សារព័ត៌មាន នគរវត្ត តែងតែនាំមុខគេជានិច្ច
យន្តហោះរបស់ឥណ្ឌា ដែលចង់ធ្វើដំណើរទៅកាន់អឺរ៉ុប និងអាមេរិក គឺត្រូវឆ្លងកាត់ដែនអាកាស របស់ប្រទេស ប៉ាគីស្ថាន បើមិនដូច្នោះទេ នឹងត្រូវហោះផ្លូវវាង យ៉ាងឆ្ងាយ បង្កផលលំបាកយ៉ាងខ្លាំង ដល់អ្នកដំណើរ ។ ពេលថ្មីៗ នេះ ប៉ាគីស្ថានមិនអនុញ្ញាតឲ្យយន្តហោះដឹកនាយករដ្ឋមន្ត្រីឥណ្ឌាហោះហើរឆ្លងកាត់ដែនអាកាសរបស់ខ្លួន ដោយសារតែវិបត្តិនៅតំបន់កាស្មៀរ ។
ក្រសួងការបរទេសប៉ាគីស្ថាន បានប្រកាសថា រដ្ឋាភិបាលបានបដិសេធសំណើរបស់នាយករដ្ឋមន្ត្រីឥណ្ឌា លោក Narendra Modi សុំការអនុញ្ញាតហោះហើរឆ្លងកាត់ដែលអាកាសទីក្រុងអ៊ីស្លាមម៉ាបាត ទៅកាន់អាល្លឺម៉ង រួចបន្តទៅអាមេរិក ចូលរួមកិច្ចប្រជុំ អង្គការសហប្រជាជាតិ ។
ក្រសួងការបរទេសប៉ាគីស្ថាននៅថ្ងៃទី១៨ខែកញ្ញា បានប្រកាសថា ប្រទេសនេះបានបដិសេធសំណើរបស់នាយករដ្ឋមន្ត្រីឥណ្ឌា ក្នុងការឆ្លងកាត់ដែនអាកាស ប៉ាគីស្ថាន ។ ការបដិសេធខាងលើរបស់ប៉ាគីស្ថាន គឺ ដោយសារតែភាពតានតឹងនៅក្នុងតំបន់កាស្មៀរ ពិសេសគឺតំបន់គ្រប់គ្រងដោយឥណ្ឌា ក្រោយការដកសិទ្ធិគ្រប់គ្រងស្វ័យភាពនៅក្នុងតំបន់នោះ ។
នៅក្នុងឃ្លីបវីដេអូ របស់ក្រសួងការបរទេសប៉ាគីស្ថាន បានផ្សាយថា រដ្ឋមន្ត្រីក្រសួងការបរទេស Shah Mehmood Qureshi បានលើកឡើងថា ដោយយោងតាមទស្សនៈរបស់រដ្ឋាភិបាលទីក្រុង អីស្លាមម៉ាបាត ស្តីពីស្ថានភាពនៅតំបន់កាស្មៀរ ប៉ាគីស្ថានបានសម្រេច មិនអនុញ្ញាតឲ្យនាយករដ្ឋមន្ត្រីឥណ្ឌាធ្វើដំណើរ ឆ្លងកាត់ដែនអាកាសរបស់ប៉ាគីស្ថាន ។
នេះជាលើកទីពីរហើយនៅក្នុង ខែកញ្ញានេះ ដែលរដ្ឋាភិបាលប៉ាគីស្ថាន បានបដិសេធ ឲ្យយន្តហោះរបស់ ឥណ្ឌាឆ្លងកាត់ដែនអាកាសរបស់ខ្លួន ។ កាលពីដើមខែកញ្ញា ប៉ាគីស្ថានបានបដិសេធ ឲ្យយន្តហោះរបស់ប្រធានាធិបតីឥណ្ឌា ហោះហើរឆ្លងកាត់ដែនអាកាស ដើម្បីទៅកាន់តំបន់អឺរ៉ុប ក្នុងតំណើរទស្សនកិច្ចទៅកាន់ប្រទេស Iceland ស្វិស និង ស្លូវ៉ានៀ៕
