សារព័ត៌មាន នគរវត្ត តែងតែនាំមុខគេជានិច្ច
ទំនាក់ទំនងរវាងអាមេរិក នឹងអ៊ីរ៉ង់ មានសញ្ញា អាក្រក់ជាច្រើន ពេលឈានចូលឆ្នាំ២០២០ អាចជំរុញឲ្យប្រទេសទាំងពីរផ្ទុះសង្គ្រាមនឹងគ្នា ដោយអាមេរិកចោទប្រកាន់អ៊ីរ៉ង់ជាអ្នកនៅពីក្រោយរាល់ការវាយប្រហារទៅលើទីតាំង អាមេរិក។
នៅថ្ងៃដំបូងដើមឆ្នាំ២០២០ ប្រធានាធិបតីអាមេរិក លោក ដូណាល់ ត្រាំ ចោទប្រកាន់អ៊ីរ៉ង់ នៅពីក្រោយការវាយប្រហារស្ថានទូតអាមេរិក នៅក្នុងប្រទេសអ៊ីរ៉ាក់ ហើយសកម្មភាពខាងលើ ជាសញ្ញាអវិជ្ជមាន នៅក្នុងទំនាក់ទំនង រវាងអាមេរិក និងអ៊ីរ៉ង់ នាឆ្នាំ២០២០នេះ ។ លោក ដូណាល់ ត្រាំ បានលើកឡើងថា អ៊ីរ៉ង់ នឹងត្រូវទទួលខុសត្រូវទាំងស្រុង ចំពោះការវាយប្រហារស្ថានទូតអាមេរិក នៅក្នុងប្រទេសអ៊ីរ៉ាក់។
កន្លងមក កម្លាំងទាហានអាមេរិក បានបើកការវាយប្រហារទៅលើទីតាំងរបស់កម្លាំងទាហានប្រជាជនអ៊ីរ៉ាក់ គាំទ្រដោយអ៊ីរ៉ង់ ។ អាមេរិកបានចោទប្រកាន់ក្រុមនេះថា ជាអ្នកនៅពីក្រោយការវាយប្រហារ ដោយមីស៊ីលសម្លាប់មេការសំណង់អាមេរិក ដែលកំពុងសាងសង់ទីតាំងយោធា នៅភាគខាងជើង ប្រទេសអ៊ីរ៉ាក់។
លោកត្រាំ បានប្រកាសថា «ពេលនេះអ៊ីរ៉ង់ ជាអ្នកនៅពីក្រោយការវាយប្រហារទៅលើស្ថានទូតអាមេរិក នៅអ៊ីរ៉ាក់ ។ អ៊ីរ៉ង់ជាអ្នកទទួលសុខត្រូវទាំងស្រុង ហើយអាមេរិកសង្ឃឹមថា អ៊ីរ៉ាក់នឹងប្រើប្រាស់កម្លាំងរបស់ខ្លួនការពារស្ថានទូតអាមេរិក នៅក្នុងប្រទេសនេះ»។
កាលពីថ្ងៃទី៣១ ខែធ្នូ ឆ្នាំ២០១៩ កម្លាំងទាហានក្រុមស៊ីអ៊ីតនៅអ៊ីរ៉ាក់ និងអ្នកគាំទ្រ បានសម្រុកចូលស្ថានទូតអាមេរិក ក្នុងពេលធ្វើបាតុកម្មប្រឆាំងអាមេរិក ដែលបានវាយប្រហារតាមដែនអាកាស ទៅលើទីតាំងរបស់កម្លាំងទាហានស៊ីអ៊ីត។
នេះជាសញ្ញាអាក្រក់ នៅឆ្នាំ ២០២០ រវាងអាមេរិក និងអ៊ីរ៉ង់ ដោយសារនៅថៃ្ងដំបូង នាឆ្នាំ២០២០នេះ អាមេរិកបានចោទប្រកាន់ទៅលើអ៊ីរ៉ង់ ។ ក្រុមអ្នកឯកទេសវិភាគបានលើកឡើងថា នាពេលខាងមុខ ប្រទេសទាំងពីរអាចនឹងប្រឈមមុខតានតឹងដាក់គ្នាថែមថែមទៀត ៕
