ឃើញអ្នកឡំប្រឺតា ដេកដាក់ទូរស័ព្ទនៅខាងមុខ ឆ្លៀតឆក់យកតែម្ចាស់ដឹងទាន់ទាញមកវិញដួលម៉ូតូក្របួចជាប់

ភ្នំពេញ៖ ជនសង្ស័យម្នាក់ បានធ្វើសកម្មភាពឆក់ទូរស័ព្ទដៃពីបុរសម្នាក់ ជាអ្នករត់ឡំប្រឺតា ខណៈដែលឃើញជនរងគ្រោះដេកនៅកៅអីខាងក្រោយ បានដាក់ទូរស័ព្ទនៅខាងមុខបានសម្រេចហើយ តែដោយសារជនរងគ្រោះដឹងខ្លួនទាន់ក៏ចាប់ទាញម៉ូតូជនសង្ស័យឲ្យដួលម៉ូតូ គាប់ជួនកម្លាំងសមត្ថកិច្ចកំពុងល្បាតក្បែរនោះចាប់វាយខ្នោះភ្លាមៗ ។

ករណីឃាត់ខ្លួនចោរឆក់ខាងលើនេះ បានធ្វើឡើងកាលពីវេលាម៉ោង១ និង៥នាទីរសៀល ថ្ងៃទី៣ ខែមករា ឆ្នាំ២០២០ នៅចំណុចមុខផ្ទះលេខ១៤២ ផ្លូវលេខ៤៣០កែងផ្លូវលេខ១៨១ ក្រុម០៥ ភូមិ០១ សង្កាត់ទំនប់ទឹក ខណ្ឌបឹងកេងកង ។

លោក ស៊ឹម ពិសិដ្ឋ អធិការនគរបាលខណ្ឌបឹងកេងកង បានឲ្យដឹងថា ជនសង្ស័យឈ្មោះឌឹម វណ្ណី ភេទប្រុស អាយុ៣៩ឆ្នាំ មុខរបររត់ម៉ូតូឌុប ទីលំនៅបច្ចុប្បន្នផ្ទះលេខ០៤ ផ្លូវលំ ភូមិស្ដៅកន្លែង សង្កាត់ស្ដៅកន្លែង ស្រុកគៀនស្វាយ ខេត្តកណ្តាល ។ ចំណែកជនរងគ្រោះឈ្មោះធី ដារី ភេទប្រុស អាយុ២៣ឆ្នាំ មុខរបររត់ឡំប្រឺតា ទីលំនៅផ្ទះជួលគ្មានលេខ ផ្លូវលេខ១៤២ សង្កាត់ផ្សារដេប៉ូ១ ខណ្ឌទួលគោក ។

វត្ថុតាងដកហូតរួមមាន៖ ១.ទូរសព្ទ័ដៃម៉ាកអាយហ្វូន6ពណ៌ទឹកមាស០១គ្រឿង (បានប្រគល់ជូនជនរងគ្រោះវិញ) ដោយមានការអនុញ្ញាតិពី លោកព្រះរាជអាជ្ញារងអមសាលាដំបូងរាជធានីភ្នំពេញ ។ ២.ម៉ូតូC125ពណ៌ខ្មៅ ស្លាកលេខភ្នំពេញ1DE1995 ជារបស់ជនសង្ស័យ ។

លោកអធិការខណ្ឌបន្តថា មុនពេលកើតហេតុ ជនល្មើសបានជិះម៉ូតូក្រឡឹងជុំវិញឡំប្រឺតាចំនួន២ដង ដែលជនរងគ្រោះកំពុងចតស្ងៀម ដោយបានឃើញទូរស័ព្ទដៃដាក់នៅលើដៃចង្កូត ហើយម្ចាស់កំពុងដេកលើកៅអីខាងក្រោយ ។ ភ្លាមនោះជនសង្ស័យក៏ជិះម៉ូតូមកអែបឆ្វេងដៃ រួចឆក់យកទូរស័ព្ទបានសម្រេចតែត្រូវម្ចាស់ដឹងខ្លួនទាន់ ចាប់ទាញម៉ូតូជនល្មើសផ្តួលម៉ូតូ គាប់ជួនកម្លាំងនគរបាលប៉ុស្តិ៍កំពុងល្បាតឃើញសកម្មភាពដូច្នេះក៏ដេញតាមចាប់បានភ្លាមៗជាក់ស្ដែងជាមួយវត្ថុតាងតែម្តង ។

បច្ចុប្បន្នត្រូវបានឃាត់ខ្លួនជាបណ្តោះអាសន្ននៅអធិការដ្ឋានខណ្ឌបឹងកេងកង ដើម្បីកសាងសំណុំរឿងចាត់ការតាមផ្លូវច្បាប់ ៕ស រស្មី