ចោរកាច់កម៉ូតូអស់លក្ខណ៍ម្នាក់ក្នុងចំណោម២នាក់ ត្រូវសមត្ថកិច្ចចាប់ដាក់ខ្នោះ បង្កការភ្ញាក់ផ្អើល

ខេត្តស្វាយរៀង៖ ជនសង្ស័យម្នាក់ក្នុងចំណោម២នាក់ ត្រូវបានសមត្ថកិច្ចនគរបាលសហការជាមួយកងរាជអាវុធហត្ថក្រុងស្វាយរៀង ពួនស្ទាក់ឃាត់ខ្លួន ព្រមទាំងម៉ូតូដែលជិះធ្វើសកម្មភាពពាក់ពន្ធ័ករណីកាច់កម៉ូតូរបស់ជនរងគ្រោះមួយគ្រឿងបានសម្រេច ។

ហេតុការណ៍នេះ បានកើតឡើងនៅវេលាម៉ោង១រសៀល ថ្ងៃទី២៩ ខែវិច្ឆិកា ឆ្នាំ២០១៩ ស្ថិតក្នុងភូមិស្វាយរៀង សង្កាត់ស្វាយរៀង ក្រុងស្វាយរៀង ខេត្តស្វាយរៀង ។

បើតាមសមត្ថកិច្ចនគរបាលក្រុងស្វាយរៀងបានឲ្យដឹងថា ជនសង្ស័យដែលឃាត់ខ្លួនមានឈ្មោះ កេត រ៉ា ភេទប្រុស អាយុ ៣៦ឆ្នាំ មុខរបរមិនពិតប្រាកដរស់នៅភូមិកាប៉ៅ ស្រុកកំចាយមារ ខេត្តព្រៃវែង ព្រមទាំងម៉ូតូហុងដាសេ ១២៥ មួយគ្រឿងផងដែរ ។

ចំណែកម្ចាស់ម៉ូតូរងគ្រោះមានឈ្មោះចឹង លក្ខិណា ភេទស្រី អាយុ៣០ឆ្នាំលក់ដូរក្នុងភូមិស្វាយរៀង សង្កាត់ស្វាយរៀង ក្រុងស្វាយរៀង ខេត្តស្វាយរៀង ។ រីឯម៉ូតូដែលបាត់ម៉ាកហុងដា សេ ១២៥ ពណ៌ខ្មៅ ពាក់ស្លាកលេខ ស្វាយរៀង ១O ៨៨៤៦ ។

តាមជនរងគ្រោះបានប្រាប់សមត្ថកិច្ចថា មុនកើតហេតុគាត់បានទុកម៉ូតូបញ្ឈរទុកនៅមុខផ្ទះដោយជាប់រវល់ ខណៈនោះស្រាប់តែមានជនសង្ស័យម្នាក់ក្នុងចំណោម២នាក់ បានជិះម៉ូតូមួយគ្រឿងមកឈប់ ក៏ធ្វើសកម្មភាពកាច់ក ប៉ុន្តែគាត់ក៏បានក្រឡេកឃើញ ក៏ស្រែកចោរៗ ក៏បង្កការភ្ញាក់ផ្អើលដល់អ្នកភូមិ និងរាយការណ៍មកសមត្ថកិច្ចពួនស្ទាក់ឃាត់ជនសង្ស័យបានម្នាក់ ព្រមទាំងម៉ូតូដែលធ្វើសកម្មភាពនៅពាក់កណ្ដាលផ្លូវចំណែកជនសង្ស័យម្នាក់ទៀត ជិះម៉ូតូជនរងគ្រោះគេចខ្លួនផងដែរ ។

បច្ចប្បន្នជនសង្ស័យត្រូវបានសមត្ថកិច្ចនគរបាលកសាងសំណុំរឿងចាត់ការបន្តតាមច្បាប់ និងស្រាវជ្រាវតាមឃាត់ជនសង្ស័យបន្តទៀតឲ្យខានតែបាន ៕ យឹម សុថាន