សារព័ត៌មាន នគរវត្ត តែងតែនាំមុខគេជានិច្ច
កាលពីសម័យកាលដឹកនាំដោយយោធានៅក្នុងប្រទេសមីយ៉ាន់ម៉ា ចិនបានជួយជាច្រើន ដល់ប្រទេសនេះ ។ ប៉ុន្តែមួយរយៈក្រោយមក ក៏បានដកថយដោយសារតែបញ្ហានយោបាយមួយចំនួន ក្នុងនោះការងាកទៅរកលោកខាងលិចរបស់មីយ៉ាន់ម៉ា ។ ប៉ុន្តែសារសំខាន់ក្នុងការអភិវឌ្ឍន៍សេដ្ឋកិច្ច នៅមីយ៉ាន់ម៉ាមិនអាចខ្វះចិនបាននោះឡើយ ដោយចិនបានបង្កើនការចំណាយវិនិយោគបរទេសជាច្រើន ។
ក្នុងពេលដែលប្រធានាធិបតីចិន លោក ស៊ី ជីងពីន បានបំពេញទស្សនកិច្ចរយៈពេល២ថ្ងៃទៅកាន់ប្រទេសមីយ៉ាម៉ាកាលពីថ្ងៃទី១៧ ខែមករា ឆ្នាំ២០២០ ហើយដំណើរទស្សនកិច្ចនេះ ប្រទេសទាំងពីរចុះហត្ថលេខាលើគម្រោងវិនិយោគជាមួយគ្នាក្នុងទំហំទឹកប្រាក់ប្រហែល១,៣ពាន់លានដុល្លារអាមេរិក ។ នេះជាដំណើរទស្សនកិច្ចដំបូងបំផុតតាំងពីឆ្នាំ២០០៩រហូតមករបស់មេដឹកនាំកំពូលចិនទៅកាន់មីយ៉ាន់ម៉ា ។
លោក Aung Htoo ឧបនាយករដ្ឋមន្ត្រីក្រសួងពាណិជ្ជកម្មមីយ៉ាន់ម៉ា បានថ្លែងប្រាប់ក្រុមអ្នកព័ត៌មានថា ប្រធានាធិបតីចិនបំពេញទស្សនកិច្ចប្រទេសនេះ រយៈពេល២ថ្ងៃ ហើយនឹងចុះហត្ថលេខាលើកិច្ចព្រមព្រៀងពាក់ព័ន្ធជាមួយតំបន់សេដ្ឋកិច្ចពិសេស Kyaukphyu និងកិច្ចព្រមព្រៀងវិនិយោគកំពង់ផែ នៅរដ្ឋ រ៉ាឃីន ទំហំទឹកប្រាក់ប្រហែល១,៣ពាន់លានដុល្លារអាមេរិក ។ គម្រោងនេះមានភ្ជាប់ទំនាក់ទំនងយ៉ាងសំខាន់ស្តីអំពីគម្រោងសេដ្ឋកិច្ចចិន «គំនិតផ្តួចផ្តើមខ្សែក្រវាត់ និងផ្លូវថ្នល់»នោះ ។
ក្រៅពីចុះហត្ថលេខាលើគម្រោងវិនិយោគនេះ ប្រធានាធិបតីស៊ី ជីងពីន នឹងជួបជាមួយប្រធានាធិបតីមីយ៉ាន់ម៉ា លោក Win Myint, ជាមួយទីប្រឹក្សារដ្ឋមីយ៉ាន់ម៉ា លោកស្រី Aung San suu Kyi និងជួបជាមួយនាយឧត្តមសេនីយ៍ លោក Min Aung Hlaing ផងដែរនៅរដ្ឋធានី Naypyidaw (ណៃពិដោ)នោះ ៕
