គ្រោះថ្នាក់រថយន្ត២គ្រឿងបុកគ្នារបួសធ្ងន់២នាក់

ខេត្តព្រះសីហនុ៖ នៅវេលាម៉ោង៩និង៣០នាទីព្រឹក ថ្ងៃទី៨ ខែតុលា ឆ្នាំ២០១៩ យោងតាមរបាយការណ៍អង្កេតរបស់​នគរបាល​ជំនាញខេត្ត​ព្រះសីហនុ​ឲ្យដឹងថា គ្រោះថ្នាក់ចរាចរណ៍មួយ បង្កដោយ រថយន្តដឹកថ្ម ០១គ្រឿងម៉ាក HYUNDAI ពណ៌ស ពាក់ស្លាក លេខភ្នំពេញ3D-0778 ជាកម្មសិទ្ធក្រុមហ៊ុន R ( អ្នកបើកបរមិនទាន់ស្គាល់អត្តសញ្ញាណ ) មានទិសដៅចូលក្រុងព្រះសីហនុ លុះដល់ចំណុចខាងលើបានបុករុញពីខាងក្រោយរថយន្តចំនួន ០២គ្រឿងទិសដៅស្របគ្នា ៖ ១-រថយន្តម៉ាក TACOMA ពណ៌ ស ពាក់ស្លាក លេខព្រះសីហនុ2A-8409 អ្នកបើកបរឈ្មោះ ឈុន ចេង ភេទ ប្រុស អាយុ ៥៥ឆ្នាំ មុខរបរ សិប្បកម្មកាត់កញ្ចក់ មានទីលំនៅភូមិ៥ សង្កាត់លេខ៤ ក្រុង/ខេត្តព្រះសីហនុ មានអ្នករួមដំណើរចំនួន 0២នាក់អង្គុយខាងក្រោយ ។ ២-រថយន្តម៉ាក IZUZU ពណ៌ ខៀវ ពាក់ស្លាក លេខព្រះសីហនុ 2A-4838 ដឹកទឹកសុទ្ធចន្ទ័រះ អ្នកបើកបរឈ្មោះ សឿ ភេទ ប្រុស អាយុ ៣៩ឆ្នាំ មុខរបរ កម្មករ មានទីលំនៅភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ ។

សមត្ថកិច្ចបញ្ជាក់ថា គ្រោះថ្នាក់នេះ បណ្តាលឲ្យរងរបួសមនុស្សចំនួន ០២នាក់ អ្នករួមដំណើរលើរថយន្តTACOMA ៖ ១-ឈ្មោះ ណៃ ចិន្ដា ភេទ ប្រុស អាយុ ១៥ឆ្នាំ មុខរបរ កម្មករ មានទីលំនៅ ស្រុកទឹកឈូ ខេត្តកំពត រងរបួស ធ្ងន់ ។ ២-ឈ្មោះ លិ ប៊ុនថេង ភេទ ប្រុស អាយុ ១៩ឆ្នាំ មុខរបរ កម្មករ មានទីលំនៅ ស្រុកទឹកឈូ ខេត្តកំពត រងរបួស ធ្ងន់ ។

បច្ចុប្បន្នអ្នករងរបួសទាំងអស់បានបញ្ជូនទៅសង្គ្រោះនៅគ្លីនិកមិត្តភាពឃ្លាំងលើ ចំណែកអ្នកបើកបររថយន្តដឹកថ្ម រត់គេចខ្លួនបាត់ក្រោយពេលកើតហេតុ ។

រីឯវត្ថុតាង រថយន្តចំនួន ០៣គ្រឿង បានយកមករក្សាទុកនៅការិយាល័យនគរបាលចរាចរណ៍ផ្លូវគោក ៕ឆ្លាម សមុទ្រ