បុរសម្នាក់បើករថយន្តបុករបាំង ថ្មពុះចែកទ្រូងផ្លូវនៅមុខក្តាន់ពីរ

ភ្នំពេញ៖ បុរសម្នាក់ទំនងជាស្រវឹងស្រា បានបើករថយន្តលឿន ជ្រុលចង្កូតទៅបុករបាំថ្មពុះចែកទ្រូងផ្លូវ តែមិនបណ្ដាលឲ្យមានអ្នករងរបួស ។

ហេតុការណ៍នេះ បានកើតឡើងកាលពីម៉ោង ៣ទៀបភ្លឺ ឈានចូលថ្ងៃទី២១ ខែវិច្ឆិកា ឆ្នាំ២០១៩ តាមបណ្ដោយមហាវិថីសហព័ន្ធរុស្ស៊ី ចំណុចស្តុបក្តាន់ពីរ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។

ប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញបុរសម្នាក់ទំនងជាស្រវឹងស្រា បានបើកបររថយន្តមួយគ្រឿង ម៉ាកឡិចស៊ីស RX300 ពណ៌ស ពាក់ស្លាកលេខ ភ្នំពេញ 2AS-2300 ដោយដំណើរតាមបណ្ដោយមហាវិថីសហព័ន្ធរុស្ស៊ី ក្នុងទិសដៅពីកើតទៅលិចយ៉ាងលឿន ខណៈមកដល់ចំណុចកើតហេតុ រថយន្តជ្រុលចង្កូត ទៅបុកនឹងរបាំថ្មពុះចែកទ្រូងផ្លូវ សំណាងល្អមិនបណ្ដាលឲ្យមានអ្នករងរបួស ចំណែករថយន្តរួញផ្នែកខាងមុខ ។

ភ្លាមៗនោះ អ្នកបើកបររថយន្តព្យាយាមថយរថយន្តចេញពីកន្លែងកើតហេតុ បម្រុងបើករត់គេចខ្លួន តែត្រូវសមត្ថកិច្ចមូលដ្ឋាន ល្បាតឃើញឃាត់សួរនាំ តែអ្នកបើកបររថយន្តបានចុះពីលើរថយន្តគេចខ្លួន បន្សល់ទុករថយន្តនៅកន្លែងកើតហេតុ ។

បន្ទាប់ពីកើតហេតុរថយន្តត្រូវបានសមត្ថកិច្ច ជំនាញចរាចរ ចុះស្ទូចយកទៅរក្សាទុក នៅការិយាល័យចរាចរផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំ ដោះស្រាយគ្នានៅពេលក្រោយ ៕ ជ្រោយពេជ្រ