សារព័ត៌មាន នគរវត្ត តែងតែនាំមុខគេជានិច្ច
ខុទ្ទកាល័យប្រធានាធិបតីតួកគី បានប្រកាសព័ត៌មានកាលពីថ្ងៃទី៧ ខែវិច្ឆិកា ឆ្នាំ២០១៩ថា លោក អ៊ីដូហ្គាន នឹងទៅកាន់អាមេរិកតាមការអញ្ជើញរបស់លោកដូណាល់ ត្រាំ ឲ្យទៅបំពេញទស្សនកិច្ចនៅថ្ងៃទី១៣ ខែវិច្ឆិកា ឆ្នាំ២០១៩ ។
គួរបញ្ជាក់ថា គម្រោងបំពេញទស្សនកិច្ចរបស់លោក អ៊ីដូហ្គាន ទៅកាន់ទីក្រុងវ៉ាស៊ីនតោនកើតឡើង បន្ទាប់ពីសភារបស់អាមេរិកបានបោះឆ្នោត គោលបំណងដាក់ទណ្ឌកម្មតួកគី និងបោះឆ្នោតទទួលស្គាល់ការសម្លាប់ដ៏រង្គាលជនជាតិអាមេរិកកាលពីអំឡុងមួយទសវត្សរ៍កន្លងនោះថាជាអំពើប្រល័យពូជសាសន៍ ។
ការបោះឆ្នោតរបស់សភាអាមេរិកបានធ្វើឲ្យតួកគីខឹងសម្បា ។ ប៉ុន្តែយ៉ាងណាក៏ដោយ ខុទ្ទកាល័យប្រធានាធិបតីអ៊ីដូហ្គានចេញថ្លែងការណ៍មួយថា មេដឹកនាំប្រទេសទាំងពីរបានសន្ទនាតាមទូរស័ព្ទកាលពីថ្ងៃទី៦ ខែវិច្ឆិកា ឆ្នាំ២០១៩ ប្តេជ្ញាសារជាថ្មីថា នឹងជួបគ្នានៅទីក្រុងវ៉ាស៊ីតោន ថ្ងៃទី១៣ ខែវិច្ឆិកា តាមការអញ្ជើញរបស់ប្រធានាធិបតីដូណាល់ ត្រាំ ។
ប្រភពថា អំឡុងសន្ទនាតាមទូរស័ព្ទ មេដឹកនាំទាំងពីរបានផ្លាស់ប្តូរទស្សនៈអំពីទំនាក់ទំនងទ្វេភាគី ក៏ដូចការអភិវឌ្ឍនៅក្នុងតំបន់ ។
ពាក់ព័ន្ធបញ្ហាទំនាក់ទំនងរវាងតួកគី អាមេរិកនោះផងដែរ កាលពីពេលថ្មីៗនេះមន្ត្រីជាន់ខ្ពស់តួកគីមួយរូបបានអះអាងថា នឹងមិនខ្លាចការដាក់ទណ្ឌកម្មពីអាមេរិកនោះទេ ហើយតួកគីនឹងទិញយន្តហោះចម្បាំង Su-35 ពីរុស្ស៊ី បើសិនមានការចាំបាច់សម្រាប់បម្រើវិស័យយោធា ។
កាលពីចុងខែតុលា ឆ្នាំ២០១៩ ក្រុមមន្ត្រីតួកគី បានបង្ហើបថា ទីក្រុងអង់ការ៉ា និងទីក្រុងម៉ូស្គូ នឹងបន្តកិច្ចចរចាទិញ យន្តហោះចម្បាំង Su-35 ខណៈ សហរដ្ឋអាមេរិកគំរាមបញ្ឈប់ការប្រគល់យន្ដហោះចម្បាំង F-35 ឱ្យតួកគី ដោយសារតែតួកគី ទិញប្រព័ន្ធមីស៊ីលការពារដែនអាកាស S-400 ពីរុស្ស៊ី ។
សារព័ត៌មាន Sputnik កាលពីថ្ងៃ៦ ខែវិច្ឆិកា ឆ្នាំ២០១៩ បានផ្សាយថា លោកស្រី Nurin Atesoglu Guney សមាជិកក្រុមប្រឹក្សាគោលនយោបាយសន្តិសុខ និងការបរទេសរបស់ ប្រធានាធិបតីតួកគី បានកត់សម្គាល់ នៅពេលត្រូវបានសាកសួរពីការព្រួយបារម្ភ ពីផលប៉ះពាល់ជាអវិជ្ជមានដល់ទំនាក់ទំនងជាមួយអាមេរិក ក្នុងករណីទីក្រុង អង់ការ៉ាទិញ Su-35 ពីរុស្ស៊ី៕
