សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ កម្លាំងនគរបាលប៉ុស្តិ៍អូរបែកក្អម ចាប់វាយខ្នោះបុរសម្នាក់ ដែលជាចោរលួចម៉ូតូប្រជាពលរដ្ឋមួយគ្រឿងបានសម្រេច ប៉ុន្តែត្រូវជនរងគ្រោះឃើញទាន់ស្រែកឆោឡោផ្អើលសមត្ថកិច្ចល្បាតជួយធ្វើអន្តរាគមន៍ទាន់ពេលវេលា ។
ករណីឃាត់ខ្លួនចោរលួចម៉ូតូខាងលើនេះ បានធ្វើឡើងកាលពីវេលាម៉ោង២និង២៥នាទីរសៀល ថ្ងៃទី១១ ខែវិច្ឆិកា ឆ្នាំ២០១៩ នៅចំណុចផ្ទះជួលលេខ២៧៨ ផ្លូវបេតុង ភូមិអ័រគីដេរ សង្កាត់អូរបែកក្អម ខណ្ឌសែនសុខ ។
មន្រ្តីនគរបាលប៉ុស្តិ៍អូរបែកក្អម បានឲ្យដឹងថា កម្លាំងជំនាញបានឃាត់ខ្លួនជនសង្ស័យម្នាក់ ឈ្មោះ ចាន់ រតនៈ ភេទប្រុស អាយុ៣០ឆ្នាំ មុខរបរគ្មាន ជនជាតិខ្មែរ ស្នាក់នៅ មិនពិតប្រាកដ (មានសារធាតុញៀន) បន្ទាប់ពីរូបគេបានធ្វើសកម្មភាពលួចយកម៉ូតូរបស់ជនរងគ្រោះ ឈ្មោះ មាស ហ៊ាន ភេទប្រុស អាយុ៦៦ឆ្នាំ មុខរបរសន្តិសុខឯកជន ជនជាតិខ្មែរ ស្នាក់នៅផ្ទះជួល ផ្លូវបេតុង ភូមិអ័រគីដេរ សង្កាត់អូរបែកក្អម ខណ្ឌសែនសុខ ។ សម្ភារៈបន្សល់ទុក ម៉ូតូ០១គ្រឿង ម៉ាកវ៉េវ សេរីចាស់ ពណ៌ខៀវ ពាក់ស្លាកលេខភ្នំពេញ1G-0797 ប្រគល់ឲ្យជនរងគ្រោះវិញ ។
បច្ចុប្បន្នជនសង្ស័យ កំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី ៕ចន្ទ លីហ្សា
