ព័ត៌មានទាន់ហេតុការណ៍៖

ប្រធានាធិបតីហ្វីលីពីន​​ ផ្តល់អាទិភាពជាពិសេសដល់រុស្ស៊ី លើគ្រប់វិស័យ

ចែករំលែក៖

នៅក្នុងវេទិការ ក្រុមហ៊ុន រុស្ស៊ី ហ្វីលីពីន ដែលបានធ្វើឡើងនៅថ្ងៃទី​៤ ខែតុលា ក្នុងទីក្រុងមូស្កូប្រទេសរុស្ស៊ី ​ប្រធានាធិបតី ហ្វីលីពីន​លោក​ Rodrigo Duterte ​​បានបញ្ជាក់ថា រុស្ស៊ី​គឺជាទីផ្សារវិនិយោគ​​ និងពាណិជ្ជកម្ម ដ៏ល្អ ហើយហ្វីលីពីន បានផ្តល់អាទិភាព ជាពិសេស ដល់ ក្រុមហ៊ុនរុស្ស៊ី​។

លោក Duterte ​បញ្ជាក់ថា ទំនាក់ទំនង សេដ្ឋកិច្ច រវាងប្រទេសទាំងពីរ បានអភិវឌ្ឍន៍យ៉ាងល្អ ហើយហ្វីលីពីនពេញចិត្ត​ទៅលើវិស័យពាណិជ្ជកម្មកំពុងតែកើនឡើង ។ កាលពីឆ្នាំ ២០១៨​វិស័យពាណិជ្ជកម្ម ប្រទេសទាំងពីរ មានទឹកប្រាក់ ដល់ទៅ ១៣៦០ លានដុល្លារ ។ លោកបន្តទៀតថា ការដោះដូរពាណិជ្ជកម្មកើនឡើងទ្វេដងបើប្រៀបធៀបនិងឆ្នាំ​២០១៧ ហើយនៅឆ្នាំ​២០១៩ និងបន្តកើនឡើងថែមទៀត​។

នៅក្នុងដំណើរទស្សនកិច្ចនោះ ក្រសួងពាណិជ្ជកម្មប្រទេសទាំងពីរ​ក៏បានចុះហត្ថលេខាង លើកិច្ចព្រមព្រៀងចំនួន​១០ មានតម្លៃ ​រាប់សិបលានដុល្លារ​។ ក្រៅពីនេះ​ រុស្ស៊ី និងហ្វីលីពីន​ ក៏បានព្រមព្រៀង ស្រាវជ្រាវផលិតរោងចក្រអគ្គីសនីដើរដោយថាមពលបរមាណូ អណ្តែតលើទឹក នៅហ្វីលីពីនផងដែរ​។

សារព័ត៌មាន​រុស្ស៊ី​ RIA Novosti ​បានផ្សាយថា រុស្ស៊ីនិងហ្វីលីពីនបានចុះហត្ថលេខា​លើកិច្ចព្រមព្រៀង ស្តីពីការបង្កើតរោងចក្រថាមពលបរមាណូ អគ្គិសនី អណ្តែតលើទឹក ។ ការចុះហត្ថលេខាត្រូវបានធ្វើឡើង​ក្នុងពេលដែល ប្រធានាធិបតីហ្វីលីពីនលោក​ Rodrigo Duterte ​បំពេញទស្សនកិច្ចទៅកាន់ប្រទេសរុស្ស៊ី ។

តាមសារព័ត៌មានខាងលើ  ក្រុមហ៊ុនបរមាណូ​ជាតិរុស្ស៊ី​ Rosatom ​និងក្រសួងថាមពល ហ្វីលីពីន នៅថ្ងៃទី ៤ខែតុលា បានចុះហត្ថលេខាលើកិច្ចព្រមព្រៀង បង្កើតរោងចក្រអគ្គិសនីអណ្តែតទឹកនៅក្នុងប្រទេសហ្វីលីពីន​។

អគ្គនាយកក្រុមហ៊ុន​ Rosatom លោក​ Alexei Likhachev ​បានឲ្យដឹងថា​ រុស្ស៊ីបានលើកឡើងពីគម្រោង​ខាងលើ ជាមួយហ្វីលីពីន ហើយភាគីហ្វីលីពីនក៏បានយលព្រម ។

ហ្វីលីពីនបានសាកសង់រោងចក្រអគ្គិសនីដើរដោយថាមពលបរមាណូ នៅឆ្នាំ​១៩៨០ ដើម្បីបញ្ចប់វិបត្តិកង្វះថាមពលអគ្គិសនី​  ប៉ុន្តែរោងចក្រនោះមិនបានដំណើរការឡើយ​ដោយសារតែខ្លាចជួបនៅគ្រោះមហន្តរាយ​។

រុស្ស៊ីមាន នាវារោងចក្រអគ្គិសនីដើរដោយថាមពលបរមាណូជាច្រើនគ្រឿង ហើយរោងចក្រអគ្គិសនី​បរមាណូ​ Lomonosov ​បានទៅកាន់កំពង់ផែ Pevek ​នៅកោះ​ Chukotka នៅប៉ូលខាងជើងផែនដី​ ដើម្បីផ្គត់ផ្គង់ថាមពលអគ្គិសីដល់តំបន់ ត្រជាក់បំផុត សម្រាប់សកម្មភាព រស់នៅនិងស្រាវជ្រាវរុករកថាមពល​នៅតំបន់នោះ៕


ចែករំលែក៖