សារព័ត៌មាន នគរវត្ត តែងតែនាំមុខគេជានិច្ច
ការរញ្ជួយដីកកម្រិតស្រាលនៅកូរ៉េខាងជើងនាព្រឹកថ្ងៃទី២៩ ខែមករា បង្កឲ្យមានការសង្ស័យថា កូរ៉េខាងជើង បានសាកល្បងគ្រាប់បែកបរមាណូជាថ្មី និងជាការសាកល្បងលើកទី៦ ក្រោយកិច្ចពិភាក្សាជាមួយអាមេរិកបរាជ័យ ។ ការរញ្ជួយដីនាពេលនេះបានធ្វើគេនឹកឃើញដល់ការរញ្ជួយដីកាលពី ខែកញ្ញាឆ្នាំ២០១៧ ដេលពេលនោះកូរ៉េខាងជើង បានសាកល្បងគ្រាប់បែកបរមាណូ ហីដ្រូសែន ជាលើក ដំបូងនិង ជាលើកទី៦ក្នុងប្រទេសនេះ ។
ការរញ្ជួយដីពេលនេះទំហំ២.៥រ៉ិចទ័រ បានកើតឡើងនៅវេលាម៉ោង៩និង៣៣នាទីព្រឹក (ម៉ោងនៅក្នុងតំបន់) ថ្ងៃទី២៩ ខែមករា ឆ្នាំ២០២០ ស្ថិតនៅខេត្ត Hamgyong ទីតាំងដែលកូរ៉េខាងជើងបានប្រកាសបិទកន្លែងសាកល្បងគ្រាប់បែកនុយក្លេអ៊ែរ Punggye-ri កាលពីពេលកន្លងមក ។ នេះបើតាមភ្នាក់ងារឧតុនិយមរបស់កូរ៉េខាងត្បូង ត្រូវបានប្រភពរ៉យទ័រដកស្រង់ចុះផ្សាយ ។
សេចក្តីថ្លែងការណ៍របស់រដ្ឋបាលឧតុនិយមកូរ៉េខាងត្បូងបញ្ជាក់ថា «វាជាការរញ្ជួយដីធម្មជាតិ ដែលហាក់ដូចបណ្តាលមកពីការសាកល្បងគ្រាប់បែកនុយក្លេអ៊ែរ ដូចកាលសាកល្បងនុយក្លេអ៊ែរលើកទី៦» ។ ទីកន្លែងរញ្ជួយដីនោះ នៅប្រហែល៣គីឡូម៉ែត្រ ភាគអាគ្នេយ៍ ទីតាំងសាកល្បងគ្រាប់បែកនុយក្លេអ៊ែរគ្រាប់ទី៦របស់កូរ៉េខាងជើង ។
គួរបញ្ជាក់ថា តំបន់ Punggye-ri ត្រូវបានស្គាល់ថា ជាទីកន្លែងដែលកូរ៉េខាងជើងប្រើប្រាស់សម្រាប់សាកល្បងអាវុធនុយក្លេអ៊ែរ ។ កូរ៉េខាងជើងធ្លាប់បានសាកល្បងគ្រាប់បែកនុយក្លេអ៊ែរ៦លើកមកហើយ ចាប់ពី ខែតុលា ឆ្នាំ២០០៦ រហូតដល់ ខែកញ្ញា ឆ្នាំ២០១៧ ។
គ្រាប់បែកបរមាណូសាកល្បងកាលពីឆ្នាំ២០១៧ ត្រូវកូរ៉េខាងជើងអួតថា មានសមត្ថភាព និងកម្លាំងខ្លាំងលើសរាប់សិបដងទៅនឹងគ្រាប់បែកនុយក្លេអ៊ែរដែលខ្លួនបានសាកល្បងកាលពីប៉ុន្មានលើកមុនៗនោះ ។
អ្នកជំនាញខ្លះនិយាយថា មិនមានជាការរញ្ជួយដីនោះទេ ប៉ុន្តែវាបណ្តាលមកពីការសាកល្បងគ្រាប់បែកនុយក្លេអ៊ែរ គឺគ្រាប់បែកបរមាណូ ប្រភេទដូចគ្រាប់បែកនុយក្លេអ៊ែរដែលកូរ៉េខាងជើងបានសាកល្បងកាលពី ខែកញ្ញា ឆ្នាំ២០១៧នោះអីចឹងដែរ ៕
