សារព័ត៌មាន នគរវត្ត តែងតែនាំមុខគេជានិច្ច
ប្រភពព័ត៌មានបានផ្សាយថា រដ្ឋបាលសហរដ្ឋអាមេរិក បូករួមជាមួយអាជ្ញាធរសុខាភិបាលបាននិងកំពុងពិចារណាបិទជើងហោះហើរទាំងឡាយ ចេញ ចូល រវាងប្រទេសចិន និងសហរដ្ឋអាមេរិក ដើម្បីទប់ស្កាត់បង្ការជំងឺកូរ៉ូណាដែលកំពុងឆ្លងរាលដាលខ្លាំងនោះ ។
រដ្ឋបាលរបស់លោកប្រធានាធិបតី ដូណាល់ ត្រាំ និងមន្ត្រីសុខាភិបាលសហរដ្ឋអាមេរិកត្រូវបានរាយការណ៍ថា កំពុងពិចារណាវិធានការទាំងឡាយដើម្បីទប់ស្កាត់មហន្តរាយនៃជំងឺដ៏រាតត្បាតកូរ៉ូណានៅចិន ដែលបានឆ្លងជាង៦ពាន់នាក់នៅជុំវិញពិភពលោក និងសម្លាប់មនុស្សអស់១៣២នាក់នៅចិន ។
វិធានការមួយអាចអនុវត្តឡើងនោះ គឺជើងហោះហើរទាំងឡាយរវាងសហរដ្ឋអាមេរិក និងចិន គឺទាំងទៅ និងត្រឡប់មកវិញផងដែរ អាចត្រូវបានផ្អាកទាំងអស់ ក៏ដូចជាការផ្អាកជើងហោះហើរពីប្រទេសតំបន់អាស៊ីចូលមកកាន់ទឹកដីសហរដ្ឋអាមេរិកផងដែរ ។ នេះបើតាមការផ្សាយរបស់ទីភ្នាក់ងារព័ត៌មាន CNBC ថ្ងៃទី២៩ ខែមករា ឆ្នាំ២០២០ ។
ប្រភពរ៉យទ័រដកស្រង់ប្រភពមន្ត្រីសេតវិមានបញ្ជាក់ថា វិធានការទាំងឡាយទៅលើវីរុសនេះ កំពុងស្ថិតនៅលើតុ ហើយជម្រើសណាមួយអាចនឹងជ្រើសរើស ក្នុងនោះមានការហាមឃាត់ជើងហើរបណ្ណោះអាសន្នផងដែរ ។ ប៉ុន្តែទោះបីយ៉ាងណា នៅថ្ងៃទី២៩ ខែមករា ឆ្នាំ២០២០ រដ្ឋបាលលោកដូណាល់ ត្រាំ នៅមិនទាន់ផ្អាកជើងហោះពីចិនទៅកាន់ទឹកដីអាមេរិកនៅឡើយទេ ។
ដំណាលពេលជាមួយគ្នានេះដែរ អាកាសចរណ៍អាមេរិកបានប្រកាសថា ខ្លួនអាចលុបចោលជើងហោះហើររាប់សិបជើងនៅក្នុងខែកុម្ភៈ ឆ្នាំ២០២០ពីទីក្រុងហុងកុង និងចិនដីគោក ខណៈដែលជំងឺសម្លាប់មនុស្សកាន់តែរាលដាលដ៏អាក្រក់បំផុតនោះ ៕
