពេល លោកត្រាំ ដកដំណែងទីប្រឹក្សា ដែល មាន ទស្សនៈ នយោបាយប្រឆាំងកូរ៉េខាងជើង គឺលោក John Bolton ។ លោក Bolton គឺជាការរាំងស្ទះ នៃកិច្ចពិភាក្សាពីកម្មវិធីបរមាណូ។
ក្នុងរយៈ ពេលពីថ្ងៃទី១២ ខែមិថុនា ឆ្នាំ ឮ២០១៨ មកទលពេលនេះ ប្រធានាធិបតី អាមេរិក ដូណាល់ ត្រាំ និងមេដឹកនាំ គីម ជុងអ៊ុន បានជួបពិភាក្សាគ្នា ៣លើករួមមកហើយ ។ ជំនួបលើកទី៤នឹងត្រូវធ្វើឡើងក្នុងពេលឆាប់ៗនេះ ក្រោយពេល ដែល លោកត្រាំដកដំណែង ទីប្រឹក្សាសន្តិសុខជាតិ John Bolton ។ លោកBolton ធ្លាប់បានស្នើគម្រោងប្រើប្រាស់កម្លាំងយោធា ទៅលើកូរ៉េខាងជើង ដើម្បីបញ្ចប់កម្មវិធីបរមាណូនៅក្នុងប្រទេស នេះ។ លោកBolton ក៏ជាអ្នកទទួលខុសត្រូវ នៅជំនួបបរាជ័យកាលពីថ្ងៃទី២៨ ខែកុម្ភៈ ឆ្នាំ២០១៩ នៅទីក្រុងហាណូយ ប្រទេសវៀតណាម ដោយមិនមានកិច្ចព្រមព្រៀង ។
កាលពីថ្ងៃទី១២ ខែកញ្ញា ចិនបានទទូចសុំឲ្យសហរដ្ឋអាមេរិក ចាប់ផ្តើមការពិភាក្សាជាមួយកូរ៉េខាងជើងឡើងវិញ ដើម្បីជាការឆ្លើយតបទៅនឹងសុច្ឆន្ទៈរបស់កូរ៉េខាងជើង ក្នុងការចង់បន្តកិច្ចពិភាក្សា អំពីការរំសាយអាវុធនុយក្លេអ៊ែរ។ ចិនបានស្នើជាថ្មីម្តងទៀតឲ្យបន្ធូរបន្ថយទណ្ឌកម្មរបស់អង្គការសហប្រជាជាតិ សម្រាប់រដ្ឋាភិបាលទីក្រុងព្យុងយ៉ាង។
កូរ៉េខាងជើង បាននិយាយ កាលពីថ្ងៃចន្ទ ទី៩ ខែកញ្ញា ដើមសប្ដាហ៍នេះ ថា ខ្លួនមានឆន្ទៈក្នុងការចាប់ផ្តើមកិច្ចចរចា ស្ដីអំពីកម្មវិធីនុយក្លេអ៊ែររបស់ខ្លួនជាមួយសហរដ្ឋអាមេរិក នៅចុងខែកញ្ញា នេះ។
ថ្លែងនៅក្នុងទីក្រុងប៉េកាំង ប្រមុខការទូតរបស់ចិន លោក វ៉ាងយី សមាជិកក្រុមប្រឹក្សារដ្ឋ បាននិយាយថា ប្រទេសចិនបានស្វាគមន៍“ សញ្ញាវិជ្ជមាន” ថ្មីៗរបស់ប្រទេសកូរ៉េខាងជើង ស្តីពីការបន្តកិច្ចពិភាក្សាជាមួយសហរដ្ឋអាមេរិក។
លោក វ៉ាង បានថ្លែង នៅក្នុងសន្និសីទសារព័ត៌មានរួមគ្នាជាមួយរដ្ឋមន្រ្តីការបរទេសម៉ាឡេស៊ី សាហ្វីឌិនអាប់ឌុល ថា “ យើងរីករាយដែលបានឃើញកូរ៉េខាងជើង និងសហរដ្ឋអាមេរិក បន្តកិច្ចពិភាក្សាឡើងវិញ តាមកាលវិភាគ នៅចុងខែនេះ”។ យើងសង្ឃឹមថា សហរដ្ឋអាមេរិកក៏អាចចាត់វិធានការជាក់ស្តែង ក្នុងបញ្ហានេះ និងធ្វើកិច្ចខិតខំប្រឹងប្រែង ដើម្បីបន្ធូរបន្ថយនូវភាពតានតឹងនេះផងដែរ។
លោក វ៉ាង បានបន្ដថា យើងជឿជាក់ថា ក្រុមប្រឹក្សាសន្តិសុខសហរដ្ឋអាមេរិក គួរតែពិចារណា បើកការពិភាក្សា អំពីដំណោះស្រាយដំណោះស្រាយទណ្ឌកម្មរបស់កូរ៉េខាងជើង ដើម្បីជួយឲ្យប្រទេសកូរ៉េខាងជើង អាចកាត់បន្ថយនូវការលំបាក។
ប្រទេសចិន ជាអ្នកគាំទ្រសេដ្ឋកិច្ច និងការទូតដ៏សំខាន់បំផុតរបស់កូរ៉េខាងជើងហើយលោក វ៉ាង ក៏បានធ្វើទស្សនកិច្ច នៅទីក្រុងព្យុងយ៉ាង កាលពីសប្តាហ៍មុនផងដែរ។
សូមបញ្ជាក់ថា ប្រធានាធិបតីអាមេរិក លោក ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានជួបគ្នានៅតំបន់គ្មានយោធា (DMZ) ពុះចែកប្រទេសកូរ៉េទាំងពីរ កាលពីអំឡុងខែមិថុនា កន្លងទៅនេះ។ ទាំងអាមេរិក និងកូរ៉េខាងជើង ក៏បានយល់ព្រម ចាប់ផ្តើមការចរចាគ្នាឡើងវិញ ជុំវិញការជាប់គាំង ចាប់តាំងពីជំនួបកំពូលលើកទី២ មិនទទួលបានជោគជ័យ រវាងមេដឹកនាំទាំងពីរ នៅប្រទេសវៀតណាម កាលពីខែកុម្ភៈ ដើមឆ្នាំ២០១៩នេះ៕
