សារព័ត៌មាន នគរវត្ត តែងតែនាំមុខគេជានិច្ច
ទំនាក់ទំនងរវាងចិន និងកូរ៉េខាងត្បូង មានភាពល្អប្រសើរជាងមុន ខណៈមេដឹកនាំ នៃប្រទេសទាំងពីរ បានជួបពិភាក្សាគ្នា នៅក្នុងប្រទេសចិន ។ សហរដ្ឋអាមេរិកបានផ្ញើសារវិជ្ជមាន សាទរចំពោះសម្ពន្ធមិត្តយោធា នៅអាស៊ីទាំងពីររបស់ខ្លួន អាចមានគំនិតដូចគ្នា ដោះស្រាយវិបត្តិ តាមរយៈឧបតោភាគី ។
ប្រទេសចិន បានធ្វើជាម្ចាស់ផ្ទះសម្រាប់កិច្ចប្រជុំ រវាងមេដឹកនាំកូរ៉េខាងត្បូង និងជប៉ុន នៅថ្ងៃទី២៤ ខែធ្នូ ឆ្នាំ២០១៩ ខណៈស្ថានការណ៍តានតឹង រវាងសម្ពន្ធមិត្តយោធាអាមេរិកទាំងពីរ នៅតំបន់អាស៊ី ឲ្យមានសភាពធូរស្រាល ។
កិច្ចប្រជុំត្រីភាគីនេះ បានធ្វើឡើង នៅទីក្រុង Chengdu នាភាគនិរតី នៃខេត្ត Sichuan ប្រទេសចិន ហើយគេរំពឹងថា នឹងសម្តែងការប្រឆាំងជំទាស់ ចំពោះការគំរាមកំហែងសន្តិសុខ ក្នុងតំបន់ពីកូរ៉េខាងជើង ជាពិសេសនោះ គឺការជួបជាលើកដំបូង មួយទល់នឹងមួយ រវាងនាយករដ្ឋមន្ត្រីជប៉ុន លោកស៊ីនហ្សូ អាបេ និងប្រធានាធិបតីកូរ៉េខាងត្បូង មូន ចេអ៊ីន បន្ទាប់ពីរយៈពេល១៥ខែកន្លងមកនេះ មិនដែលបានជួបពិភាក្សាគ្នា ។
ទំនាក់ទំនង រវាងទីក្រុងសេអ៊ូល និងទីក្រុងតូក្យូ បានឈានដល់ពាក់មុខយក្សដាក់គ្នា កាលបីអំឡុងប៉ុន្មានខែកន្លងទៅថ្មីៗនេះ ក្នុងជម្លោះពាណិជ្ជកម្ម និងជម្លោះផ្សេងៗទៀត ដែលមានតាំងពីរាប់ទសវត្សរ៍កន្លងមក គឺរឿងដែលកងទ័ពជប៉ុន ចូលកាន់កាប់នៅឧបទ្វីបកូរ៉េ ចន្លោះពីឆ្នាំ១៩១៩-១៩៤៥ ។
នៅមុនពេលចេញដំណើរទៅកាន់ប្រទេសចិន លោក អាបេ បានថ្លែងទៅកាន់អ្នកកាសែតថា «ទំនាក់ទំនងរវាងទីក្រុងតូក្យូ ជាមួយទីក្រុងសេអ៊ូល ស្ថិតក្នុងសភាពធ្ងន់ធ្ងរដដែល» ។ លោកបន្តថា «ប៉ុន្តែដោយពិចារណាលើបរិយាកាសសន្តិសុខ នៅក្នុងតំបន់អាស៊ីខាងកើត, ខ្ញុំទទួលស្គាល់ថា ទំនាក់ទំនង រវាងជប៉ុន និងកូរ៉េខាងត្បូង ព្រមទាំងទំនាក់ទំនង រវាងជប៉ុន, សហរដ្ឋអាមេរិក និងកូរ៉េខាងត្បូង គឺមានសារសំខាន់ខ្លាំងណាស់» ។
ការប្រឈមមុខ រវាងកូរ៉េខាងត្បូង និងជប៉ុន បានកើតឡើង បន្ទាប់ពីតុលាការកូរ៉េខាងត្បូង បានចេញសាលដីកាឲ្យក្រុមហ៊ុនជប៉ុន សងសំណងជំងឺចិត្តដល់ពលរដ្ឋកូរ៉េខាងត្បូង ដែលត្រូវបានបង្ខិតបង្ខំ ដោយកងទ័ពអាណានិគមន៍ជប៉ុន នាអំឡុងសម័យសង្គ្រាម នៅឧបទ្វីប រយៈពេលប្រហែល៣៥ឆ្នាំ ដោយបង្ខំឲ្យធ្វើការ ដោយមិនមានប្រាក់កម្រៃ ។ ជប៉ុនបានអះអាងថា អ្វីគ្រប់យ៉ាង គឺបានដោះស្រាយគ្នា ចប់សព្វគ្រប់អស់ហើយ ។
ជាការតបតនឹងសាលដីកានេះ ជប៉ុនបានរឹតបន្តឹងដល់ការនាំចេញផលិតផលបច្ចេកវិទ្យាជាន់ខ្ពស់៣មុខសំខាន់ៗទៅកាន់កូរ៉េខាងត្បូង ហើយទម្លាក់ប្រទេសនេះ ចេញពីបញ្ជីស ដៃគូពាណិជ្ជកម្ម ដែលមានទំនុកចិត្តជាដើម ។ ដោយឡែករដ្ឋាភិបាលកូរ៉េខាងត្បូងវិញ បានប្តឹងបញ្ហានេះទៅកាន់អង្គការពាណិជ្ជកម្មពិភពលោក ហើយគំរាមបញ្ចប់កិច្ចព្រមព្រៀង ចែករំលែកព័ត៌មានយោធាសម្ងាត់ជាមួយជប៉ុន ។
សហរដ្ឋអាមេរិក បានស្វាគមន៍ចំពោះការវិវឌ្ឍចុងក្រោយនេះ ដោយនិយាយថា ខ្លួនសូមផ្ញើសារវិជ្ជមាន ដែលសម្ពន្ធមិត្តទាំងពីរ មានគំនិតដូចគ្នា អាចដោះស្រាយបញ្ហាជម្លោះ តាមរយៈឧបតោភាគី ៕
