សារព័ត៌មាន នគរវត្ត តែងតែនាំមុខគេជានិច្ច
ក្រសួងការពារជាតិរបស់ប្រទេសរុស្ស៊ីបានបញ្ជាក់ប្រាប់ប្រភពព័ត៌មាន Krasnaya Zvezda ផ្សាយនៅថ្ងៃទី៧ ខែកុម្ភៈ ឆ្នាំ២០២០ថា កងកម្លាំងយោធារុស្ស៊ីបានជួបប្រទះ និងហោះហើរបណ្តេញយន្តហោះស៊ើបការណ៍របស់បរទេសចំនួន១៦លើក ដែលបានហោះមកឈ្លបយកការណ៍សម្ងាត់នៅជិតព្រំដែនអាកាសរុស្ស៊ី ក្នុងអំឡុងរយៈពេលមួយសប្តាហ៍កន្លងទៅនេះ ។
ប្រភពបានបញ្ជាក់ថា យន្តហោះចម្បាំងរុស្ស៊ី ប៊ិះរងការវាយប្រហារចំនួន២លើក ខណៈដែលហោះទៅស្ទាក់បណ្តេញយន្តហោះស៊ើបការណ៍បរទេសកុំឲ្យចូលកៀកព្រំដែនអាកាសរុស្ស៊ីនោះ ។
កាសែតនេះបានបញ្ជាក់ថា យន្តហោះបរទេសគឺមិនអាចអនុញ្ញាតឲ្យចូលដែនអាកាសរុស្ស៊ីដោយខុសច្បាប់បានឡើយ ។
សារព័ត៌មាន Krasnaya Zvezda បានផ្សាយថា ចាប់ពីថ្ងៃទី៣១ ខែមករា ឆ្នាំ២០២០ យន្តហោះបរទេស២៥គ្រឿង និងយន្តហោះគ្មានមនុស្សបើក៨គ្រឿងបានធ្វើសកម្មភាពហោះហើរឈ្លបយកការណ៍នៅក្បែរព្រំដែនរុស្ស៊ីអំឡុងសប្តាហ៍មុននេះ ។
អាមេរិក និងសម្ពន្ធមិត្តអង្គការណាតូរបស់ខ្លួន តែងតែបញ្ជូនយន្តហោះទម្លាក់គ្រាប់បែក, យន្តហោះស៊ើបការណ៍សម្ងាត់ ក៏ដូចជាយន្តហោះគ្មានមនុស្សបើកបរ (ដ្រូន) ចូលទៅកាន់តំបន់ក្បែរព្រំដែនរុស្ស៊ីសមុទ្របាល់ទិក និងសមុទ្រខ្មៅ ធ្វើសកម្មភាពយកការណ៍។ ប្រភពពីយោធារុស្ស៊ី អះអាងថា កាលពីឆ្នាំ២០១៨ កងទ័ពជើងអាកាសរុស្ស៊ីបានហោះស្ទាក់ បណ្តេញយន្តហោះបរទេសដែលចូលកៀកព្រំដែនអាកាសរុស្ស៊ី ប្រហែល៣ពាន់លើក ៕
