យុវជនម្នាក់ បើករថយន្តលឿនវ៉ាក់អើនឹងម៉ូតូ បួងចង្កូតមិនទាន់ ជ្រុលធ្លាក់ចូលប្រឡាយលូទឹកស្អុយ

ភ្នំពេញ៖ យុវជនម្នាក់បើករថយន្តលឿនដល់ផ្លូវបត់បានវ៉ាក់អើនឹងម៉ូតូ បួងចង្កូតមិនទាន់ ជ្រុលធ្លាក់ចូលប្រឡាយលូទឹកស្អុយ ។ ហេតុការណ៍នេះ បានកើតឡើងនៅម៉ោង១១និង ៣០នាទីយប់ ថ្ងៃទី១៤ ខែវិច្ឆិកា ឆ្នាំ ២០១៩ នៅខាងក្រោយជិតវត្តទួលសង្កែ ក្នុងសង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ។

ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេឃើញរថយន្ត ១គ្រឿង ម៉ាកគារវីស្តូ ពណ៌ស្លាទុំ ពាក់ស្លាកលេខ ភ្នំពេញ 2R.5081 បានបើកដោយយុវជនម្នាក់តាមបណ្តោយផ្លូវបេតុងក្នុង ទិសដៅពីជើងទៅត្បូង ខណៈមកដល់ចំណុចកើតហេតុ បានគេចម៉ូតូចំនួន ២ គ្រឿង បានបួងចង្កូតជ្រុលធ្លាក់ចូលទៅក្នុងលូទឹកស្អុយ បង្កការភ្ញាក់ផ្អើលដល់បងប្អូនប្រជាពលរដ្ឋ និងកម្លាំងសមត្ថកិច្ច មូលដ្ឋានចុះមកជួយអន្តរាគមន៍ ប៉ុន្តែនៅក្នុងហេតុការណ៍នេះ មិនមានអ្នកណារងរបួសនោះទេ ។

បន្ទាប់ពីកើតហេតុ សមត្ថកិច្ចមូលដ្ឋាន បានមកដល់ចំណុចកើត ពិនិត្យឃើញថា មិនប៉ះពាល់ដល់សម្បត្តិរដ្ឋ ឬបង្ករបួសដល់អ្នកដទៃទេ ទើបអនុញ្ញាតឲ្យម្ចាស់រថយន្ត ហៅរថយន្តស្ទូចយកទៅជួសជុល ដោយខ្លួនឯង ៕ ជ្រោយពេជ្រ