ព័ត៌មានទាន់ហេតុការណ៍៖

ពលរដ្ឋហុងកុងមួយចំនួនធំ ធុញទ្រាន់នឹងបាតុកម្មគ្មានទីបញ្ចប់​ ប៉ះពាល់ដល់ជីវភាពរស់នៅ

ចែករំលែក៖

បាតុកម្មនៅកោះហុងកុង កាន់តែតានតឹងខ្លាំងឡើងដោយកម្លាំងប៉ូលិសអស់ការអត់ធ្មត់ ជាមួយបាតុករ គ្មានថ្ងៃបញ្ចប់ ។ ក្រុមអ្នកឯកទេសវិភាគបានលើកឡើងថា​​ ក្រុមបាតុករហុងកុងដែលមានការគាំទ្រពីបណ្តាប្រទេស លោកខាងលិច ពិសេសគឺអាមេរិក ។

ដោយធុញទ្រាន់​ នឹង​បាតុកម្មគ្មានទីបញ្ចប់​ ពលរដ្ឋហុងកុង ជាច្រើនរយនាក់ បានរួមគ្នាធ្វើបាតុកម្ម សម្តែងការគាំទ្រ ដល់នគរបាលហុងកុង ដែលប្រឈមមុខនឹងបាតុកម្ម​ហិង្សា ជាច្រើនខែមកនេះ ។ ប្រជាជន​ហុងកុង ដែលមានវត្តមានក្នុងក្បួនបាតុកម្មនេះ​ ក៏បាន​អះអាងថាខ្លួនគាំទ្រ របបនយោបាយហុងកុងបច្ចុប្បន្ន​ ​ប្រទេសមួយ​របប២ ក្រោមការដឹកនាំរបស់ចិនប៉េកាំង ។

ប្រជាជនហុងកុងក្មេងចាស់ប្រុសស្រី ជាច្រើនរយនាក់ បានប្រមូលផ្តុំគ្នា នៅចំពោះមុខអាគារ​សភា​ហុងកុង និងខាងមុខស្នងការដ្ឋាននគរបាល​ហុងកុង ដើម្បីសម្តែងការគាំទ្រនរគបាល​ហុងកុង ។ អ្នកខ្លះកាន់ទង់ជាតិហុងកុង អ្នកខ្លះកាន់ទង់ជាតិចិន ឬឯអ្នកខ្លះទៀត មានកាន់​បដា ដែលមាន​សរសេរជាអក្សរថា “យើងគាំទ្រនរគបាល​” ឬ “ យើងឈរនៅខាងនគរបាល” ជាដើម ។

ស្រ្តី​ហុងកុង វ័យ៤៩ឆ្នាំម្នាក់ បានលើកឡើងថា ជាច្រើនខែមកហើយ ដែលប្រជាជន ហុងកុង​មួយចំនួនដូចជាអ្នកស្រី បានបិទមាត់ មិនតវ៉ា មិន​សម្តែងមតិអ្វីទាំងអស់ ដោយសារ​តែខ្លាចការគំរាមពីសំណាក់ ក្រុមបាតុករហិង្សាជ្រុលនិយម ។ តែឥឡូវវាដល់ពេលហើយ ដែលត្រូវធ្វើបាតុកម្មសម្តែងការគាំទ្រ ដល់នគរបាលហុងកុង ។

សូមបញ្ជាក់ថា បាតុកម្មតវ៉ានៅហុងកុង បាន​អូសបន្លាយ​ប្រមាណ​៦ខែមកហើយ ដោយហ្វូងបាតុករ ភាគច្រើនជាយុវជនសិស្សនិស្សិត បានទាមទារឲ្យចិន ដកចេញនូវ​គំនៀប​សង្កត់ សិទ្ធិសេរីភាព​នយោបាយ មកលើប្រជាជនហុងកុង ។ ក្រុមបាតុករប្រជាធិបតេយ្យ​ ក៏បានទាម​ទារ ឲ្យ​មានការស៊ើបអង្កេតដោយឯករាជ្យផងដែរ ទៅលើវិធានការហិង្សា​ហួស​ប្រមាណ ដែលនគរបាលហុងកុង បានធ្វើមកលើបាតុករ ។

គួរកត់សំគាល់ដែរថា នេះជាលើកទីមួយហើយ ដែលមានក្បួនបាតុកម្មរបស់ប្រជាជន​ហុងកុង ដែលចេញមុខ គាំទ្រនគរបាល ក៏ដូចជារដ្ឋាភិបាលហុងកុង ក្នុងទ្រង់ទ្រាយធំបែបនេះ ។ កន្លងមកចលនានេះ មានទំហំតូចតាចបំផុត ។ ក្បួនបាតុកម្មនេះ ក៏បាន​សម្តែងការគាំទ្រ ដល់ការដឹកនាំរបស់ចិនប៉េកាំង និង​ រដ្ឋបាលហុងកុង ដឹកនាំដោយលោកស្រី ការី ឡាំ ផងដែរ ។

ប៉ុន្តែមតិមួយចំនួន​បានលើកឡើងថា ក្រុម​បាតុករ ដែលចេញមកគាំទ្រចិន និងនគរបាល​ហុងកុងនេះ គឺពិតជាមាន​ការពន្យុះ ឬរៀបចំដោយរដ្ឋអំណាចចិន ។ មួយវិញទៀត ការជួបជុំនេះ បានធ្វើឡើង ក្នុងខណៈដែល​ក្រុមបាតុករប្រជាធិបតេយ្យ បានដកថយបន្តិចទៅវិញ នៅថ្ងៃសៅរ៍ទី​១៦វិច្ឆិកា បន្ទាប់ពី​ពួកគេបាន​ឃើញទាហានចិន មានវត្តមាន​នៅតាមផ្លូវនានា នៅក្នុងក្រុងហុងកុង ដើ​ម្បីធ្វើការរៀបចំសំអាតទីតាំងមួយចំនួន​ ដែលខូចខាតដោយបាតុកម្ម ។ ដោយឡែក រដ្ឋបាលហុងកុង បានអះអាងថា វត្តមានរបស់ទាហានចិននេះ គឺខ្លួនមិនបានស្នើសុំទេ គឺកងទ័ពចិន ដែល​ជាអ្នក​ស្នើខ្លួន​ជួយ ដើម្បីរៀបចំសំអាត ។ តែយ៉ាងណា វត្តមាន​របស់ទាហានចិន នៅតាមផ្លូវបែបនេះ បានធ្វើឲ្យ​មានការតវ៉ា ខឹងសម្បារកាន់តែខ្លាំងពីសំណាក់ក្រុមបាតុករប្រជាធិបតេយ្យ ។

ជាមួយគ្នានោះរដ្ឋាភិបាលបានសម្រេចផ្លាស់ប្តូរស្នងការប៉ូលិសហុងកុង ដើម្បីបង្កើនប្រសិទ្ធិភាព ក្នុងការទប់ស្កាត់ក្រុមបាតុករ ។

លោក​ Chris Tang Ping- Keung ​បានឆ្លើយតបទៅនឹងបទសម្ភាសន៍​របស់សារព័ត៌មាន South China morning post ​មុនពេលស្បថចូលកាន់តំណែង ស្នងការប៉ូលិស​ហុងកុង កាលពីថ្ងៃទី​១៩ ខែវិច្ឆិកា ថា ការឡើងកាន់តំណែង ក្នុងពេល ដែលកម្លាំងប៉ូលិសនៅលើកោះនេះកំពុងតែប្រឈម​ការថ្កោលទោសយ៉ាងខ្លាំង ពីមហាជន​ដោយបានប្រើប្រាស់ កម្លាំងទៅលើក្រុមបាតុករនៅហុងកុង​​ ។ ប៉ុន្តែ លោកបានថ្កោលទោសដល់ក្រុមបាតុករ​ដែលបានបង្កអំពើហិង្សា ហើយការនៅស្ងៀមរបស់ប៉ូលិស​ធ្វើឲ្យស្ថានភាពកាន់តែអាក្រក់ទៅ ។

លោក​ Chris Tang Ping បានទទួលស្គល់ថា កម្លាំងប៉ូលិស​៣១ពាន់នាក់ មិនអាច បញ្ចប់ការធ្វើបាតុកម្ម នាពេលបច្ចុប្បន្ននោះឡើយ​ គឺចាំបាច់ត្រូវតែមានការចូលរួមពី ពលរដ្ឋ​នៅក្នុងតំបន់ ។ លោកបន្តទៀតថា​«គ្រាប់គ្រាន់ហើយ​! បើទោះបីទស្សនៈរបស់អស់លោក​បែបណា ក៏មិនត្រូវ​បង្កឲ្យមានអំពើហិង្សាកាន់តែធ្ងន់​ ជាការផ្តល់ឱកាស់ដល់ជនខិតខូចតែប៉ុណ្ណោះ ។ មកទល់ពេលនេះមានបាតុករ ជិត​៤៥០០នាក់ត្រូវបានចាប់ខ្លួន ពាក់ព័ន្ធនិងបាតុកម្មហិង្សា​ ។

លោក​ Chris Tang Ping​អាយុ ៥៤ឆ្នាំ​​​បានបង្ហាញពីការប្តេជ្ញា ការពារ កិត្តិយស​របស់ប៉ូលិសហុងកុង ថាជាប៉ូលិស​ ពូកែបំផុតនៅទ្វីបអាស៊ី​ ។ តាំងពីបាតុកម្មផ្ទុះឡើង ប៉ូលិសបានប្រើប្រាស់គ្រាប់បែកផ្សេង ដល់ទៅ​១ម៉ឺនគ្រាប់​ និងគ្រាប់កាំភ្លើងពិត​១៨គ្រាប់ ។ មនុស្ស ១៧០០នាក់រងរបួស ក្នុងនោះមានប៉ូលិស​៤៥០នាក់ផងដែរ​៕


ចែករំលែក៖