ក្នុងអាណត្តិទី២​នាយករដ្ឋមន្ត្រីកាណាដាប្រឈមបញ្ហាជាច្រើន ដោយមានសំឡេង​ភាគតិចក្នុងសភា

ទោះបីទទួលបានជ័យជំនៈនៅក្នុងការបោះឆ្នោត​នាពេលកន្លងមក ប៉ុន្តែនាយករដ្ឋមន្ត្រី កាណាដា លោក​ Justin Trudeau ពិបាននៅក្នុងការសម្រេចគោលនយោបាយ​ដោយ លោកមិនមានសំឡេងភាគច្រើនក្នុងសភា​។ ទាំងនោះហើយអាចធ្វើឲ្យគោលនយោបាយចាកចេញពីឥទ្ធិពលរបស់អាមេរិក​ដូចដែលលោកបានប្រកាស និងប្រឈមបញ្ហាជាច្រើន​។

ព័ត៌មាន Sputnik នៅព្រឹកថ្ងៃពុធ ទី២៣ ខែតុលា ឆ្នាំ២០១៩​លទ្ធផលបោះឆ្នោតសកល​នៅក្នុង​ប្រទេសកាណាដាកាលពីថ្ងៃចន្ទ បានបង្ហាញថា លោក ចាស្ទីន ទ្រូដូ (Justin Trudeau) នឹងបន្តកាន់តំណែងជានាយករដ្ឋមន្ត្រី ប៉ុន្តែគណបក្សរបស់លោក​បានបាត់បង់​សំឡេងភាគ​ច្រើននៅក្នុងសភា ហើយអ្នកជំនាញខ្លះថែមទាំងបានសន្និដ្ឋានដែរថា បញ្ហាដ៏ធំបំផុតសម្រាប់អាណត្តិទី ២ នោះគឺចិនតែម្តង។

លោក អាលឡាន ធូបភើ (Allan Tupper) ដែលជាសាស្ត្រាចារ្យម្នាក់ និងជាប្រធាន​មហាវិទ្យាល័យវិទ្យាសាស្ត្រនយោបាយ នៅឯសាកលវិទ្យាល័យប្រ៊ីធីសខូឡុំប៊ី (University of British Columbia) ធ្វើការកត់សម្គាល់បែបនេះ នៅក្នុងបទសម្ភាសន៍ជាមួយ Sputnik នៅថ្ងៃអង្គារសប្ដាហ៍នេះ។ លោក Tupper បានគូសបញ្ជាក់យ៉ាងដូច្នេះថា «លោក Trudeau នឹងត្រូវប្រឈមមុខ ក៏ដូចជាត្រូវដោះស្រាយបញ្ហាដ៏ធំបំផុតនៅក្នុងអាណត្តិទី ២ របស់លោកនោះគឺចិន ដែលកំពុងដាក់សម្ពាធផ្នែកពាណិជ្ជកម្មជាច្រើន លើទីក្រុងអូតតាវ៉ា ដោយសារតែការចាប់ខ្លួននាយកប្រតិបត្តិហិរញ្ញវត្ថុក្រុមហ៊ុនបច្ចេកវិទ្យាចិន Huawei»។

លោកបន្ថែមថា ការដោះស្រាយជាមួយចិនគឺជារឿងដ៏ពិបាក ពីព្រោះកាណាដាស្ថិត​នៅកៀបចំកណ្ដាលនៃជម្លោះរវាងអាមេរិក និងចិនជុំវិញសំណុំរឿងក្រុមហ៊ុន Huawei ព្រមទាំងឈានដល់វិស័យពាណិជ្ជកម្មដូចជា សាច់ជ្រូក និងគ្រឿងធុញ្ញជាតិមួយចំនួនទៀត ដូចដែលបានកើតមានឡើងកន្លងមក៕