សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ អង្ករស្ទើរក្លាយទៅជាបាយទៅហើយ… លោក ឈាង តុលា ប្រធានមន្ទីរកសិកម្ម រុក្ខាប្រមាញ់ និងនេសាទ ដែលជាអ្នករៀបចំចាត់ចែងដាំបាយ ងំទៅហើយថា នឹងបានចាត់ចែងចែកគ្នាស៊ី ប៉ុន្តែបែរជាត្រូវថ្នាក់លើលើកបាយជះចោលទៅវិញ ។ ប្រការនេះមានតែធ្វើឲ្យលោកប្រធានមន្ទីរចងកសម្លាប់ខ្លួនតែប៉ុណ្ណោះ ពីព្រោះ ក្រៅតែពីភាពអាម៉ាស់ ក៏នៅមានបញ្ហាលុយកាក់ដែលភាគីអ្នកទិញបានកក់រាប់សែនដុល្លារ ហើយបានចាយអស់ទៅហើយនោះទៀត? ជម្រើសមានតែចងកប៉ុណ្ណោះ ។
ទីស្តីការគណៈរដ្ឋមន្ត្រីពិតជាបានយកចិត្តទុកដាក់ចំពោះសេចក្តីអំពាវនាវរបស់មន្ត្រីរាជការនៅក្នុងមន្ទីរកសិកម្មខេត្តកំពង់ស្ពឺនោះមែន ។ ទីបំផុត ដីរបស់រដ្ឋនៅក្នុងមន្ទីរកសិកម្មខេត្តកំពង់ស្ពឺច្រើនជាង១០ហិកតា ត្រូវបានរក្សាទុកជាសម្បត្តិរដ្ឋតទៅមុខទៀត ពោលគឺគណៈរដ្ឋមន្ត្រីមិនព្រមតាមលោក ឈាង តុលា ដែលទើបនឹងឡើងធ្វើជាប្រធានមន្ទីរកសិកម្មខេត្តកំពង់ស្ពឺម្ង៉ៃណោះ ឃុបឃិតឲ្យមានការលក់ដូរនោះទេ ។ មន្ត្រីរាជការនៅក្នុងមន្ទីរកសិកម្មខេត្តកំពង់ស្ពឺសាទរចំពោះចំណាត់ការរបស់ទីស្តីការគណៈរដ្ឋមន្ត្រីក្រោមការសម្រេចរបស់នាយករដ្ឋមន្ត្រី ។ គេមិនដឹងថា តើលោកឈាង តុលា និងអ្នកនៅពីក្រោយនៃការឃុបឃិតលក់ដីរដ្ឋជាង១០ហិកតារកងនូវភាពអាម៉ាស់យ៉ាងណានោះទេ ។
គួរបញ្ជាក់ថា ថ្មីៗនេះ ទីស្តីការគណៈរដ្ឋមន្ត្រី បានចេញលិខិតមួយដោយសម្រេចនិរាករណ៍ចោលលិខិតលេខ៨៩៦ សជណ.កធ ចុះថ្ងៃទី២៦ ខែមិថុនា ឆ្នាំ២០១៩ របស់ទីស្តីការគណៈរដ្ឋមន្ត្រី ។
ការសម្រេចនាពេលនេះ គឺ យោងតាមប្រសាសន៍ដ៏ខ្ពង់ខ្ពស់បំផុតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី១៧ ខែតុលា ឆ្នាំ២០១៩ ។
ស.ជ.ណ. របស់ទីស្ដីការគណៈរដ្ឋមន្ដ្រីអំពីសំណើសុំដោះដូរដីមន្ទីរកសិកម្មខេត្តកំពង់ស្ពឺ បានបញ្ជាក់ទៅកាន់រដ្ឋមន្ដ្រីទាំង៣ រូបគឺរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រដ្ឋមន្ដ្រីក្រសួងដែនដី នគរូបនីយកម្ម និងសំណង់ និងរដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសុំគោលការណ៍អនុញ្ញាតធ្វើការអភិវឌ្ឍនៅនឹងកន្លែង។
ស.ជ.ណ. នោះសុំយកដីរបស់មន្ទីរកសិកម្ម រុក្ខាប្រមាញ់ និងនេសាទខេត្ដកំពង់ស្ពឺ ទំហំ១០ ហិកតា ៣១៨៩ ម៉ែត្រការ៉េស្ថិតនៅភូមិចម្ការដូង សង្កាត់ច្បារមន ក្រុងច្បារមន ខេត្ដកំពង់ស្ពឺ។
ស.ជ.ណ. អនុញ្ញាតឲ្យក្រុមហ៊ុន ទូច សារិន ឌីវេឡុបម៉ិន ឯ.ក ធ្វើការអភិវឌ្ឍនៅនឹងកន្លែង ដើម្បីធ្វើបណ្ណកម្មសិទ្ធិជាថ្នូរនឹងការសាងសង់អគារថ្មីរបស់មន្ទីរកសិកម្មខេត្ដកំពង់ស្ពឺលើចំណែកដីទំហំ ១២ ហិកតា ២១០៥ ម៉ែត្រការ៉េ។
ទោះបីយ៉ាងណា ពេលនេះទីស្តីការគណៈរដ្ឋមន្ត្រី សម្រេចនិរាករណ៍ ចោលលិខិតនេះ វិញ ហេីយមហាជន រង់ចាំមេីលថា តេីអាជ្ញាធរពាក់ព័ន្ធនឹងមានចំណាត់ការយ៉ាងដូចម្តេចចំពោះ លោក ឈៀង តុលា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ ដែលកន្លងមក ធ្លាប់អះអាងថា មិនបានដឹងពីគម្រោងដោះដូរដីមន្ត្រីកសិកម្មនេះទេ ៕ចេស្តា
