សារព័ត៌មាន នគរវត្ត តែងតែនាំមុខគេជានិច្ច
ខេត្តឧត្ដរមានជ័យ៖ បុរសវ័យចំណាស់ម្នាក់ត្រូវបានអ្នកភូមិប្រទះឃើញលង់ទឹកស្លាប់ នៅថ្ងៃទី២ ខែតុលា ឆ្នាំ២០១៩ ក្នុងភូមិតាប៉ែន ឃុំពង្រ ស្រុកចុងកាល់ ខេត្តឧត្ដរមានជ័យ ។
សមត្ថកិច្ចបានឲ្យដឹងថា ជនរងគ្រោះឈ្មោះ បួត ផ្លយ ភេទប្រុស អាយុ៥៨ឆ្នាំ រស់នៅភូមិតាប៉ែន ឃុំ ពង្រ ស្រុកចុងកាល់ មុខរបរកសិករ បានលង់ទឹកប្រឡាយនៅខាងកើតផ្ទះរបស់ខ្លួនចម្ងាយ១០០ ម៉ែត្រស្លាប់នៅក្នុងទឹក ។
ក្រោយទទួលព័ត៌មាន កម្លាំងជំនាញបានសហការជាមួយ គ្រូពេទ្យ ចុះដល់កន្លែងកើតហេតុ ត្រួតពិនិត្យសាកសព ឃើញថា ពិតជាស្លាប់ដោយសាលង់ទឹកពិតប្រាកដមែន ។ ស្ថានភាពរបស់សាកសព ត្រូវក្រុមគ្រួសារស្រង់យកមកទុកនៅនឹងតុនៅមុខផ្ទះរបស់សព ។
តាមការបំភ្លឺរបស់ឈ្មោះ ម៉ៅ តី ភេទស្រី អាយុ ៥៩ ឆ្នាំជាប្រពន្ធរបស់សពបានប្រាប់ថា តាំងពីព្រឹកមក ប្តីរបស់ខ្លួនបានផឹកស្រាអស់១លីត្រមកហើយ ក្រោយមកប្តីរបស់គាត់បានសុំទៅយាមស្ពានចម្លងម៉ូតូ ដើម្បីសុំលុយគេ ខ្លួនប្រាប់ថា មិនឲ្យទៅទេ ស្រវឹងហើយ តែប្តីចចេសក៏ដើរទៅ ខ្លួនបានតាមមើលដំណើរប្ដី ដើរទៅប្រហែល ៥០ម៉ែត្រ ក៏បានដើចូលមកផ្ទះវិញ ក្រោយមក ក៏បានឃើញក្មួយឈ្មោះ ម៉ៅ សុផល់ មកសួររកថា មាទៅណា? ខ្លួនបានប្រាប់ថា មាឯងទៅងូតទឹក ក្រោយមកឈ្មោះ ម៉ៅ សុផល បានដើរទៅមើលឃើញលង់ទឹកស្លាប់បាត់ហើយ ។
នៅពេលសមត្ថកិច្ចកោសល្យវិច័យរួចរាល់ក៏បានប្រគល់ឲ្យក្រុមគ្រួសារយកទៅធ្វើបុណ្យទៅតាមប្រពៃណី ៕ ប៉ែន នួន
