សារព័ត៌មាន នគរវត្ត តែងតែនាំមុខគេជានិច្ច
បុរសម្នាក់បានធ្វើឲ្យជើងហោះហើររបស់ក្រុមហ៊ុនយន្តហោះដឹកអ្នកដំណើរមួយគ្រឿង របស់ក្រុមហ៊ុន អាមេរិកអ៊ែរឡាញ (American Airlines) បានចុះចតជាបន្ទាន់ ខណៈដែលអ្នកដំណើរម្នាក់បាននិយាយថា រូបគេមានផ្ទុកសារធាតុថ្នាំញៀនកាកូអ៊ីន ហើយទៅនៅក្នុងបន្ទប់ទឹកចាក់សោ សម្ងំជក់កញ្ឆា ។
ប្រភពព័ត៌មានបានផ្សាយនៅថ្ងៃទី២២ ខែកញ្ញា ឆ្នាំ២០១៩ថា យន្តហោះអាមេរិកអ៊ែរឡាញនេះដឹកអ្នកដំណើរចាកចេញពីអាកាសយានដ្ឋាន អារីហ្សូណា ទៅកាន់ទីក្រុង មីនីសូតា បានចុះចតជាបន្ទាន់ នៅទីក្រុង ដេនវើរ ក្រោយពីជនសង្ស័យម្នាក់បានប្រាប់គេឯងថា រូបគេមានផ្ទុកសារធាតុថ្នាំញៀនកាកូអ៊ីនក្នុងខ្លួន ហើយបានចូលទៅដាក់គន្លឹះពីខាងក្នុងបន្ទប់ទឹកលើយន្តហោះ រួចសម្ងំជក់កញ្ឆាយ៉ាងរំភើយ ។
សារព័ត៌មាន TMZ បានផ្សាយថា អ្នកដំណើរលើយន្តហោះ ពេលឮសូរដូច្នោះ ក៏មានជ្រួលច្របល់ស្លន់ស្លោពេញយន្តហោះតែម្តង ។ ក្រុមអ្នកបម្រើតាមយន្តហោះបានព្យាយាមចាប់បុរសរូបនេះ ធ្វើឲ្យរូបគេរត់ចូលក្នុងបន្ទប់ទឹកចាក់សោនៅខាងក្នុងអស់រយៈពេលប្រហែល១០នាទី ។
៥នាទីមុនពេលយន្តហោះចុះចតបន្ទាន់ដោយសុវត្ថិភាព, ជននោះបានចេញពីបន្ទាប់ទឹក ហើយដើរទៅអង្គុយនៅកៅអីរបស់ខ្លួន ធ្វើហាក់មិនដឹងរឿងអ្វី ខណៈអ្នកដំណើរដទៃផ្សេងទៀតមានការភ័យស្លន់ស្លោ និងខឹងសម្បាជាខ្លាំង ។ ប៉ូលិសបានទៅដល់ភ្លាមៗ ខណៈដែលយន្តហោះចុះចតបន្ទាន់នោះ បុរសរូបនេះទាញ់កញ្ឆាដែលមូលរួចជាស្រេច និងដែកកេះ ដុតជក់បន្តទៀត ។ អាកាសយានិកបានស្នើអ្នកដំណើរចាកចេញពីយន្តហោះសិន ដើម្បីងាយស្រួលចាប់បុរសជក់កញ្ឆានោះ ដែលប្រុងដាល់អ្នកដំណើរម្នាក់ ។
ប៉ូលិសមិនបានដាក់ខ្នោះដៃជនរូបនោះទេ ដោយសារគេស្រែកទ្រហ៊ោយថា «ដោះវាចេញ វាឈឺ ខ្ញុំនឹងសម្លាប់អ្នក»ជាដើម ។
អ្នកតំណាងឲ្យក្រុមហ៊ុនអាកាសចរណ៍អាមេរិកបានបញ្ជាក់ប្រាប់ប្រភព Fox News កាលពីថ្ងៃសៅរ៍(២១ ខែកញ្ញា)ថា ជើងហោះហើរលេខ ២៤០៨ បានបង្វែរទិសដៅដោយសារតែ“ អ្នកដំណើរជួបការរំខានខាងលើនេះ” ហើយថា នៅពេលដែលយន្តហោះចាកចេញដំណើរ គឺមានការត្រួតពិនិត្យពីកងកម្លាំងអ្នកអនុវត្តច្បាប់ផងដែរ ។
អ្នកនាំពាក្យអាកាសចរណ៍ខាងលើបានថ្លែងអំណរគុណដល់ក្រុមអ្នកបើកយន្ដហោះ ដែលបានយកចិត្តទុកដាក់ចំពោះអ្នកដំណើរដទៃផ្សេងទៀត ក្នុងពេលដែលមានឧប្បត្តិហេតុនេះកើតឡើង ។ ប៉ូលីសទីក្រុង Denver បានប្រាប់ប្រភពព័ត៌មាន TMZ ថា បុរសរូបនោះ មិនត្រូវបានចាប់ខ្លួនទេ ហើយក៏មិនហាមឃាត់ចំពោះការទិញសំបុត្រតាមជើងហោះហើរដទៃទៀតដែរដោយសារតែការរំខាននេះ ។ ប៉ូលិសគ្រាន់តែបានបញ្ជូនជនសង្ស័យទៅកាន់មន្ទីរពេទ្យព្យាបាលប៉ុណ្ណោះ ៕
