សារព័ត៌មាន នគរវត្ត តែងតែនាំមុខគេជានិច្ច
ក្រសួងសុខាភិបាលរបស់ប្រទេសជប៉ុនបានចេញសេចក្តីថ្លែងការណ៍មួយកាលពីពីថ្ងៃទី៥ ខែកុម្ភៈ ឆ្នាំ២០២០ថា មនុស្សយ៉ាងតិច១០នាក់បានឆ្លងវីរុសកូរ៉ូណា បន្ទាប់ពីការធ្វើតេស្តរកវីរុសលើអ្នកដំណើរនៅលើកប៉ាល់ Diamond Princess ។
លោក Katsunobu Kato រដ្ឋមន្ត្រីក្រសួងសុខាភិបាលបានបញ្ជាក់ថា ក្រោយលទ្ធផលធ្វើតេស្ត គឺអ្នកដំណើរចំនួន១០នាក់ នៅលើកប៉ាល់ដឹកអ្នកដំណើរនេះ មានផ្ទុកវីរុសកូរ៉ូណាថ្មី (2019-nCoV)។ អ្នកដែលវិជ្ជមានវីរុសនេះ ត្រូវបាននាំយកទៅកាន់មន្ទីរពេទ្យ ដោយមានកិច្ចសហការពីឆ្មាំការពារដែនសមុទ្រជប៉ុនផងដែរ ។
លោកបញ្ជាក់ថា អ្នកដំណើរផ្សេងទៀតនៅលើកប៉ាល់នេះ តម្រូវឲ្យបន្តស្ថិតនៅលើកប៉ាល់ Diamond Princess ហើយស្ថិតនៅឆ្ងាយដាច់ពីគេឯងរយៈពេល១៤ថ្ងៃជាកំហិត ។ រយៈពេលប៉ុណ្ណេះ ក្រុមវេជ្ជសាស្ត្រអះអាងថា មេរោគមិនអាចភ្ញាស់ពូជពង្សចម្លងបានទៀតទេ ។
គួរបញ្ជាក់ថា ជប៉ុនបានឃាត់កប៉ាល់មួយគ្រឿង ដឹកអ្នកដំណើរ និងនាវិកសរុប ៣ ៧១១នាក់ ដាក់ឲ្យនៅឆ្ងាយដាច់ដោយឡែកពីគេឯង ដើម្បីធ្វើតេស្ដរកវីរុសកូរ៉ូណាថ្មី (2019-nCoV)កាលពីថ្ងៃទី៤ ខែកុម្ភៈ ឆ្នាំ២០២០ បន្ទាប់ពីអ្នកដំណើរនៅលើកប៉ាល់នោះម្នាក់ ដែលបានចេញដំណើរពីទីក្រុងហុងកុង បានពិនិត្យឃើញថា មានផ្ទុកជំងឺរលាកសួតថ្មីបង្កឡើងដោយវីរុសកូរ៉ូណា ។
កប៉ាល់ដឹកអ្នកដំណើរមួយគ្រឿងនេះ មានឈ្មោះ Diamond Princess បានចូលសំចតនៅកំពង់ផែ ទីក្រុង Yokohama ភាគខាងត្បូងទីក្រុងតូក្យូ កាលពីថ្ងៃទី៣ ខែកុម្ភៈ ឆ្នាំ២០២០ ដើម្បីត្រួតពិនិត្យសុខភាពអ្នកដំណើរ និងសមាជិកនាវិក ។ ការត្រួតពិនិត្យនេះធ្វើឡើង ក្រោយអ្នកដំណើរម្នាក់អាយុ ៨០ឆ្នាំ បានចាកចេញពីទីក្រុងហុងកុង កាលពីថ្ងៃទី២៥ ខែមករា រកឃើញថា បានឆ្លងវីរុសកូរ៉ូណា ។
គួរបញ្ជាក់ថា គិតត្រឹមថ្ងៃទី៥ ខែកុម្ភៈ ឆ្នាំ២០២០ ជំងឺរលាកសួតថ្មីបង្កឡើងដោយវីរុសកូរ៉ូណា (2019-nCoV) បានសម្លាប់មនុស្សកើនឡើង ៤៩២ នាក់ និងឆ្លងលើមនុស្សចំនួន ២៤ ៥៥១ នាក់ហើយ ព្រមទាំងឆ្លងដល់ប្រទេសចំនួន ២៨ នៅក្នុងតំបន់ និងជុំវិញពិភពលោក ៕
