សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសជាជាងផ្សាដែកម្នាក់ លើកដែកមិនប្រយ័ត្នបានប៉ះជាមួយខ្សែកាបអគ្គិសនី បណ្ដាលឲ្យឆក់ធ្លាក់ពីលើដំបូលសំយ៉ាបចុះមកក្រោមបោកក្បាលជាមួយនឹងថ្មដាច់ខ្យល់ស្លាប់ភ្លាមៗគួរឲ្យអាសូរ ។ ករណីនេះបានកើតឡើងនៅវេលាម៉ោង៨និង៣០នាទី ថ្ងៃទី១០ ខែមករា ឆ្នាំ២០២០ ត្រង់ចំណុចផ្ទះកំពុងជួលជុល ផ្លូវ២១ ភូមិព្រែកឡុង សង្កាត់រកាខ្ពស់ ក្រុងតាខ្មៅ ខេត្តកណ្តាល ។
មន្ត្រីនគរបាលក្រុងតាខ្មៅបានឲ្យដឹងថា ជនរងគ្រោះឈ្មោះ ជឿន ពេញ ភេទប្រុស អាយុ៥៨ឆ្នាំ ជនជាតិខ្មែរ មុខរបរ ជាងដែក មានស្រុកកំណើតភូមិក្តីឈ្វិត ឃុំស្រែស្តុក ស្រុកកណ្តៀង ខេត្តពោធិ៍សាត់ ។
ប្រភពដដែលបន្តថា តាមការបំភ្លឺឈ្មោះ ផន ម៉ាប់ ភេទប្រុស អាយុ៤៩ឆ្នាំ មុខរបរ ជាងផ្សារដែកជាមួយគ្នាបានឲ្យដឹងថា៖ នៅថ្ងៃកើតហេតុ វេលាម៉ោង៧ព្រឹក បានមកធ្វើសំយាបផ្ទះឲ្យឈ្មោះ ឡេង ហ៊ី ដោយជនរងគ្រោះជាអ្នកហុចដែកលើដំបូល ដើម្បីផ្សារធ្វើសំយ៉ាប ។ លុះវេលាម៉ោង៨និង៣០នាទី ជនរងគ្រោះដែលកំពុងផ្សារដែកនៅលើដំបូលដូចគ្នា បានលើកដែកហុចឲ្យឈ្មោះ ផន ម៉ាប់ ប៉ុន្តែបានទៅប៉ះនិងខ្សែកាបភ្លើង បណ្តាលឲ្យឆក់ធ្លាក់ពីលើមកក្រោម បណ្តាលឲ្យបែកក្បាលផុល លលាដ៍ក្បាល ហូរឈាម ដាច់ខ្យល់ស្លាប់តែម្តង បន្ទាប់មកបានស្រែកហៅអ្នកជិតនិងឲ្យជួយ និងបានរាយការណ៍ជូនសមត្ថកិច្ចចុះធ្វើការពិនិត្យ ឃើញថាសាកសពមានស្នាម ក្បាលផុល លលាដ៌លក្ខណះធ្ងន់ ។
បន្ទាប់ពីធ្វើការពិនិត្យរួច សាកសពត្រូវបានប្រគល់ឲ្យក្រុមគ្រួសារ យកទៅធ្វើបុណ្យ នៅស្រុកកំណើតតាមប្រពៃណី ៕ ស្អាងជ័យ
