សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់សង្ស័យស្រវឹងជិះម៉ូតូលឿនជ្រុលបុក ឃឿនផ្លូវដួលរងរបួសបែកមុខចំណែកម៉ូតូខ្ទាត ទៅចូលក្រោមរថយន្តកិនរងការខូចខាត ។
ហេតុការណ៍នេះ បានកើតឡើងកាលពីវេលាម៉ោង១១ និង២០នាទីយប់ ថ្ងៃទី២០ ខែវិច្ឆិកា ឆ្នាំ២០១៩ នៅចំណុចគល់ស្ពានអាកាសស្ទឹងមានជ័យខាងកើត តាមបណ្តោយផ្លូវមុនីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុ គេឃើញរថយន្តម៉ាក FUSO ប្រភេទ រថយន្តស្ទូច ពណ៌ខៀវ ពាក់ស្លាកលេខ ភ្នំពេញ 3D 1413 ធ្វើដំណើរតាមបណ្តោយផ្លូវមុនីរ៉េត ក្នុងទិសដៅពីកើតទៅលិច ខណៈមកដល់ចំណុចកើតហេតុស្រាប់តែមានបុរសម្នាក់សង្ស័យស្រវឹងជិះម៉ូតូម៉ាកPSX ពណ៌ខ្មៅ ពាក់ស្លាកលេខ ភ្នំពេញ 1FX 2577 ធ្វើដំណើរស្របជាមួយរថយន្តមកពីក្រោយ ហើយព្យាយាមជែង ខាងឆ្វេង ភ្លាមនោះក៏ជ្រុលបុកឃឿនផ្លូវបណ្តាលឲ្យដួលរងរបួសបែកមុខចំណែកម៉ូតូខ្ទាតចូលក្រោមរថយន្តកិនអូសប្រហែល៥ម៉ែត្ររងការខូចខាត ។
ក្រោយកើតហេតុជនរងគ្រោះត្រូវបានបញ្ជូន ទៅសង្គ្រោះនៅមន្ទីរពេទ្យ ចំណែកម៉ូតូ និងរថយន្តត្រូវបានសមត្ថកិច្ចវាស់វែងយកទៅអធិការដ្ឋាននគរបាលខណ្ឌទួលគោក ដើម្បីរង់ចាំដោះស្រាយតាមច្បាប់ ៕ សុខាសែនជ័យ
