សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ក្រុមជនដៃដល់២នាក់ ជិះម៉ូតូទាញកាំបិតផ្គាក់ កាប់យុវជនម្នាក់ស្លាប់ភ្លាមៗចោទប្រកាន់ថា ឌឺដាក់ខ្លួន ក្រោយធ្វើសកម្មភាពរួច បានយកកាំបិតទៅលាក់ទុក ហើយគេចខ្លួន តែទីបំផុតនៅតែសមត្ថកិច្ចវែកមុខយកមកផ្តន្ទាទោសទាល់តែបាន ។
ករណីឃាតកម្មនេះ កើតឡើងកាលពីវេលាម៉ោង១៧ និង៥៥នាទី នាថ្ងៃទី ០១ ខែមករា ឆ្នាំ២០២០ ស្ថិតនៅផ្លូវ១៤៤០ ភូមិក្រាំងស្នួល ឃុំព្នាយ ស្រុកសំរោងទង ខេត្តកំពង់ស្ពឺ ។ សមត្ថកិច្ចបញ្ជាក់ថាជនរងគ្រោះមានឈ្មោះ កិ ឆេម ហៅឆាង ភេទប្រុស អាយុ២៣ឆ្នាំ រស់នៅភូមិកាហ៊ុន ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ ។
ប្រភពបានឲ្យដឹងថា បន្ទាប់ពីកើតហេតុនៅថ្ងៃទី២មករា២០២០ សមត្ថកិច្ចបានចុះស្រាវជ្រាវពីសាក្សីដឹងថាមុនកើតហេតុឈ្មោះ ផាន ខាវ ភេទប្រុស អាយុ២១ឆ្នាំ នៅភូមិជាមួយជនរងគ្រោះ បានឲ្យដឹង ថា ខ្លួនបានមកធ្វើរោងការនៅភូមិសំបុរឈើ ឃុំស្គុះ ស្រុកសំរោងទង ដោយបានទូរស័ព្ទហៅជនរងគ្រោះឲ្យមកឌុបទៅផ្ទះវិញ ជិះម៉ូតូហុងដាសេ ១២៥ស៊េរី ២០១៧ ពណ៌ខ្មៅដោយជនរងគ្រោះឲ្យខ្ញុំ(ផាន ខាវ) ជាអ្នកឌុប ពេលធ្វើដំណើរដល់ចំណុចកើតហេតុស្រាប់តែមានជនល្មើស២នាក់ជិះម៉ូតូ១គ្រឿង វ៉ាខាងឆ្វេងមកទន្ទឹមគ្នា រួចម្នាក់អង្គុយខាងក្រោយបានទាញកាំបិតផ្កាក់កាប់ជនរងគ្រោះ ត្រូវផ្នែកកញ្ចឹងកខាងក្រោយធ្លាក់ពីលើម៉ូតូស្លាប់តែម្តង ។
ប្រភពបន្តថាក្រោយស្តាប់ការបំភ្លឺពីសាក្សីរួចមកជំនាញស្រុក និងខេត្ត កំណត់ បានមុខសញ្ញាសង្ស័យចំនួន២នាក់ដែលតាមការស្រាវជ្រាវគឺជាមុខសញ្ញាក្មេងទំនើង និងជាមុខសញ្ញាប្រើប្រាស់គ្រឿងញៀន(ក្នុងបញ្ជីខ្មៅនគរបាលមូលដ្ឋាន) ជនសង្ស័យទាំងពីរនាក់មានឈ្មោះ១.ឈ្មោះ ឆុន ថៃ ហៅប៉ាន់ ហៅតុ ភេទប្រុស អាយុ២០ឆ្នាំ នៅភូមិតាំងក្រសាំង ឃុំព្នាយ ស្រុកសំរោងទង មុខរបរ មិនពិតប្រាកដ ២.ឈ្មោះ គឹម សត្យា ហៅជេ ភេទប្រុសអាយុ ១៩ឆ្នាំនៅភូមិប៉ែលហែល សង្កាត់សុព័រទេព ក្រុងច្បារមន អ្នកកាន់កាំបិតផ្គាក់កាប់ទៅលើជនរងគ្រោះ ។
តាមការបញ្ជាក់ឲ្យដឹងពីលោកវរសេនីយ៍ឯក ឃុត សុផល អធិការនគរបាលស្រុកសំរោងទង ថាជនសង្ស័យម្នាក់ចំណោមបក្ខពួក២នាក់ បញ្ជាក់ថាពិតជាបានធ្វើសកម្មភាពយកកាំបិតផ្គាក់កាប់ទៅលើជនរងគ្រោះប្រាកដមែន មូលហេតុមកពីរជនរងគ្រោះ ជាមនុស្សធ្លាប់ឌឺឲ្យជនដៃដល់(គឹម សត្យា) និងបានសារភាពថាក្រោយកាប់រួចខ្លួនបានយកកាំបិតទៅលាក់ទុកក្នុងគុម្ពព្រៃ បំបិតភស្ដុតាង ជាលទ្ធផលសមត្ថកិច្ចបាននាំជនសង្ស័យទៅយកវត្ថុតាងកាំបិតផ្គាក់ និងដកហូត ម៉ូតូហុងដា សេ១២៥ស៊េរី២០១៩ពណ៌ខ្មៅ មធ្យោបាយធ្វើសកម្មភាព ។
នៅរសៀលថ្ងៃទី៣ ខែមករា ឆ្នាំ២០២០ ជនសង្ស័យ និងវត្ថុតាង ត្រូវបានបញ្ជូនមកការិ.ព្រហ្មទណ្ឌកំរិតធ្ងន់ខេត្ត ដើម្បីសាកសួរ កសាងសំណុំរឿងបញ្ជូនទៅកាន់អយ្យការអមសាលាដំបូងខេត្ដកំពង់ស្ពឺ ចាត់ការតាមនីតិវិធី ៕ សេនាសក្តិ
