សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ជនសង្ស័យម្នាក់ត្រូវបានសមត្ថកិច្ចឃាត់ខ្លួន បន្ទាប់ពីប្រើហិង្សាវាយក្រុមគ្រួសារឲ្យរងរបួស៣នាក់ ខណៈសុំលុយមិនឲ្យ ។
ហេតុការណ៍នេះ បានកើតឡើងកាលពីវេលាម៉ោង៨យប់ ថ្ងៃទី២ ខែតុលា ឆ្នាំ២០១៩ នៅចំណុចភូមិរមាំងទ្រេត ឃុំសំបួរ ស្រុករមាសហែក ខេត្តស្វាយរៀង ។
បើតាមសមត្ថកិច្ចនគរបាលស្រុកបានឲ្យដឹងថា ជនសង្ស័យមានឈ្មោះ មុត កេត អាយុ២៥ឆ្នាំ មុខរបរកសិករ រស់នៅភូមិម្រាមខាងជើង ឃុំម្រាម ស្រុករមាសហែក ខេត្តស្វាយរៀង ។
ចំណែកជនរងគ្រោះមានឈ្មោះទី១-ឈ្មោះយា សុឃី ភេទប្រុស អាយុ១៩ឆ្នាំ ទី២-ឈ្មោះមុត ស៊ឹប ភេទស្រី អាយុ២៩ឆ្នាំ ទី៣-ឈ្មោះមុត សំភាស់ ភេទស្រី អាយុ១៨ឆ្នាំ អ្នកទាំង៣ រស់រស់នៅក្នុងភូមិ ឃុំ ជាមួយគ្នា ។
ប្រភពបន្តថា មុនកើតហេតុ ជនសង្ស័យបានទារលុយម្ដាយឈ្មោះ អ៊ុក ស៊ាន អាយុ៥៨ឆ្នាំ ប៉ុន្តែគាត់មិនឲ្យ ស្រាប់តែពេលយប់ ជនសង្ស័យក៏បានយកព្រនង់ឈើបម្រុងវាយ ក៏ត្រូវកូនៗចូលទៅឃាត់ ទើបមានការប្រទាញប្រទង់ ស្រាប់តែត្រូវជនសង្ស័យវាយសន្ធាប់ទាំង៣នាក់ បង្កការភ្ញាក់ផ្អើលតែម្ដង ។
បច្ចុប្បន្ន ជនរងគ្រោះទាំងបីនាក់ ត្រូវបានក្រុមគ្រួសារ បញ្ជូនមកសង្គ្រោះនៅមន្ទីរពេទ្យបង្អែកស្រុករមាសហែក ។
ចំណែកជនសង្ស័យ ត្រូវបានសមត្ថកិច្ចឃាត់ខ្លួនដើម្បីកសាងសំណុំរឿងចាត់ការតាមច្បាប់ ៕ យឹម សុថាន
