សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ ៖ ដោយសាររឿងគំនុំនាពេលកន្លងយុវជន២ក្រុមបានដេញកាប់គ្នាយ៉ាងសាហាវធ្វើឲ្យជនបង្កកាប់មនុស្សមិនបានបញ្ចេញកំហឹងកាប់ម៉ូតូជនរងគ្រោះខ្ទេចអស់ តែ៥ថ្ងៃក្រោយមកទើបសមត្ថកិច្ចកងរាជអាវុធហត្ថក្រុងប៉ោយប៉ែតចាប់បានជនសង្ស័យ២នាក់ ឯ២នាក់ទៀតកំពុងគេចខ្លួន ។
ដោយបានទទួលពាក្យបណ្តឹងពីជនរងគ្រោះ២នាក់ ឈ្មោះ ឆាយ សានហ៊ួ ភេទប្រុស អាយុ១៦ឆ្នាំ និងឈ្មោះ ភាព ជីវី ភេទប្រុស អាយុ១៩ឆ្នាំ ពាក់ព័ន្ធករណីហិង្សា បំផ្លិចបំផ្លាញទ្រព្យសម្បត្តិអ្នកដទៃ កាលពីវេលាម៉ោង១២យប់ថ្ងៃទី៤ ខែមករា ឆ្នាំ២០២០ កន្លងមកនៅចំណុចទល់មុខក្លិបកំសាន្តស្ចារស៊ីធី ភូមិក្បាលស្ពាន១ សង្កាត់ និងក្រុងប៉ោយប៉ែត ខេត្តបន្ទាយមានជ័យ ដែលបង្កឡើងដោយជនសង្ស័យ ចំនួន៤នាក់ នោះនៅព្រឹក ថ្ងៃទី៩ ខែមករា ឆ្នាំ២០២០ លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថ ក្រុងប៉ោយប៉ែតបានដឹកនាំកម្លាំងកងរាជអាវុធហត្ថ១ក្រុមចុះស្រាវជ្រាវរហូតឈានដល់ឃាត់ខ្លួនជនសង្ស័យបានចំនួន២នាក់មាន ឈ្មោះ មិល ថៃលេនឈ្មោះ ណេង ភារ៉ាត់ នៅចំណុចភូមិព្រៃព្រិច សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ព្រមទាំងដកហូតបានកាំបិតកែច្នៃ១ដើម ហើយបានបញ្ជូនបន្តមកទីបញ្ជាការដ្ឋាន អាវុធហត្ថខេត្ត ចាត់ការបន្ត។
បើតាមការរៀបរាប់របស់ជនរងគ្រោះបានប្រាប់ឲ្យដឹងថានៅមុនពេលកើតហេតុនោះជនរងគ្រោះបាននាំគ្នាអង្គុយលេងនៅចំណុចកើតហេតុស្រាប់តែជនសង្ស័យជិ:ម៉ូតូចំនួន២គ្រឿងមានគ្នា៤នាក់ចុះពីលើម៉ូតូបានយកកាំបិតដេញកាប់យ៉ាងសាហាវ។ពេលនោះពួកគាត់នាំគ្នារត់ចោលម៉ូតូហើយពួកជនសង្ស័យបានកាប់ម៉ូតូបណ្ដាលឲ្យខ្ទេចហើយរត់គេចខ្លួនបាត់អស់តែម្តង ។
លោកវរសេនីយ៍ឯកម៉ែនភិរម្យ មេបញ្ជាការរង កងរាជអាវុធហត្ថខេត្តទទួលការងារយុត្តិធម៌ បានឱ្យដឹងថា ការឃាត់ខ្លួននេះធ្វើឡើងដោយបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការ កងរាជអាវុធហត្ថខេត្ត។ដោយបានស្ដាប់ចម្លើយជនសង្ស័យ ព្រមទាំងមានវត្ថុតាងផង ឃើញថាមានភាពស៊ីសង្វាក់គ្នា អាចចោទប្រកាន់ពីបទល្មើសបំផ្លាញទ្រព្យសម្បត្តិអ្នកដទៃជនសង្ស័យទាំង២នាក់ និងវត្ថុតាង ត្រូវបានកម្លាំងជំនាញបទល្មើសព្រហ្មទណ្ឌកសាងសំណុំរឿងបញ្ជូនទៅសាលាដំបូងខេត្តចាត់ការតាមច្បាប់។ ចំណែកជនសង្ស័យ២នាក់ទៀតដែលបានគេចខ្លួនសមត្ថកិច្ចកំពុងស្រាវជ្រាវចាប់ខ្លួនបន្ត៕ ប្រាថ្នា
