សារព័ត៌មាន នគរវត្ត តែងតែនាំមុខគេជានិច្ច
នាយករដ្ឋមន្ត្រីប្រទេសកាណាដា លោក ចាស្ទីន ត្រូដូ (Justin Trudeau) នឹងឈ្នះការបោះឆ្នោតសភា ហើយបន្តដឹកនាំរដ្ឋាភិបាលថែមមួយអាណត្តិទៀតជាមួយរដ្ឋាភិបាលជនជាតិភាគតិច ។
គណបក្សសេរីរបស់លោក ត្រូដូ បានឈ្នះសំឡេងភាគច្រើននៅក្នុងសភា ធ្វើឲ្យគណក្សនេះមានឱកាសបង្កើតរដ្ឋាភិបាលដឹកនាំប្រទេសបន្តមួយអាណត្តិទៀត ។
នៅពេលនេះ លទ្ធផលបោះឆ្នោតបណ្តោះអាសន្ន គណបក្សសេរីបានទទួលអាសនៈ១៥៦កៅអី ក្នុងចំណោមកៅអីសរុប៣៣៨ ។ គណបក្សនេះត្រូវការអាសនៈតិចបំផុត១៧០ ដើម្បីបង្កើតរដ្ឋាភិបាលថ្មី ។ ចំណែក គណបក្សអភិរក្ស បានអាសនៈតែ១២២កៅអីប៉ុណ្ណោះ ក្រោយការបោះឆ្នោតសកលនៅកាណាដា ដែលបានប្រព្រឹត្តឡើងកាលពីថ្ងៃទី២១ ខែតុលា ឆ្នាំ២០១៩នោះ ។
លោក ត្រូដូ កាលពីព្រឹកថ្ងៃទី២២ ខែតុលា បានអបអរសាទរជ័យជំនះនេះជាមួយក្រុមអ្នកគាំទ្ររបស់ខ្លួននៅទីក្រុង ម៉ុងត្រេល ប្រទេសកាណាដា ។ លោកបានថ្លែងថា «សូមអបអរសាទរ! មិត្តសម្លាញ់របស់ខ្ញុំ អ្នករាល់គ្នាធ្វើបានសម្រេចហើយ» ។
សូមបញ្ជាក់ថា លោក ត្រូដូ នឹងបង្កើតរដ្ឋាភិបាលថ្មី ដោយមានការចូលរួមពីគណបក្សជនជាតិភាគតិចផងដែរ ហើយបន្តដឹកនាំរដ្ឋាភិបាលកាណាដាថែមមួយអាណត្តិតទៅទៀត ៕
