សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង: កម្លាំងនគរបាលប៉ុស្តិ៍រដ្ឋបាលឃុំស្វាយ ស្រុកសាមគ្គីមានជ័យ តាមចាប់ឃាត់ខ្លួនជនសង្ស័យបានម្នាក់ក្នុងចំណោមបក្ខពួក២នាក់ ក្នុងករណីជិះម៉ូតូឆក់កាបូបពីនារីរងគ្រោះម្នាក់កាលពីព្រឹកនៅ ថ្ងៃទី២៧ ខែវិចិ្ឆកា ឆ្នាំ២០១៩ ត្រង់ចំណុចស្ពានទី៣ ផ្លូវជាតិ៥ ស្ថិតក្នុងភូមិជន្លាត់ដៃ ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង។
មន្រ្តីនគរបាលប៉ុស្តិ៍រដ្ឋបាលឃុំស្វាយបានឲ្យដឹងថា ជនរងគ្រោះឈ្មោះ នៅ ចរិយា ភេទស្រី អាយុ២៣ឆ្នាំ រស់នៅភូមិពោរិទ្ធិក្រៃ ឃុំស្វាយ ស្រុកសាគ្គីមានជ័យ បានបាត់លុយ២០ម៉ឺនរៀល ។ ឯជនបង្កមានគ្នា ២នាក់សមត្ថកិច្ចចាប់បានម្នាក់កំពុងសាកសួរ និង រត់រួចម្នាក់។
ជនរងគ្រោះបានឲ្យដឹងថា មុនពេលកើតហេតុ ស្រ្តីរងគ្រោះជិះម៉ូតូដោយដាក់កាបូបលុយនៅកន្ត្រកខាងមុខ។ ក្រោយមកជនសង្ស័យពីរនាក់បានជិះម៉ូតូម៉ាកស៊ុយហ្ស៊ុយគីលែត ពណ៌ស អត់ស្លាកលេខតាមពីក្រោយ ហើយពេលមកដល់ក្បែរនារីរងគ្រោះជនសង្ស័យម្នាក់ដែលជិះខាងក្រោយបានឆក់យកកាបូបបានសម្រេចរួចបើករត់ តែនារីរងគ្រោះស្រែកឆោឡោ គាប់ជួនពេលនោះសមត្ថកិច្ចនគរបាលប៉ុស្តិ៍រដ្ឋបាលស្វាយ ឃាត់ខ្លួនបានម្នាក់ ឯម្នាក់ទៀតរត់គេចខ្លួនបាត់។ ជនសង្ស័យដែលឃាត់ខ្លួនបាន សមត្ថកិច្ចកសាងសំណុំរឿងដោះស្រាយតាមនីតិវិធីរួមជាមួយម៉ូតូមួយគ្រឿងរបស់ជនសង្ស័យដែលជិះធ្វើសកម្មភាពផង៕ ប្រាថ្នា
