សារព័ត៌មាន នគរវត្ត តែងតែនាំមុខគេជានិច្ច
អាមេរិក ក្រោមការដឹកនាំរបស់ ប្រធានាធិបតីដូណាល់ ត្រាំ បានបង្កឲ្យមានវិវាទយ៉ាងខ្លាំង ទាំងនៅក្នុងទឹកដីអាមេរិក និងបណ្តាប្រទេសជុំវិញពិភពលោក ដោយអាមេរិក បានសម្រេចដកខ្លួនចេញពីសន្ធិសញ្ញាទីក្រុងប៉ារីស ស្តីពីបម្រែបម្រួលអាកាសធាតុ។ តាំងពីពេលនោះមករដ្ឋមួយចំនួននៅអាមេរិក ក៏បានអនុវត្តនយោបាយ អាកាសធាតុដាច់ដោយឡែករបស់ខ្លួន។
នៅពេលនេះ ចរាចរណ៍នៅទីក្រុងវ៉ាស៊ីនតោន ឌីស៊ី ជាប់គាំងដោយសារតែបាតុកម្មប្រឆាំង បម្រែបម្រួលអាកាសធាតុ។ កាលពីថ្ងៃទី២៣ ខែ កញ្ញា ពលរដ្ឋអាមេរិក រាប់ពាន់នាក់បាននាំគ្នាធ្វើបាតុកម្មនៅរដ្ឋធានី វ៉ាស៊ីនតោន ឌីស៊ី ដើម្បីអំពាវនាវដល់រដ្ឋាភិបាលឲ្យមានសកម្មភាព ទប់ស្កាត់ បម្រែបម្រួលអាកាសធាតុ។
ក្រុមបាតុករបានប្រមូលផ្តុំគ្នា នៅមហាវិថីសំខាន់ៗនៅ វិមាន Capitol ឆ្ពោះទៅកាន់កណ្តាលរដ្ឋធានី ដូចជា មហាវិថីIndependent មហាវិថី Forida ធ្វើឲ្យផ្លូវថ្នល់ជាច្រើនរងផលប៉ះពាល់យ៉ាងខ្លាំង។ បាតុកម្មកើតឡើងចំពេលមានមនុស្សធ្វើដំណើរច្រើនបន្ទាប់ពីការងារ។
ក្រុមអ្នកប្រឆាំងបម្រែបម្រួលអាកាសធាតុ បានឲ្យដឹងថា បាតុកម្មបានទាក់ទាញមនុស្សជាច្រើនចូលរួម ទាំង មន្ត្រីរដ្ឋការ ពលករ និស្សិត …ដែលមានបំណងប្រឆាំងបម្រែបម្រួលអាកាសធាតុ។កម្លាំងសន្តិសុខអាមេរិក បានដាក់ពង្រាយកម្លាំងប៉ូលិសជាច្រើន ដើម្បីសម្រួលចរាចរណ៍ ក៏ដូចជាស្នើរដល់ពលរដ្ឋប្រើប្រាស់មធ្យោបាយធ្វើដំណើរសាធារណៈ ដើម្បីកាត់បន្ថយការកកស្ទះ។
កន្លងមក កាលពីថ្ងៃទី២០ ខែកញ្ញា ពលរដ្ឋ នៅជុំវិញពិភពលោក រាប់លាននាក់ បាន បានចូលរួមដង្ហែក្បួនបាតុកម្ម ប្រឆាំងបម្រែបម្រួលអាកាសធាតុ ដោយបានអំពាវនាវដល់ បណ្តាមេដឹកនាំមានវិធានការ ទប់ស្កាត់ ការប្រែប្រួលអាកាសធាតុ កម្តៅផែនដីកើនឡើង។តាមគម្រោង នៅសប្តាហ៍ក្រោយនឹងមានបាតុកម្មកើតឡើងដល់ទៅ៥៨០០ កន្លែង នៅក្នុង១៦៣ ប្រទេសជុំវិញពិភពលោក ក្នុងនោះ នៅអាមេរិក មានគម្រោងបាតុកម្ម៨០០ កន្លែង នៅអាល្លឺម៉ង មាន៤០០ កន្លែង…៕
